28
Isaak In Laban Lakah Jakob Hah
1 Isaak in Jakob cu samin, a tawh ten, “Kanaan numei cu huai hihim pahsun.
2 Na tuangtim inna, Mesopotamia ngam, na pu Bethuel innah hawhin hi. Mahlai a numei, na pu Laban i canu pa kha khat cu na huai in hi.
3 Cungnungbel Pathian in, na huaidunnak uh cu muicu pia zal henna, canau tampi nei in, hinnam tampi tei pa in suaktik zal hen.
4 Pathian in Abraham muicu a piak zo bangin, nangmah le na casuante cu muicu pia zal hen, Pathian in Abraham lak a, a piakmi na umnak ngam hi co zalin,” ti hi.Ref 28:4 Pian 17:4-8;
5 Isaak in Jakob cu Mesopotamia ngam, Aramean mi Bethuel i capa Laban lakah hah hi. Laban cu Jakob le Esau tei nu Rebekah i ningpa hi.
Esau In Zidang Huai
6 Isaak in Jakob cu muicu pia a, zi huai tukin Mesopotamia ngamah hawhtik hi tih thu Esau in thei hi. Jakob muicu a piak ten, Kanaan numei huai tuk ngawlin thupia hi.
7 Jakob in, a nu le pa tei thu a ngaih hangin Mesopotamia ngamah hawh hi.
8 Esau in, a pa Isaak in Kanaan numei cu deihma hi, tih ciangno in thei hi.
9 Mah hangin Abraham i capa Ishmael lakah Esau cu hawhin, zi dang pa khat, Ishmael i canu, Nebaioth i celnu Mahalath huai hi.
Bethel Pen Jakob Mangman
10 Jakob cu Beersheba pen tulin Haran lamah hawh hi.
11 Ni tum zo toh a hih ten, mun thiangtho pa khatah ngiahbuk saam hi. Mahlaiah suang pa khat lukhamin cam hi.
12 A mangah lei pen van khong tian kailawn saupi na mu in, vancungmi cu mah kailawnah a kaito le a tolhsuk li mu hi.Ref 28:12 Jn 1:51;
13 Topa cu a elah dingin, “Keimah cu Abraham le Isaak tei Pathian Topa ing. Na zaunak mun le ngam hi nangmah le na casuante pia tung.Ref 28:13 Pian 13:14-15;
14 Na casuante cu leihum a, leivul zah haw tuk hi. A ngam haw cu nisuah nitum, sak le hangah kauh pepel haw tuk hi. Nangmah le na casuante hangin leihum hinnam hempoh muicu pia tung hi.Ref 28:14 Pian 12:3, 22:18
15 Nangma lakah um tung a, na hawhnak hempoh ah nangmah cingkemin, hih ngamah kiklehtik tung hi. Hi ka tepmi hempoh a kim khawng laklawh nang cu zamthong tuk mang hi, tih cu cing lelengin,” tin ti hi.
16 Jakob cu khanglo in, “ Topa cu hilai munah um naven maw thei kha ngawlin ka um,” tin ti hi.
17 Jakob cu lauthahin, “Izah takin mullinghah mun le ngam him! Topa i inn, vancung tumnak kongka ngangai hi!” ti hi.
18 A zingten, zingtungno in Jakob cu tho a, lukham a man mi suang cu la in, phawhngilh ngawlnak suangphut hi. Olif sathau leihin, Pathian nelah ap hi.
19 Jakob in mah mun cu Bethelnote 28:19 Bethel tihmi Hebru awn i sullam cu Pathian i inn tihnak hi. tin a minsa hi. Mah laihngawlin mah khua cu Luz tin sam haw hi.
20 Mahceng ten Jakob in, Topa Pathian nelah, “Ka lakah um ci a, ka hawhnak lampiah cingkemin, eih tuk an le silh tuk puan na piak i hum pen,
21 ka pa i innah himdamno in ka heng kikleh thei tale Topa nangmah cu ka Pathian ngangai hi tuk ci.
22 Hih ka phutmi phawhngilh ngawlnak suangphut hi, Pathian nangma inn hi tuk a, keimah na piakmi hempoh sung pen seh sawm seh khat pia loli tung hi,” tin thutiam hi.