14
Abram In Lot Pan
1 Kumpi pa li: Babilonia kumpi Amrafel, Ellasar kumpi Ariok, Elam kumpi Khedorlaomer le Goiim kumpi Tidal ten
2 a dang kumpi pa nga: Sodom kumpi Bera, Gomorrah kumpi Birsha, Admah kumpi Shinab, Zeboiim kumpi Shemeber le Bela (Zoar) kumpi cu na do haw hi.
3 Tu a, Tuipi Thi tihmi Siddim Phillawnah mah kumpi pa nga cu khawmdunin, tang ngel haw hi.
4 Amuh cu kum sawm le kum nih sung Khedorlaomer in, na uk zo a, a kum sawm le kum thumnak ten amah do tukin ngal na tho haw hi.
5 A kum sawm le kum linakin Khedorlaomer le a panpih ten a ngalkap venghawng haw tuah do tawtok haw a, Ashteroth Karnaim ah Refaim cu nehin, Ham ah Zuzim neh haw a, Kiriathaim munlawnah Emim nehin,
6 phillawn el a ummi Elparan tian, Seir mualhumah Hor mite vang neh khawng haw hi.
7 nungkik haw a, Kadesh (Enmishpat) a hen haw ten, Amalek mitei ngam hempoh nehin, Hazazon Tamar a ummi Amor mite vang neh khawng haw hi.
8 Sodom, Gomorrah, Admah, Zeboiim le Bela khua a, kumpi ten a ngalkap neihmi hempoh khawmkhawmin,
9 Elam kumpi Khedorlaomer, Goiim kumpi Tidal, Babilonia kumpi Amrafel le Ellasar kumpi Ariok tuah Siddim phillawnah kumpi pa nga le kumpi pa lite dodun tawtok haw hi.
10 Siddim phillawn cu zinan suahnak khuk dimin, Sodom le Gomorrah kumpi cu ngaldonak haw pen a tai haw ten mah khuk sungah cak haw hi. Adang pa thum cu mualhumah tai vawk haw hi.
11 Kumpi pa li ten Sodom le Gomorrah khuasung a ummi na hempoh, a eih haw tuk an tian la in, tai haw hi.
12 Sodom khuasung a um Lot vang a neihmi hempoh tuah manin pui haw hi.
13 Mahnaven ngaltaipa pa khat cu Hebru mi Abram lakah hungin Lot a mat haw thu hilh hi. Abram cu Amor mi Mamre a, Sasua kung elah um hi. Mamre a, unaupihte cu Eshkol le Aner hi haw in, a pa thumin Abram lam tangtu haw hi.
14 Abram in, a unau pa a mat haw thu a zak ten a mihingte samkhawmin, pasal tiptep za thum le sawm le liat tul haw a, ngal cu Dan tian hil haw hi.
15 Mah laih munah Abram i mihingte cu hon nihah khenin, zanlam ten a ngal haw cu do in neh haw hi. A ngal haw cu Damaskas khua saklam a um Hobah tian hil haw hi.
16 a unau pa Lot le Lot i neihmi hempoh, numei le ngalmatmi a dangte tuah lonsakleh khawngin kihpihleh khawng hi.
Melkhizedek In Abram Muicu Pia
17 Abram cu Khedorlaomer le kumpi dang a nehnak mun pen a kihleh ten Sodom khua kumpi in, Shaveh munlawn (kumpi munlawn tih hei sam mi) pen muak hi.
18 Salem khua kumpi Melkhizedek vangin cangho le sabittui kengin, Abram cu na muak bok hi. Melkhizedek cu Cungnungbel Pathian i thiampi vang na hi a, Abram cu hi bangin muicu pia hi:Ref 14:18-20 Heb 7:1-10;
19 “Cungnungbel Pathian lei le van bawltu in, Abram hi muicu pia zal tahen.
20 Na ngal tei hum a, nehnak a piatu, Cungnungbel Pathian cu thangphatin um hen,” ti hi. Abram in ngal khut pen a lakmi hempoh sung pen seh sawm suah seh khat cu Melkhizedek lakah pia hi.
21 Sodom kumpi in Abram lakah, “Na lakmi na hempoh cu nangmahin co in; mahnaven mihingte cu kei hu pialeh zalin,” tin ngen hi.
22 Mahnaven Abram in, “Van le lei bawltu Cungnungbel Pathian mai ah khutzaakin thutiam ing.
23 Nangmahin, Abram a hausatiktu cu keimah ing, tin na tih khak tuk hangin, nata a himi hempoh nimlum le kedam khau pepanin imah la tuk mang hi.
24 Keima bulta tukin imah la tuk mang. Ka mihing tei eih sa, a in sa haw le keimah a panpihtu tei covo bek sang tung; mahnaven Ener, Eshkol le Mamre vangin a covo haw la bok haw tuk hi,” tin Sodom kumpi lakah ti hi.