PIANPATNAK
(Genesis)
Thulamsial
Pianpatnak Genesis tihmi sullam cu “Bulpatnak” tihnak hi. Hih laibu sungah lei le van tei semsuahnak, mihing pianpatnak le leihum sualnak le thuaknak tei bulpatnak, Pathian le mihing iti bangin pehzomdun him tih thute hilh hi. Pianpatnak laibu hi khen nihin khen theih hi.
1. A ngeng 1-11 sungah leipi pianpatnak thu le Pathian i semsuah masa mihing tei tangthu um hi. Adam le Evi tei tangthu, Kain le Abel tei tangthu, Noah le tuihautung tangthu le Babel suangtian tangthute um hi.
2. A ngeng 12-50 sungah Israel hinnam tei pupa suahkehnak tangthu um hi. Amasabelin, Abraham i muannak le Pathian thu a ngaihnak hangin sialsiah tak a hihnak tangthu um hi. Mahnung ten a capa Israel i tangthu, a casuan Jakob i tangthu (Israel tih hei sam mi), Israel hinnam, nam sawm le nam nih cikhaihtu, Jakob i capa sawm le pa nih tei tangthuin zui hi. Mahmi tei lak pen Josef i thu le la tam saw deuhin um hi. Jakob i capa dangte le a innkua hawng haw in, Izipt ngam a hawhnak thu le la son tam cuang hi.
Hi laibu in mihing tei tangthu hilhin, a tuptahbelmi cu Pathian i na a bawlmi thu hi. Pathian in ihempoh piangtik hi tin, a thu panin, Pathian in, a miphunte a ngaihsaknakte lang thuahtik tuk laih hi, tih thutepnak tuahin, a thu botik hi. Hi laibu a patnak pepan a tawpnak tian tangthu a neitu cu Pathian hi. Phatngawlnak a bawltute cu thukhennak le bawlsiatnakte tawkin, a um haw ten a mihingte bawm le pui-in, a tangthu haw mel a neitiktu cu Pathian hi, tih cu langtik hi. Hi tangthu laibu hi hinnam pa khat tei upnak le mah upnak a nun theihnak tukin, a bawmtu tuk ngatmi le santehnak tangthu hi.
1
Pianpatnak Thu
1 Amasabelin, Pathian in lei le vante piangtik hi.
2 Lei cu mellim nei ngawlin a lawngpi in um hi. Khuathimin tui thukpi cu khuhin, Pathian i hawvang cu tuipi humah um hi.
3 Pathian in, “Khuavak um hen,” a tih ten vaknak cu um hi.Ref 1:3 2Kor 4:6;
4 Pathian in, a zoh ten pha ti hi. Pathian in vaknak cu thimnak lak pen khenkhuai hi.
5 Vaknak cu “Sun” tin samin, thimnak cu “Zan” tin sam hi. Taklam cu boin, zinglam heng hi, mah ni cu ni khatnak hi.
6 Pathian in, “Tuipi khen nihin, a khentu tukin van kuumpi um hen,” a tih ten a tihnak bangin um hi.Ref 1:6-8 2Pet 3:5;
7 Mah van kuumpi cu Pathian in bawlin, nuailam tui le humlam tui cu khen hi.
8 Pathian in mah van kuumpi cu “Van” tin sam hi. Taklam boin, zinglam heng hi, mah ni cu a ni nihnak hi.
9 Pathian in, “Leiko lang tukin van nuai a, tuite cu munkhatah khawmdun haw tahen,” tin thu a piak ten a tihnak bangin piang ngangai hi.
10 Pathian in leiko cu “Leihum” tin samin, munkhatah a khawmdunmi tui cu “Tuipi Thuanthum” tin sam hi. Pathian in, a bawlsate a zoh ten pha hi, tin ti hi.
11 Pathian in, “Leihum pen thingkung, hamkung a phunkim, ci a neimi le ngah a neimi piang hen,” tin thu a piak ten a tihnak bangin piang ngangai hi.
12 Mah hangin ci a neimi le ngah a neimi thingkung, hamkung namkim cu leihum pen suaktik hi. Pathian in, a bawlsate a zoh ten pha hi, tin ti hi.
13 Taklam boin zinglam heng hi, mah ni cu a ni thumnak hi.
14 Pathian in, “Sun le Zan khenkhuaitu tukin, ni le ha, kum khentu tukin le biaknak puai sialnak tukin vanah vaknakte um hen;
15 vanah vak haw tuk a, leihumah vaknak pia haw tuk,” ti in, a tihnak bangin um haw hi.
16 Pathian in vaknak ngengpi pa nih bawlin, sun hun uktu tukin ni bawl a, zan hun uktu tukin hade le aksi vang bawl hi.
17 Leihum vaktiktu tukin hi vaknak cu Pathian in vanah koih hi.
18 Sun le zan uktu tukin le vaknak le thimnak khentu tukin Pathian in, a bawlsate a zoh ten pha hi, tin ti hi.
19 Taklam boin zinglam heng hi, mah ni cu a ni linak hi.
20 Pathian in, “Tuisung a nungmi lunghing namkim cu tuipi pen piang hen, leihum huih lakah vanote leng haw hen,” tin ti hi.
21 Mah hangin Pathian in tuisung a, lauhuai lunghing ngengpite piangtikin, tuisung a um, a nungmi phunkim piangtik hi; mahten vano phunkim vang bawl hi. A bawlsate a zoh ten Pathian in pha hi, tin ti hi.
22 Pathian in, “Tuisung a nungmi nganhingte cu pungzai unna, tuipi thuanthumah dim khawng un, vanote vang pungzai un,” tin muicu pia hi.
23 Taklam boin, zinglam heng hi, mah ni cu a ni nganak hi.
24 Pathian in, “Inn ngulh nganhing phunkim le hampa lak a, nganhing a ngeng le neu in hihen, bokvak namkimin, leihum pen piang haw tahen,” ti in, a tihnak bangin piang paih hi.
25 Pathian in inn ngulh le nganhing a ngeng le neu hihen, bokvak a phe theimi hempoh bawl hi. Pathian in, a bawlsate a zoh ten pha hi, tin ti hi.
26 Pathian in, “Mihing bawl toh nung; eimu melsuun in, eimuh bang hi haw tuk hi. Tui sungum ngasa le vanah a lengmi vano tei humah hihen, inn ngulh nganhing le ngamsa a ngeng a neu humah hihen, thunei haw tuk hi,” tin ti hi.Ref 1:26 1Kor 11:7;
27 Mah hangin Pathian in mihing bawl hi; Ama melsuunin, pano le numei bawl hi.Ref 1:27 Mt 19:4; Mk 10:6;Ref 1:27 Pian 5:1-2;
28 Pathian in amuhte cu muicu pia a, “Ca tampi nei in, pungzai unna, leipi hi luahin, uk un hi. Tuisung ummi ngasa hihen, leihum a vakmi ngamsa namkim, a ngeng le neu in le van a, vano hempoh humah thuneihnak pia ing,” tin ti hi.
29 Mah hum pen Pathian in, “Anci phunkim le thingngah phunkim cu na eih tuk uhin pia ing, ti hi.
30 Vano phunkim le nganhing a ngeng le neu namkim tei eih tukin hamhing le thingngah pia ing,” ti hi. A tihnak bangin na cang hi.
31 Pathian in, a bawlsa hempoh a zoh ten, pha leita, tin ti hi. Taklam cu boin, zinglam heng hi, mah ni cu a ni luknak hi.