40
Pathian Nelah Puanbuk Apnak
1 Topa in Moses lakah,
2 “Ha masabel ha, ni khat ni-in Topa i Umnak Puanbuk cu na sa un hi.
3 Mah buk sung a, Thutiam Kuang sungah Thukham Sawm cu koih unna, thingkuang cu puanzak limah koih un hi.
4 Cabuai vang koih unna, a nate vang a humah koih un hi. Meivaknak khuam koih unna, a humah mei vak un.
5 Thutiam Kuang i mai zawnkekah zimui namtui halnak sui tuah bawlmi biaklandawh cu koih unna, a tumnak kongka ah puanzak khai un hi.
6 Puanbuk maiah halkang biakpiaknak cu koih un hi.
7 Mah biaklandawh le Puanbuk laklawhah khut somnak kuang koih unna, a sungah tui vang na koih un hi.
8 A upnak cu bulh khawng unna, tumnak kongkhahah puanzak vang khai un hi.
9 “Mahten sathau la unna, Pathian Umnak Puanbuk le a sung a, ummi hempoh noih un hi. Mahti bangin Puanbuk le a na hempoh cu Pathian nelah ap unna, inn thiangtho in suak tuk hi.
10 Halkang biakpiaknak biaklandawh le a na vang sathau noih un hi. Mahti bangin Pathian nelah ap unna, a thiangtho zetmi biaklandawh hi tuk hi.
11 Khut somnak le a tawdam vang sathau noih unna, mah ti bangin Pathian nelah na pia un hi.
12 “Aaron le a capate cu Puanbuk kongka ah hung haw henna tuibual haw hen.
13 Aaron cu puan thiangtho silhtik unna, ka ca in thiampi na a deh theihnak tukin sathau thihin thiangthotik un hi.
14 A capate vang a elah hung haw henna angki silhtik un.
15 A pa haw sathau na thih uh bang lelengin, a capate vang sathau na thih un hi; mahten keima ca in thiampi nadek haw tuk hi. Sathau thihmi a hih haw hangin kumkhua in thiampi nadek haw tuk hi,” tin ti hi.
16 Topa i thupiak bangin Moses in bawl hi.
17 Mah hangin Izipt ngam a zamsan nung haw kum nihnak ha masabel ni khat ni-in Topa i umnak Puanbuk cu dingtik haw hi.
18 Amah Moses loli in dingtik hi. Moses in khuam tawdam cu koihin khuam phut hi; pangzawl vang bulhin, pang vang tiang khawng hi.
19 A khuh cu phalhin Topa i thupiak bangin Puanbuk cu khuh hi.
20 thukham ngatnak suangpeek cu la in, Thutiam Kuang sungah koih hi. A zawnnak ngolh cu thingkuang hum a, khaihmi a kual sungah holhin, thingkuang cu sin hi.
21 Pathian umnak puanbuk sungah Thutiam Kuang cu koihin, lang tuk ngawlin puanzak tuah limtik hi. Topa i thupiak bangin thukham ngatnak suangpeek koihnak kuang cu puanzak tuah hi bangin limtik hi.
22 Puanbuk sungah cabuai vang koih hi; buk sung saklam mawk, puanzak pualamah koih hi,
23 Topa i thupiak bangin Topa i ca in luihmi cangho cu cabuai humah koih hi.
24 Buk sung lelengah hanglam cabuai i siklam zawnah meivaknak khuam koih hi.
25 Topa i thupiak bangin, Topa i maiah meivaknak hum a, vak tukmi mei-innte koih hi.
26 Sui tuah bawlmi namtui halnak biaklandawh cu puanzak mai zawnkekah koih hi.
27 Mah biaklandawh humah, Topa i thupiak bangin zimui namtui cu mei tuah haal hi.
28 Puanbuk sung tumnak kongka ah puanzak hi.
29 Halkang biakpiaknak tuk biaklandawh cu kongka maiah koih hi. Mah biaklandawh humah piakmi an cu koih a, halkang biakpiaknak le an biakpiaknak vang bawlin, Topa i thupiak bangin cik cu a bo tianin kangtik khawng hi.
30 Mah biaklandawh le Puanbuk laklawhah khut somnak kuang koihin tibualnak tukin tui vang koih hi.
31 Mah tui tuah Moses, Aaron le Aaron i capa ten a khut le a ke haw som haw hi.
32 Topa i Puanbuk sungah a tum haw ten hihen, biaklandawhah a hawh haw ten hihen, Topa i thupiak bangin tuibual masa haw hi.
33 Puanbuk le biaklandawh kimsuakin, Moses in kulhtian bawl khawngin, a pang upnak kongkhah heiah puanzak hi. Moses in nadeh hempoh cu ceng khawng hi.
Topa i Puanbuk Hum Meingo
(Mipum 9:15-23)
34 Puanbuk cu meingo in tuam a, Topa i sunloihnak, vaknak tuah dim hi.Ref 40:34 1Kum 8:10-11; Isa 6:4; Ezk 43:4-5; Mang 15:8;
35 Topa i sunloih vaknak tuah a dim hangin a sungah Moses cu tum thei ma hi.
36 Munkhat pen mundangah Israel mite a thawn haw ten Pathian umnak Puanbuk pen meingo a thawn bek ten thawn bok haw hi.
37 Meingo a thawn ma tale mundangah thawn haw ma hi.
38 Ngamkhing lakah a vahvaih sung haw hempoh Topa a lak hawah um hi tih langtiknakin, Puanbuk humah sunlamin meingo, zanlamin mei vak leleng hi tih cu mu haw hi.