2
Moses Suahnak
1 Mah hun laih takin Levi mi pa khatin, a phunpih numei pa khat huai hi.
2 A zi cu naupai in capa hing a, deih awhzet tih cu a nu in amuh ten ha thum sung sel hi.Ref 2:2 Nung 7:20; Heb 11:23;
3 Mahnaven a sel theih ngawl toh hangin phaikung tuah bawm pa khat phansakin, mah bawm sungah tui tum thei tuk ngawlin cingnai le khuai-ngap maat hi. A sungah nauno cu sialin ngunmawk hampa sauzet umnakah koih hi.
4 A u nu in khawla thim pen iti um tuk hum tih thei nuamin cuan hi.
5 Kumpipa i canu cu mah ngunah tuibual tukin hungsuk a, a umlawh numeite cu ngunmawkah vak li haw hi. Phawhkhak ngawlin hampa sauzet sungah bawm cu amuh ten la tukin a umlawhnu hah hi.
6 Kumpipa i canu in bawm cu a hon ten nau pano cu mu hi. Nauno cu kap li in, hehpihzet hi. “Hebru tei nauno si!” ti hi.
7 A u nu in, “Hebru numei pa khat nauno a cingkhawi saktu tuk hawhin samsak nang maw?” tin dong hi.
8 Kumpipa i canu in, “Samsakin hi,” ti hi. Mah nu cu hawhin, nauno i nu loli sam hi.
9 Kumpipa i canu in, “Hi nauno hi cingkhawi sak inna, na thaman cu pia tung,” ti hi. Mah hangin nauno cu nu in la in, komno cingkhawi hi.
10 Nauno cu a upat deuh ten nupi nu in, Kumpipa i canu lakah hawhpihin, kumpi canu in ama capa in bawl hi. “Tui sung pen ka suahmi hi,” ti in, a min Moses note 2:10 Moses: ti cu Hebru awnin Suah tihnak hi; tui sung pen suahmi tihnak hi. sa hi.Ref 2:10 Nung 7:20;
Midian Ah Moses Tai
11 Moses cu khangto dedeuhin, ni khat cu a miphun tei lakah a len ten, a miphun cu Izipt miten nadeh haksa a dehtik haw cu mu hi. Mah hum pen Izipt pa in, a miphun pih Hebru mi pa khat a thah na mu hi.Ref 2:11 Heb 11:24;Ref 2:11-14 Nung 7:23-28;
12 Moses in, a piam le pam zo in, kuamah amuh ngawl ten, Izipt pa cu thatin, a luang cu philnel sungah sel hi.
13 A zingten a phunpih tei lakah hawh lehin, Hebru mi pa nih a sualdun lih haw cu mu hi. A sual saw deuh pa i lakah, “Ita na phunpih cu vat cim,” ti hi.
14 Mahpa in, “Akua in kaw ka hum uhah uktu le thukhentu tukin nang a bawl? Izipt pa na thah bangin keimah thah tum bok cim?” ti hi. Moses cu a thinsu in, “Mipi in ka bawlmi hi thei zo haw na hi si!” tin ti hi.
15 Mah thu cu kumpipa in, a zak ten Moses cu thah tum hi. Mahnaven Moses cu tai in, Midian ngamah tai hi.
Ni khat cu tuikhuk pa khat elah Moses cu cawl hi.Ref 2:15 Nung 7:29; Heb 11:27;
16 Midian ngam a, thiampi Jethro note 2:16 Jethro cu Moses i sungpa hi a, Reuel tih vangin sam haw i canu salih cu tuikhukah, a pa i tuu le keel piak tuk tuicawi in, ngan tei tui innak tuk kuang sungah pam li haw hi.
17 Mahnaven tuucing dang ten Jethro i canute cu hawlvawk haw hi. Moses in, numei cu panin, a ngan haw tui piak sak hi.
18 A pa haw lakah a kihleh haw ten a pa haw in, “Ita tuni peng khawmano in pin si uh ci?” tin dong hi.
19 “Izipt pa in tuucing tei lak pen a pat hang hi,” tin ti haw hi. “Tui cawisakin, ka ngan uhte piak sak hi,” tin ti haw hi.
20 “Mahpa cu atu ilai ah kaw?” tin a canute dong hi. “Ita mahpa cu zam uh cim? Hawh unna, eimuh tuah an ei tukin sawmta un,” tin, a canute samlehtik hi.
21 Moses cu mahlai ngamah um tuk a lungkim hangin, Jethro in, a canu Zipporah tuah huaiduntik hi.
22 Zipporah in capa nei in, “Ngamdangah mikhual ing hi,” ti in, a min Gershom note 2:22 Gershom: tih cu Hebru awnin Ngamdangmi tih tuah bangten hi sa hi.
23 Kum a ngeithim ten Izipt kumpi cu thi hi. Mahnaven Israel mite cu sal a thuaknak haw hangin bawmtu tuk samin, tau in, au kio li haw laih hi. A taunak haw aw cu Pathian nelah hengin,
24 a tau le kio lihnak aw cu Pathian in zain, Abraham, Isaak le Jakob tuah a thutepmi cing leng hi.Ref 2:24 Pian 15:13-14;
25 Israel tei sal a thuaknak haw cu Pathian in mu in, a hum hawah hehpihnak nei hi.