18
Moses Lakah Jethro Leng
1 Moses i sungpa, Midian ngam thiampi, Jethro in Moses le a mi Israel tei ca in, Pathian i bawlmi hempoh le Izipt ngam pen Topa i a tultiknak thu cu za khawng hi.
2 Mah hangin Jethro in Moses lakah Zipporah, a zi, a pu i lakah a um hihtikmi cu hunpih hi.Ref 18:2-3 Suah 2:21-22;
3 Jethro in Zipporah i capa pa nih, Gershom le Eliezer hunpihin, Moses in, “Ngamdangah mikhual ing hi,” ti in, a capa pa khat cu a min Gershomnote 18:3 Gershom tih cu Ngamdangmi tihnak hi sa in,Ref 18:3 Nung 7:29;
4 a pa nihnak cu, “Ka pa i Pathian cu keimah bawmtu hi a, Kumpi i ngalnam lak pen kei pan hi,” ti in, a min Eliezernote 18:4 Eliezer tih cu Ka Pathian cu keimah bawmtu hi tihnak hi sa hi.
5 Jethro cu Zipporah le a capa pa nihte tuah Pathian mual thiangtho el a, Moses i ngiahbukah hung hi.
6 Moses lakah a pu in, “Keimah na pu Jethro cu na zi le na capa pa nihte tuah hung ung,” tin thutheitik hi.
7 Mah hangin Moses cu amah muak tuk hawhin, a tawh ten a maiah kunin, nam hi. Dam le dam ngawl thu a dotdun ceng haw ten Moses i puanbuk sungah tum haw hi.
8 Moses in Israel mi hangin Topa in kumpi le Izipt mitei hum a, a bawlmi hempoh cu Jethro lakah hilh khawng hi. Lampi a, haksatnak a tawh haw mi le Topa i patnak thute vang hilh khawng hi.
9 Izipt mitei khut sung pen a pat tulnak hangin Topa i phatnak thu a theih ten Jethro cu lungdam zetin,
10 “Kumpi le Izipt mitei lak pen a pantu Topa cu thangphat un. Izipt tei sal sung pen a mihingte a suahtultu Topa cu thangphat un.
11 Atu-in Topa cu pathian dang hempoh sangin ngeng saw tih thei ing; itahim titale hi hempoh hi, Izipt ten Israel tei humah huatnak tuah na a deh haw laihin bawl,” ti hi.
12 Jethro in Pathian nelah biakpiaknak le halkang biakpiaknak bawlin, Aaron le Israel puitute cu Moses i pu Jethro tuah Topa mai ah an kuangkil langkhat haw hi.
Thukhentute Teng Haw
(Daan 1:9-18)
13 A zingten Moses cu a mihing tei thukhen tukin khungin, a maiah mipi zinglam pepan taklam tian ding haw hi.
14 Jethro in mahmi cu amuh ten Moses lakah, “Mipi tei hum a, na bawl tummi hi ikaw? Ita nangmah bekin, hi ti bangin khungin, midang na elkimah zing pepan taklam tian a din leng haw?” tin ti hi.
15 Moses in, “Hiti bangin ka bawl cu a kul hihim hi. Itahim titale Pathian i deihmi i hum tih thei nuamin mipi cu ka lakah hung haw hi.
16 Mi pa nih thu a eldun haw tale ka lakah hung haw in, akua sual saw in, akua man saw hum tih soncat sak ing a, a lak hawah Pathian thukham le daante hilh ing hi,” tin ti hi.
17 Jethro in, “Na tihdan man ma ti hi.
18 Nangmah le nangmah siatsuahin mipi vang siatsuah tuk ci. Na bawlmi tam leita hi. Nangmah pa khat bekin ti ceng tukma ci.
19 Atu-in ngaihsutnak pha pia tung a, na lakah Pathian um tuk hi. Pathian nelah mipi tei kamtai hi tuk ci; a thu haw cu a lakah hentu na hi ahin, na ca in pha tuk hi.
20 Pathian thukhamte zilh inna, iti bang nungin, iti bang bawl tuk tih hilhciang tuk ci.
21 Mahnaven thil tihtheihnak nei, mi khenkhat teng inna, mahte cu Israel puitu tukin koihin hi. A thawng, a thawng, a za, a za, sawm nga le sawm tei puitute hi haw tuk hi. Amuh cu Pathian kihcatu le muantakmi hi haw tuk a, nawhthuh piak theih ngawlmi hi haw tuk hi.
22 Mahmi cu a kumkhua in mipi tei thukhentu hi haw hen. Thu haksa dedeuhte cu na lakah hen haw tuk naven thu noinangte cu amuhno sontikin hi. Mahti bangin na bawl ahi tale na vanngit puak bawm haw tuk a, nop deuh tuk ci.
23 Hitih bangin na bawl tale nangmah le nangmah siatsuahdun ngawlin mipi tei thu vang soncat sak khawng a hih tuk hangin, a inn hawah lungnopno in kik haw tuk,” ti hi.
24 Moses in Jethro i ngaihsutnak a piak bangin bawl a,
25 Israel mi sung pen thil tihtheihnak a neimi tengin, mipi puitu tukin koih hi. A thawng a thawng, a za a za, a sawm nga a sawm nga le a sawm a sawm tei puitu haw hi.
26 A nunsung hawah catngawlin mipi tei thukhentu dek haw hi. Thu haksa cu Moses lakah hen haw a, thu noinang cu amuhno in son haw hi.
27 Mah nungten Moses in, a sungpa, Jethro mangpha pia in, Jethro cu a ngamah pinkik hi.