37
Nguhko Umnak Munlawn
1 Pathian i huham cu ka sungah um hi: a hawvangin la in, nguh nguakcang tuah a dimmi munlawnah koih hi.
2 Mah munlawn tihkimah pui in, nguh tamzet mu ing, mah nguhte cu kozet zo haw hi.
3 Amah in, “Mihing pa, Ezekiel aw, hi nguhte hi nungleh thei haw ni maw tin dong hi?” kei in, “Cungnungbel Topa, nangmah bekin thei ci,” tin donleh ing.
4 Amah in, “Nguh tei lakah profet awnin phuang tulin hi. Topa i otmi ngai tukin nguh kote cu hilhin hi.
5 Cungnungbel Topa keimah in, a lak hawah ka otmi cu amu lakah hi bangin hilhin hi. Na sung uhah haihawh khum tung a, nunglehtik tung.
6 Tha ngui pia tung a, taksa tuah tuamin, vun tuah khuh tung hi. Na sung uhah haihawh khum tung a, nungleh tuk uh ci. Topa ka hihlam cu thei tuk uh ci,” ti hi.
7 Mah hangin a hilh bangkekin profet awn tuah phuang ing. Mahti bangin ka phuan laih takin, upmawh khak ngawlpi in, a khengdun luluihmi thawmnging za ing, nguhte cu pa khat le pa khat pehdun susuih haw hi.
8 Ka zo lih laih takin, nguhte cu tha ngui nei in, taksa in tuamin, vun tuah na khuh hi. Mahnaven a pumpi haw sungah haihawh umma hi.
9 Pathian in ka lakah, “Mihing pa, Ezekiel aw, huih lakah hilhin hi. Cungnungbel Topa in, ‘nang huih,’ ngam tihkim pen hungin, hi miluang tei sungah haihawh hawh tum inna, nungtikin, tin thupia in,” ti hi.
10 Mahten a hilh bangin son ing. Mah taksa pumpi tei sungah haihawh tumin, nung haw a, dingto buabual haw hi. Ngalkap honpi zahin tam haw hi.Ref 37:10 Mang 11:11;
11 Pathian in, “Mihing pa, Ezekiel aw, Israel mite cu hi nguhte bang haw hi. Ko khawngin, mailam muansanmi nei ma ung ti haw hi.
12 Mah hangin profet awnin phuang inna, Topa Pathian keima hilhmi hi cu thanin hi. Keimah in, a khan haw cu hong tung. Tultik tung a, Israel ngamah kik lehtik tung hi.
13 Ka mihingte a vuinak khante cu hongin, ka tultik ten, keimah cu Topa ka hihlam thei haw tuk hi.
14 A sung hawah ka haihawh khum tung, nungtik tung a, amu ngamah umtik tung. Keimah cu Topa ka hihlam thei haw tuk hi. Hiti bangin bawl tukin thutiam zo ing a, bawl tatak tung hi. Topa keimah in hilh zo ing.”
Judah le Israel Uknak Khawmdun
15 Topa in ka lakah,
16 “Mihing pa, Ezekiel aw, ngolh pa khat la inna, a humah ‘Judah ukmi ngam,’ tin nganin hi. Ngolh dang laleh inna, ‘Israel ukmi ngam,’ tin nganin hi.
17 na khut sung a ngolh pa nih tei lek cu pehdun inna, ngolh pa khat bang tuk hi.
18 Na mihing ten a sullam a dot haw ten,
19 Cungnungbel Topa keimah in, Ephraim khut sung a, Josef i ngolh le Israel ngolh pa khat la tung a, Judah ngolh tuah koih langkhat tung, tin hilhin hi. Ngolh pa nih cu pa khatah bawl tung a, ka khut sungah sum tung hi.
20 “Ngolh pa nih cu na khut sungah sum inna mipi ten mu haw hen.
21 Cungnungbel Topa in, hi bangin hilh hi tin thanin hi. Ka mihingte cu a vahvaihnak miphun tampi sung pen puikik tung a, hulawm khawngin, a ngam hawah kik lehtik tung hi.
22 A ngamsung haw a, Israel mualhumah miphun pa khatin hulawm tung. Amuh uktu tukin kumpi pa khat nei haw tuk a, miphun pa nih hileh ngawltohin, uknak pa nih vang hileh haw tukma toh hi.
23 Ningdelhhuai milimte tuah nawngkai duncop haw tukma toh a, sualnak tuah nintik duncop haw tukma toh hi. Sualnak bawlin keimah a naunehnak haw hempoh pen luattik tung hi. Thiangthotik tung a, ka mihing hi in, a Pathian haw hi tuk toh ing.
24 Ka nadektu David kumpi bang kumpi cu a kumpi haw hi tuk hi. Uktu bawi pa khat nuai ah khawmdun khawng haw tuk a, ka daan cu komno zui haw tuk hi.Ref 37:24 Ezk 34:24;
25 Ka nadektu Jakob lak a, ka piakmi ngam, a pu le pa tei umnak ngamah um haw tuk hi. Mahlai ah kumkhua umin, a canote le a casuante vang kumkhua in um haw tuk hi. Ka nadektu David kumpi bangin kumkhua uk tuk hi.
26 Himdamno a um theihnak tukin amuhte tuah thutepnak bawl tung. Khotik tung a, pungzaitikin, a ngamsung haw le Biakinn a din leleng theihnak tukin ngaihsut sak tung.
27 Amuh tuah um tung a; keimah cu a Pathian haw hi tung, amuh vang ka mihing hi haw tuk hi.Ref 37:27 2Kor 6:16; Mang 21:3;
28 Amu lakah kumkhua um tukin ka Biakinn ka koih ten ka mihing hi tukin Israel mi ka ten cu miphun dang ten thei haw tuk,” ti hi.