10
Topa Sunloihnakin Biakinn Zamsan
1 Mah hangin ngamsa nung cherubim tei luhum a, khuhmi cu zo ing, a humlamah sapphire suang manpha tuah bawlmi kumpi khunnak bang pa khat mu ing.Ref 10:1 Ezk 1:26; Mang 4:2;
2 Pathian in puan padildelno silhtu lakah, “Ngamsa nung cherubim tei nuai a, um lengke tei laklawhah hawh inna, na khutdimin, meiling cawi in hi. Mah meiling cu khuapi humah thehin,” ti hi.Ref 10:2 Mang 8:5;
Zo ing a, a hawh lih laih cu mu ing.
3 Biakinn sung a tum ten cherubimte cu Biakinn hanglam mawkah ding haw; Biakinn sunglam khan cu meingo dim hi.
4 A al zawzokmi Topa i umnak al cu cherubim lak pen kaito in, Biakinn kongka lamah thawn hi. Biakinn sung cu meingo tuah dimin, a inntual cu al pempum hi.
5 Cherubim tei a hakhen haw thawm cu a pualeu lam inntual tiangin nging khawng hi. Ihempoh tithei Pathian aw bangin nging hi.
6 Topa in puan padildelno a silhtu pa cu cherubim tei nuai a um lengke tei laklawh pen mei alh la tuk a thupiak ten hawhin lengke pa khat elah ding hi.
7 Cherubim tei lak a, pa khatin, a el hawah ummi mei alh lamah a khutzaak phei in meiling khenkhat cu la hi, mah a lakmi meiling cu puan padildelno silhtu pa i khut sungah koih hi. Mahpa in meiling cu la in tul hi.
8 Mah cherubim ten a ha nuai ten hawah mihing khut bang nei haw tih mu ing.
9-10 Lengke cu a pa li bangten haw a, cherubim tei elah um tek haw tih mu ing. Lengkete cu suang manpha bangin al zawzokin, lengke pa khat sungah lengke dang pa khat a thuah bangin nei tek haw hi.Ref 10:9-13 Ezk 1:15-21;
11 Mah cherubim tei thawnten helkul ngawlin ilai lam hei ah thawn pepel thei haw hi. A hawh nuamnak haw munah hawh ten duaduam haw; nunglam hekkik kul ngawlin hawh langkhat thei haw hi.
12 A pumpi haw, a nunglam, a khut, a hate le lengkete vang mit nguakcang dim hi.Ref 10:12 Mang 4:8;
13 Hi lengkete cu a masabel ka muhnak lengkete tuah bangten pei vuvung haw hi.
14 Cherubim pa khatin, mai pa li ten nei haw hi. Masabel cu khuicang mai hi; pa nihnak cu mihing mai hi; pa thumnak cu kiosa mai hi, pa linak cu muvanlai mai hi.Ref 10:14 Ezk 1:10; Mang 4:7;
15 (Hi cherubim cu Khebar Ngunpi el a, ka muhmi ngamsa nungte leng haw hi) Cherubim cu huih lakah lengto in,
16 a thawn haw ten lengkete vang hawh bok haw hi. Leng tukin ha a phalh haw ten lengkete vang tel bok haw hi.
17 Mah cherubim cu a colh haw ten lengkete vang cawl bok haw; a len haw ten lengkete vang tel bok haw hi; itahim titale cherubim ten lengkete cu uk haw hi.
18 Mahten a al zawzokmi Topa i umnak cu Biakinn kongka pen tulin cherubim tei humah thawn hi.
19 Ka mitmuh cilcelin, a ha haw phalhin, lei pen lengto in, lengkete vang tel bok haw hi. Biakinn ni suahnak lam kongka ah cawl haw in, a al zawzokmi vaknak cu a hum hawah um hi.
20 Hi cherubim cu Khebar Ngunpi pen Israel i Pathian nuai ah ka muh zomi ngamsa nungte haw hi tih thei ing.
21 A venghawng mai pa li nei tek haw a; ha pa li ten le a ha haw nuai ah mihing khut bang pa khat ten nei haw hi.
22 A mai haw cu Khebar Ngunpi pen ka muhmi ngamsa nung tei mai bangkek hi. Cherubim cu mailamah cam zetin hawh tek haw hi.