EZEKIEL
Laibu
(The Book of Ezekiel)
Thulamsial
Ezekiel cu 586 BC kum Jerusalem a siat laih ngawl le a siat nung Babilon a um profet hi. A hilhmi thuthang cu Jerusalem a ummi a tang calam le Babilon a ummi Judah mitei ca in hi. Ezekiel laibu sungah thu bulphuh pa luk um:
(1) Pathian in profet tukin Ezekiel a samnak.
(2) A miphun bawlsiat a tawh hawnak tuk le amu ca in ngallin a kulnak thu le Jerusalem siatsuah a hihnak tuk thu.
(3) A mihingte a bawlsiatnak le thukhennak a hennak tuk thu.
(4) Jerusalem a siat nungten Israel lungmuannak le hehnemnak, mailam ca muansannak a ummi thu.
(5) Gog ca in lungsiatnak le siatlalnak a um tukmi hilhhamnak thu.
(6) Israel miphun le a biakinn haw tun dinleh tuk tihmi thu hi.
Ezekiel cu upnak khohzet neimi le thu ngaihsutnak a phunkim neitu hi. A thu theih ciangmi tampi cu muhnak a muhnak pen hi a hilhmi thu tampi cu sullam neizet sialsiahnak tuah cu phuang hi. Lungmu le ngaihsutnak thaktik a kul dan le kuakua hei hihen mai sualnak tek humah dehvo nei hung tih langtik hi. A miphun a nunnak haw thaklehtik tukin muansannak a neih thu vang phuang lang hi. Profet bek hi ngawlin thiampi vang a hih bang bokin Biakinn le thianthohnak lamah a thatuizettu hi.
1
Ezekiel In Pathian Amuh Masabelnak
Pathian Khunnak
1 Ka kum, kum sawm thumnak ha li ha, ni nga ni-in, keimah thiampi Ezekiel, Buzi i capa cu Babilon ngam Khebar Ngunpi elah sal matmi Judah mite tuah um ung. Van cu hongin, Pathian i lakmi mu ing.Ref 1:1 Mang 19:11;
2 Mah kum cu kumpi Jehoiakhin sal a mat haw a kum nganak hi.Ref 1:2 2Kum 24:10-16; 2Khang 36:9-10;
3 Babilon ngam Khebar Ngunpi el pen Topa in ka lakah a otmi za ing a, a huham vang thei ing.
4 Ka zo le saklam pen huihpi hung tih cu mu ing. Meingo sahzet sung pen khuaphelep zawzokin, a elkimte cu vak susul hi. Mah khuaphelep zawnah daal bangin a de mi mu ing.
5 Huihpi laizangah a nungmi ngamsa bang, mihing mel bang pa li mu ing a;Ref 1:5 Mang 4:6;
6 mai pa li le ha pa li nei tek haw hi.
7 A ke haw cam zetin, a tinte cu khuicang tin bang hi, de zetin nawtmi daal bang hi.
8 Mai pa li le ha pa li ten nei tek haw in, a ha haw nuai ah mihing khut pa khat ten nei haw; mahten pa khatin khut pa li ten nei haw hi.
9 Mah ngamsa pa khat tekin, a ha pa nih ten phalhin, kil li nei a tung le a vang cankimin, a ha lek cu tawngkhadun khawng haw hi. A thawn haw ten a taksa pum hel kul ngawlin a honpi in thawn haw hi.
10 Ngamsa nung pa khatin, mai phun dadang pa li ten nei haw hi. A mailam cu mihing mai, taklamah kiosa mai, veilamah khuicang mai nei in nunglamah muvanlai mai nei hi.Ref 1:10 Ezk 10:14; Mang 4:7;
11 Ngamsa nung pa khatin, a ha pa nih ten phalhin, mahten ngamsa dang tei ha lek tawngkha ten haw hi. A ha pa nih haw cu phalh ngawlin a taksa hum hawah khup haw hi.
12 Ngamsa nung pa khatin mun li ten hekin, mahten a pumpi haw hel lih kul ngawlin a nuamnak hawah a honpi in hawh thei haw hi.
13 Mah ngamsa nung tei lakah meiling vam bang a al zawzokmi umin, amah cu cawlngawlin thawn leleng hi. Mah meiling vam sung pen khuaphelep bangin a al zawzokmi tul hi.Ref 1:13 Mang 4:5;
14 Mah ngamsate cu khuaphelep bangin nunglam le mailamah manlangzet dawk haw hi.
15 Mah ngamsa pa li cu ka zoh lih laih takin ngamsa pa khat elah lengke pa khat ten, lengke pa li lei tawngkha in mu ing.Ref 1:15-21 Ezk 10:9-13;
16 Mah lengke pa li cu bangten haw hi; suang manpha bangin de haw a; mah lengke sungah lengke dang pa khat cam zetin, a tan zawngin, a tummi na um ten haw hi.
17 Mah hangin lengke cu a nuamnak hawah hel thei haw hi.
18 Lengke tei a mawk kual cu sah zetin mit ngeh dim hi.Ref 1:18 Mang 4:8;
19 Ngamsa nungte cu a thawn haw ten lengkete vang kaito bok haw hi.
20 Ngamsa nungte cu amu nuamnak tekah a hawh haw bangin lengkete vang hawh bok haw; itahim titale ngamsa ten a uk haw hangin hi.
21 Mah hangin ngamsa nungte a hawh haw ten hihen, a din haw ten hihen, huih lakah a kai haw ten hihen, lengkete vangin cung khawng bok haw hi.
22 Ngamsa tei lu humah a lamdang zetin, a ngomi humkhuh ngengzet um hi.Ref 1:22 Mang 4:6;
23 Mahmi nuai ah ngamsa nungte cu ding haw hi. A ha pa nih cu a ngualcam ngamsa tei lamah phalhin, a dang ha pa nihin, a taksa pum khuh haw hi.
24 A ha zah nging cu tuipi thum aw bang haw hi. Ngalkap sialcelh ngawl tei thawm bang hi a, Cungnungbel Pathian aw nging bang hi. A len ngawl ten a ha cu khup haw hi.Ref 1:24 Mang 1:15; 19:6;
25 Mahnaven a lu hum a ummi humkhuh pen thawmnging cu thang leleng hi.
26 Mah humkhuh kum humah suang manpha de tuah bawlmi kumpi khunnak bang um hi. Mah humah a khungtu cu mihing pianzia keng hi.Ref 1:26 Ezk 10:1; Mang 4:2-3;
27 Mah pianzia cu mei sungah a vakmi daal vam bang hi. A elkim hempoh cu vak zetin al hi.Ref 1:27 Ezk 8:2;
28 Uical bangin pianzia phunkim nei in, vaknak cu Topa i umnak langtiktu hi.