8
1 Micipte bekin na a piangmi i sullam thei haw hi. Cihnakin micip tei mitmai vaktikin, mitmai siate paitik khawng hi.
Kumpi Thu Ngai Un
2 Pathian mai ah thutepnak bawl thawthong pahsun, kumpi thupiakmi bangin bawlin hi.
3 Kumpi in ama nuam bangin bawl thei a hih ten, a mai pen manlangin tai in hi. A lungkim ngawl bawl kha pahsun.
4 Kumpi thu cu a sangbel a hih taktohin, a thupiaknak bangin um inna, kuamah in, a thu el thei haw tukma hi.
5 Ama thu na zui ten haksatnak pen luat tuk ci. Micipin ituk ten nadek tung a, iti bangin kaw ka deh tuk, tih theitum hi.
6 Na hempohin huncan a khawthu in, nei tek haw hi. A theih uhmi hi dem leita lawlawm thong!
7 Mailamah i cang tuk tih kuamah in thei haw ma. A hilh theitu tuk hei um haw ma hi.
8 Thihnak pen a luat thei kuamah um haw ngawl bangin, thih ni tuk, a theitu um haw ma. Mah ngal sung pen kuamah luat thei haw tukma.
Mipha le Mipha Ngawl
9 Vanhaang nuai a, na hempoh ka ngaihsut ten ka muhmi cu hi bangin hi! Mi khenkhat ten midang tei humah thunei haw a, mi khen khatte cu a thuaktu haw hi.
10 Mipha ngawl tei khanah, a vui haw mu ing. Mahnaven khan pen ka kiklam uhin, phat ngawlnak a bawlnak haw khuasung loli ah miten pahcawi het li haw hi. Hi hei hi phukthong poh hi.
11 Mipha ngawl tei hum a, dantatnak cu manlangin cawh a hih ngawl hangin sualnak cu ngalpha zetin bawl haw hi.
12 Misualin, thilpha ngawl cu vei za khat a bawl nung hei ten nung leng hi. Mahnaven Pathian a kihcatu tei ca in, amah a kihcak haw hangin, a dawltawpnak ten phaleh khawng tuk, tin thei ing.
13 Mahnaven mipha ngawl tei ca in, mahti bangin pha tukma hi; Pathian a kihcak haw ngawl hangin, a nunnak haw cu lim bang thong hi.
14 Leihumah phukthongmi thil pa khat um hi! Midik ten midik ngawl i thuak tuk thuakin, midik ngawlin midik i ngah tuk ngah hi. Hi hei sullam imah nei ma hi.
15 Mah hangin nopnak hi thilpha hi tin ti ing, itahim titale leihum mihing ca in, ei le in, le lungdam sangin, a pha saw mi imah umma. Vanhaang nuai Pathian piak mi hun comno a neih sungah hihi cu a nadeh haksa lak a, lungnoptiktu laksawng hi.
16 Cihnak nei tukin le leihumah a bawl haw mi, na hempoh hi, a sullam thei tukin a sun a zanin ngaisung ing.
17 Ihempoh hi Pathian i thu tuah piang khawng hi. Mihingin leihumah a piangmi nate hi imah thei zo tukma hi; itihzah takin, a zuam li hei in, thei suak zo cuang tukma hi. Micipin thei ing hi, a ti hei in, imah thei cuang tukma hi.