7
Topa i Miphunte
(Suah 34:11-16)
1 Moses in, “ Topa na Pathian uhin, na luah tuk uhmi ngamah hawhpih tuk a, hinnam tampi hawlvawk tuk hi. Noh ten mai na not dedeuh uhten nangmuh sangin a ngeng deuh le a ngil deuh hinnam salih, Hit mi, Girgash mi, Amor mi, Kanaan mi, Periz mi, Hiv mi, le Jebus mite cu hawlvawk tuk hi.Ref 7:1 Nung 13:19;
2 Topa na Pathian uhin, hi hinnam cu na khutsung uhah a piak ten le na neh uhten a venghawng that khawng un. Amuh tuah tang langkhat tukin thutepnak bawl pahsuh unna, hehpihnak hei nei pahsuh un hi.
3 Huai hei huaidun pahsuh unna, na ca uhte vang huaiduntik pahsuh un,
4 itahim titale na ca uhte cu Topa bia tuk ngawlin pui haw tuk a, pathian dadang biatik haw tuk hi. Mahti bangin na um uhten, Topa cu na hum uhah a thinuk tuk a, thakhatin nohte cu siatsuah tuk hi.
5 Hih hinnam tei lakah hi bangin bawl saw un, a biaklandawh siatsuah khawng un, a biaknak suangphut sukeh khawng un, a thingphut cek keh khawng unna, a milim haal khawng un.Ref 7:5 Daan 12:3;
6 Itahim titale nohte cu Topa na Pathian uh i mihing hinnam thiangte hi uh ci. Lei hum mi hempoh lak pen ama mihing hi tukin nohte cu teng zo hi.Ref 7:6 Suah 19:5; Daan 4:20; 14:2; 26:18; Tit 2:14; 1Pet 2:9;
7 Midang sangin na tam saw deuh uh hangin Topa in deihin, a tenmi hi ma uh ci; thungai in titale leihumah hinnam neubel hi uh ci.
8 Mahnaven Topa in it in, na pu le pa tei lakah thutepnak a bawlmi kim tuk a deih hangin hi. Mah hangin a baantha ngil tuah na nun uh panin, Izipt kumpi khutnuai sal na tannak uh pen suakcatik hi.
9 Topa na Pathian uh cu Pathian tatak hi a, amah a ittu le a thupiakmi a zuitu hempoh tei humah san thawng khat tian a catngawlmi itnak langtik tuk hi.Ref 7:9-10 Suah 20:5-6; 34:6-7; Mipum 14:18; Daan 5:9-10;
10 Mahnaven a dodaltu le a huatu humah manlang zetin bawlsiatnak le siatnak hengtik tukin a cuamduang hihim tukma hi.
11 Mah hangin na zilmi hempoh cu zui un, tuni ka zilhmi daan hempoh cu zui khawng un hi.
Thungaitu Muicu
(Daan 28:1-14)
12 Hi thupiakmi cu ngai a, komno in, na zui uh tale na pu le pa tei lakah thu a tep bangin Topa na Pathian uhin, a thutep khotikin, a kho mi a itnak cu na hum uhah langtik tuk hi.Ref 7:12-16 Daan 11:13-17;
13 Pungzai in canau tampi na neih theihnak tukin nohte cu it in, na lo uhah hei muicu pia tuk hi; khui le tuu tampi muicu pia tuk hi. Na co tuk uh na pu le pa tei lakah thu a tepmi ngam sungah na um uhten hi muicu cu pia tuk hi.
14 Nangmuh bangin muicu cangkim a cotu, hi leihumah kuamah um haw tukma hi. Nangmu lakah kuamah ca nei thei ngawl le micing um tukma uh ci.
15 Natnak hempoh sung pen Topa in hup tuk hi. Izipt ngam a, na tawh zo uhmi natsiate cu na hum uhah hengtik tukma hi; mahnaven na ngal tei humah hengtik khawng tuk hi.
16 Topa na Pathian uhin, na khut sung uhah a koihmi hinnam hempoh cu siatsuah khawng unna, hehpih pahsuh un. A pathian bia pahsuh un, na bia uh tale bolal tuk uh ci.
17 “Nangmu sungah hi hinnam hi eimuh sangin tam saw ngangai haw si, itin kaw a hawlvawk theih tuk uh, tin son pahsuh un.
18 Amuhte cu lau hihim pahsuh un; Topa na Pathian uhin, Izipt kumpi le a mihing tei humah a bawlmi nate ngaisung saw un.
19 A hum hawah a hengmi, na mit uh tuah na muh cikcek uhmi lauhuai natsia thasiahhuai le nalamdangte, Topa na Pathian uhin, a baantha ngil le a huham lamdangzet tuah a suahcaktik khi ngaisung un. Izipt mite a siatsuah khawng bang lengin hi hinnam, na lauzet uhte hi siatsuah khawng bok tuk hi.
20 Khuai-ngal hang bangin lauthawngnak le mullinghahte a hum hawah hengtikin, a khen khekmi le a ngelh mite cawmin, siatsuah khawng tuk hi.
21 Mah hangin hi mite cu lau pahsuh un; Topa na Pathian uh cu na lak uhah um hi; Amah cu thawmngengmi Pathian hi, amah cu lau saw tukmi hi.
22 Mailam na not dedeuh uhten hi mite cu dem hehetno in hawlvawk tuk hi, mahnaven thakhat thu in that khawngvut thei tukma uh ci. Na that khawng vut uh tale ngamsate pungzai menmun haw tuk a, nangmu ca in lauhuai lelei tuk hi.
23 Topa in, na ngal uhte cu na khut sung uhah koih tuk a, siatsuah khawng a hih haw laklawh lauthawngin umtik leleng tuk hi.
24 A kumpi na khut sung uhah koih tuk hi, that tuk uh ci, mahten a min haw cu pailalta tuk hi. A kham theitu tuk um tukma hi, a venghawng haw in cimittik khawng tuk uh ci.
25 A milim haal khawng un hi, mah milim humah sui le ngunte vang hawza pahsuh unna, a la hei la kha pahsuh un. Na la uh tale nangmuh awk kha tuk hi. Itahim titale milim bia cu Topa i huatbelmi hi.
26 Hi milimte cu na innsung uhah hen pahsuh un, na hengtik uh tale tamsiatmi a hih haw bangin na hum uhah tamsiatnak heng tuk hi. Hi milimte cu na huat tuk uhmi le na ningdelh tuk uhmi hi; itahim titale Topa i tamsiatmi hi.”