26
Anthak Piaknakte
1 “ Topa na Pathian uhin, a piakmi ngam luahtumin, na um nung uhten,
2 na neih uhmi anthak hempoh cu bawm sungah khum unna, na Pathian biaknak munah hunpih un hi.Ref 26:2 Suah 23:19;
3 A nadektu thiampi lakah hawh unna, ‘A pu le pa tei lakah pia tukin a tepzomi hi ngamah heng zo ing hi, tih langtiknakin, hi thil cu Topa ka Pathian lakah pia ing hi,’ tin tituk hi.
4 “Thiampi in cawi tuk a, Topa na Pathian i biaklandawh maiah in koih un hi.
5 Topa na Pathian mai ah nangin, ‘Ka pa cu Aram mi hi a, inn hei nei ngawl mi vakvai hi. Izipt ngam a hawh laihin, a innkua cu mi demno bek hi haw hi. Mahnaven Izipt ngam sungah mi tamzet le huham neizetah suak haw hi.
6 Izipt miten siatsuahin salah bawlin, nadeh haksa dektik haw hi.
7 Topa, ka pu le pa tei Pathian nelah au in, ka au mi aw uh cu za hi; ka thuaknak uh, ka haksatnak uh le ka cimnak uhte mu hi.
8 Mah hangin a huham le a ngilnak tuah na lamdang, thasiahhuai nate le mulcang suak hah nate bawlin Izipt ngam pen tul hi.
9 Hi ngamah henpihin ngampha le ngamnop, khuinawi le khuaihum luannak ngam pia hi.
10 Mah hangin amah Topa i piakmi anthak cu Topa i lakah pia ing,’ tin maizahnak tuah tituk ci.”
“ Topa na Pathian mai ah na bawm cu nga inna, Topa cu lu kunin bia in hi.
11 Topa na Pathian in, muicu a phunkim a piak hangin na innkua, Levi mite le nangmu lak a, um ngamdang mite tuah lungdam thatuino in um tuk uh ci.”
12 “Kum thumnakin, na an neih hempoh pen seh sawm seh khat cu Levi mi, ngamdangmi, nu le pa nei ngawl ca-ngah le meivong pia un hi. A kul zah haw in, eih tuk nei haw tuk hi. Mahti bangin na bawl celh uhten,Ref 26:12 Daan 14:28-29;
13 Topa i lakah, ‘seh sawm seh khat cu ka innah imah tangleh tuk ngawltohin; Levi mi, ngamdangmi, nu le pa nei ngawl ca-ngah le meivong tei lakah thu na piak bangin bawl khawng zo toh ing, phawhngilh mi nei mang, zammi vang nei mang hi.
14 Mithi ngai in ka umlaih hei in, seh sawm seh khat sung pen ka eihmi umma hi; mithiang ngawl ka hih laihin ka inn pen mun dangah ka thiakmi le mithi ka siahmi hei umma hi. Topa aw, na thu ngai in, na thupiakmi cu bawl khawng zo ing.
15 Vancung na umnak mun thiangtho pen Israel na mihingte cu muicu pia inna, ka pi le pu tei lak a, na tepmi bangin ngampha le ngamnop hi muicu hu pia zalin hi,’ tin ti un hi.”
Topa i Miphun
16 “Tuni in Topa na Pathian in, a piakmi daan hempoh zuitik hi. Na lungmu uh le na nunnak uh venghawng tuah pomin zui un.
17 Tuni in Topa cu na Pathian uhin teng zo uh ci. A thu ngai tuk, a daan le a thukham zui tukin tiamdun zo uh ci.
18 A tepsa zo bangin tuni in, Topa in ama mihing tatak hi tukin pomin, a daan hempoh zuitik hi.Ref 26:18 Suah 19:5; Daan 4:20; 7:6; 14:2; Tit 2:14; 1Pet 2:9;
19 Leihum pen a semsuahmi miphun hempoh sung pen miphun dang sangin ngeng saw in bawl tuk hi. A tepsa bangin nohte cu ama miphun thiangtho hi tuk uh ci a, ama min cu thangphatin pahcawi un,” ti hi.