11
Topa i Thawmngengnak
1 “ Topa na Pathian uh cu it unna, a thukham, a daan le a thupiakmi hempoh cu zui un.
2 iti bang Pathian him tih cu na nunnak uhin, na teh zo uhmi cu komno in cing leleng un. Mahtibang a teptu cu na ca uhte hi haw ma hi, nangmuh hi uh ci. Topa i thawmngennak, a baantha ngilnak le a huham cu mu zo uh ci;
3 Na lamdang a bawlmi le Izipt kumpi le a ngam buppi hum a, bawlmi nate mu zo uh ci.Ref 11:3 Suah 7:8-12:13;
4 Izipt ngalkap ten nangmuh a hil haw laihin, Topa in, a cipuh le a cipuhleng haw tuah Tuipi San sungah nimtik khawng hi tih cu mu uh ci.Ref 11:4 Suah 14:28;
5 Hilai na hen uh laih ngawlin, Topa in phillawnah na lak uhah iti bang nate bawl him tihvang mu uh ci.
6 Reuben hinnam Eliab i capa Dathan le Abiram humah Topa in itin bawl him tihvang ngaisung un. A nuai haw a, lei cu khi in, a innkua hawng le a puanbuk, a umlawh le a ngam haw tuah thon khawng hi.Ref 11:6 Mipum 16:31-32;
7 Hi zuh hi, Topa i bawlmi nalamdang a mutu cu nangmuh uh ci.
Tepmi Ngam Muicute
8 “Tu ni a, ka piakmi thukham hempoh cu zui un hi. Mah bek ten na tumnak tuk uh ngamah tumin luah thei tuk uh ci.
9 Topa in, na pi le pu uhte le a casuan tei lakah piak tukin a tepmi ngam, ngampha le ngamnopah khansau in nung tuk uh ci.
10 Atu-in, na luah tuk uhmi ngam cu masa laih a, na umnak uh Izipt ngam bang kha ma hi. Mahlai munah anci na cin uhten na lo uhah tui cu hak zetin la uh ci;
11 mahnaven tu a, na luah tuk uhmi ngam cu mual le luam umnak mun hi a, van nguahtui ngahnak ngam hi.
12 Topa na Pathian uhin hi ngam cu zo in kum tuanin cing hi.
13 Mah a hih hangin tuni ka piakmi thukham hempoh hi zui un, Topa na Pathian cu na lungmu uh venghawng tuah it unna, a nadek un hi.Ref 11:13-17 Thiam 26:3-5; Daan 7:12-16; 28:1-4;
14 Mahti bangin, na bawl uh tale, Topa in, na ngam uh i kulmi cuk nguah, khal nguah, a hunno in zutik tuk a, an le sabit le olif situi hau in,
15 na ngan tei eih tukin hampa vang um tuk hi. Na von uh vah tuk hi.
16 Topa i lak pen pialin pathian dadang tei zolnakah kuamah in nohte pui sual haw pahsuh hen.
17 Mahti bangin lampi dang na zui uh tale Topa cu na hum uhah a thinuk tatak tuk hi; van nguahtui kangtikin, na leingam uh pen an suak tukma hi. Topa in, a piak tukmi ngampha pen pailal vut tuk uh ci.
18 “Ka thupiakmi cu na lungmu sungah khum un. Na baan uhah kencih unna, nangmuh khanglotiktu tukin na cal uh hei ah belh un.Ref 11:18-20 Daan 6:6-9;
19 Na cano tei lakah zilh un. Inn na um uh hei ten hihen, lam na hawh thah uhten hei hihen, hilh un; na colhnak uh le na nadehnak uhah hei in phuang un.
20 Na kongka hum uhah le na kongbiang humah ngan un.
21 Mahti bangin, na bawl uh tale Topa na Pathian uhin, na pu le na pa uh lakah piak tukin a tepmi ngam sungah nangmuh le na ca uhte cu ngeipi nung tuk uh ci. Lei le van a um sung cu nohte vang mahlaiah um leleng tuk uh ci.
22 Ka thupiakmi hempoh hi komno in zui un; Topa na Pathian uh cu it un, a thupiakmi bangin bawl unna, ama muantak tukin um un.
23 mailamah na not uhten hi minam cu amah in hawlvawk tuk a, nangmuh sangin a ngeng saw deuh le a ngil saw deuh tei ngam cu luah thei tuk uh ci.
24 Na pal uhmi lei ngam hempoh cu nangmuta hi khawng tuk hi, na ngam uh cu hanglamah phillawn tian, saklam pen Lebanon mual tian, nisuahnak lam pen Eufrates ngun tian, ni tumnak lam pen Mediterranean tuipi tian hi tuk hi.Ref 11:24-25 Josh 3:1-5;
25 Kuamah in kham thei haw tukma hi. Mahlai ngam a, na hawhnak hempoh uhah, a tepsa bangin Topa na Pathian uh i thil tihtheihnak hangin mi hempoh lau haw tuk hi.
26 “Ngai hem un! Tuni in, na ten tuk uh muicu le tamsiatnak na mai uhah koih ing.
27 Topa na Pathian uh i thukham, tuni ka piakmi hi na zui uh tale muicu dong tuk uh ci.
28 Mahnaven hi thukham cu zui ngawlin na theih awng uh ngawlmi pathian dang tei lakah bia tukin na hawh uh tale tamsiatnak tawk tuk uh ci.
29 Na luah tuk uhmi ngamah Topa in, a henpih ten Gerizim Mual pen muicu aupihin, Ebal Mual pen tamsiatnak cu tangau tuk uh ci.Ref 11:29 Daan 27:11-14; Joshua 8:33-35;
30 Hi mual pa nih cu Jordan ngun kuam sung um, Kanaan mitei umnak Jordan ngun pen ni tumnak lamah um hi. Ni tumnak lam deuhah um haw a, Gilgal khua el Moreh sasua thing elah um haw hi.
31 Topa na Pathian uh i piakmi ngam luah tukin Jordan ngun cu kaltan tuk toh uh ci. Ngam la in, na luahtum uhten,
32 tusunin ka piakmi daan hi komzetno in zui un hi.”