5
1 Ohtei umnak hi leihum thi le sa pumpi hi a siat khawng hei in, Pathian in vancungah eimu umnak tuk a sakmi, kumkhua a sia thei ngawlmi inn, eimu ca in koih hi tih cu thei hung hi.
2 Atu-in cawl mahtakin huisa li hung. Vancung a inn uh tuah thuamleh tih a hazawl uh hangin mahtih bangin huisa in, a umnak uh hi.
3 Mahti bangin vancung thuam silhtik a hih uh hun ten thacangin um tukma hung hi.
4 Hi lei puanbuk sungah a um sung uhin a nun uh cimin tauli hung hi. Mahti bangin a taulihnak uh cu lei puanbuk hi vawk nuam a hih uh hangin hi ma hi; mahnaven, a nun uh hi, vancung thuam silhtikmi hi le hung mahten a thi theimi nunnak cu a thi thei ngawlmi in thek khawng le hung tih a nuamnak uh hangin hi saw hi.
5 Hitih bang thekdunnak tuk ca tuangtim saktu cu Pathian hi. Mahten eimu ca khawlsa in, a koihmi, hempoh amahkhannak in ama Hawvang pia hi.
6 Mah hangin lungmu khohkhah zetin um leleng hung hi. Leihum tisa tuah thinnopin, a um sung uh cu Topa i inn tuah khawla hung hi tih thei hung.
7 Kohte cu upnak tuah nung ung. Muhnak tuah nungma ung hi.
8 A lungmu uh khoh, a ngal uh pha in mai nuamnak bangin a cangthei ahin hi leihum taksa, a inn uh hi zamta in Topa i innah amah tuah um langkhat teng saw tuk hung hi.
9 Mah a hih hangin leihum a inn uhah a um uh hei ten hihen, ilai banglai innah a um uh hei in, ihempoh sangin amah a lungdamtik tuk uh khi thupibel hi.
10 Itahim titale thukhen tukin a venghawng uhin Khrih mai ah dingleh tuk hung hi. Kuakua hei a pha hihen a sia hihen a nun sung a bawlmi bangkekin ngahleh tuk hi.Ref 5:10 Rom 14:10;
Khrih Sung Pen Pathian Tuah Lemdunnak
11 Pathian kihca tihmi a sullam i him tih ka theih uh hangin midangte vang zawm pepel ung hi. Pathian in, a lungmu uh thei khawng pilpial hi. Mahti bangin nangmuh ten na lungmu uhin keimah thei khawng bok tuk uh ci, tin muansanak nei ing.
12 Nangmu lakah ka phatnak uh langtikleh nuam hi kha ngawlin, keimuh hangin maiphatnak na co theihnak tuk uhin, hun pha nangmu lakah piak tukmi hi ka zuam uhmi na hi saw hi. Mahti bangin mi khenkhat, sunglam ziaza zo ngawlin a pualam muh theihmi thu ah a tuangkhawng thei mite khi a thu haw don thei tuk uh ci.
13 Misil hi ung maw? Ka hi uh hei in Pathian hangin hi. Micip hi ung maw?
14 Ka hi uh tale nangmuh hangin hi. Mi pa khat cu mi hempoh tei ai-in thi hi. Mahmi a thihnak sungah kua hempoh telin kawm bok hung hi tih theih ngah nungten Khrih i itnakin uk hi.
15 Khrih cu mi hempoh ca a thih hangin a kuakua hei hihen mai bul ca bekin nuntuk hi lehma toh hi, amuh hangin thi in, a nunglehmi pa i ca in nung tuk na hi saw haw hi.
16 Atu-in mihing hihnak zo in kuamah in thuson lehma toh hung hi. Hun kha khatah Khrih cu mihing hihnak zo in, a thu son nave ung, atu-in sonleh ma toh ung hi.
17 A kuakua hei hihen Khrih tuah pehzomdun tale semsuah thakmi hi; a nunlun cu bo in siam thakmi hi zo hi.
18 Hi hempoh hi Pathian i bawlmi ngeh hi; A ngal ahi awngmi ohte cu Khrih hangin Pathian in lemdunnak bawlin midang vang a lemdun bok tukin a zawmtu tukin dehvo pia hi.
19 Ka phuan uhmi thu cu; Khrih i hangin leihummi hempoh cu Pathian in, a lemdun lehnak bawl zo toh tihmi hi. Pathian in, a sual haw khumnak cazin koih lehma toh hi; mah ten a ngualcamin, a cannak haw thuthang hilhtu tukin keimuh nadeh tuk pia hi.
20 Mah hangin kohte cu Khrih i palai ung hi: Pathian amah loli in keimuh mangin thu a hilh bangin thuhilh ung. Khrih minin nangmuhte zawm ung hi. Pathian tuah lemdun unna, a ngal hihnak pen a ngualcamin cang zal un. Khrih cu sualnak imah nei ma hi;
21 Khrih i hangin Pathian i dikcangnak kawm thei bok tukin, Pathian in eimuh tei sualnak hangin, sualnak a nei vingviang ngawlmi Khrih cu misualah cangtik hi.