12
Paul i Muhnak le Mangmuhnakte
1 Nemcuamnak imah a um ngawl vangin ka tuangkhawn kul hi. Mahnaven atu-in, Topa i piakmi muhnak thu le mangmuhte hilh tung hi.
2 Nunglam kum sawm le kum li laihin ka theihmi Khristian mipa, pa khat cu van i thuah thumnakah cawito haw hi. (A tak pum ngangai maw, muhnak a ngahmi hi maw, thei mang; Pathian bekin thei.)
3-4 Not lehleu hih tung; hi mipa cu Paradis ah cawi toh hi, tin thei ing. (Ka tihsa bangin, a taksa in cang ngangai maw, muhnak pen a ngahmi maw, thei mang hi. Pathian bekin thei hi.) Mahlai ah mahpa in, kam hei son theih ngawlmi le mihing tei son tuk thiang ngawlmi thu za hi.
5 Mah hangin hi pa i thu ah tuangkhawng tung; ka thanemnak langtik tuk tih sial ngawl cu keima thu ah tuangkhawng tuk mang hi.
6 Ka tuangkhawng ngangai ahi vangin misil cu hi sap tuk mang hi, itahim titale thutak ka hilh tuk hangin hi. Mahnaven tuangkhawng tuk mang, itahim titale ka bawlmi a mutu le ka otmi a zatu ten ka hihnak tatak a theih haw mi sangin sang saw deuhin, a zoh khak haw tuk awi mang.
7 Mahnaven nalamdang tampi ka muh hangin ultunnak tuah ka pualthau ngawlnak tukin le satan palai bangin ka pualthau ngawlnak tukin a vattu tukin ka sungah ling pia hi.
8 Vei thum tian Topa i lakah thungen ing a, hi natnak hi vawksak tukin ngen ing.
9 Mahnaven donlehin; “Ka hehpihnak cu nangma ca in tawk hi; itahim titale na thanem ten kei cu ka ngilnakbel,” ti hi. Mah hangin Khrih i huham le humhimnak cu keima lakah a umnak tukin ka thanemnakah vangin mitmai nei in lungdamzet ing.
10 Jesuh Khrih i hangin ka thanem ten hihen, zotsak nautatnak, vancaukapin umnak, bawlsiatnak le haksatnakah hihen thinkim zetin um thei zo ing. Itahim titale ka tha a nem ten ka lungdamin ngilcang sesem ing.
Paul In Korin Pawlpi Tei Ca A Ngaihsutnak
11 Noh ten misil nundan bangin nung tukin na bawl uh hangin a sil bangin um ing! Ka humah lungkimnak a langtiktu tuk hi uh ci. Imah ngawl ka hi vangin, “Tiikmi cuangcungte,” tuah demno hei niam cuang mang hi.
12 Thinsaunak tuah nangmuh tei lakah thasiahhuai le nalamdang tampi bawl ing a, mahmi in nungzuitu tatak ka hihnak cu langtik hi.
13 Pawlpi dangte sangin iti bangin kaw a sia saw cuangin ka bawl? Tangka bopnak ngenin, ka nawngkaitik ngawl bek hi poh ma maw? A man ngawlin ka umnakte ah ngaidam zal un hi.
14 Atu-in nangmu lakah zintuk ka tum hi, a vei thumnak hi. Imah ngen tuk mang hi. Ka deihmi cu na sum le pai uh kha ma hi, ka deihmi ngangai cu nangmuh hi uh ci. Thungai in ti ahin ca ten a nu le pa cu cawm tuk hi cuang sapma hi; nu le pa ten cate cu a cawm haw tukmi saw hi.
15 Nangmuh ka bopnakah ka neihmi hempoh le ka pumpi hi mang khawng nuam ing. Hitih bangin ka ihzet hangin lem ngawlin um saw lam nave ni uh cim maw?
16 Nangmu ca vanngit hi kha mang tih cu nangmuh vangin mahngai ti leng tuk uh ci. Mahnaven mi khenkhat ten mi depde hi, zolnak thangin eimuh awk tin ti uh ci.
17 Mahmi cu iti bangin hi thei kam ni? Nangmu lak a, palai ka hahmite khi zolnak tuah a met zeinuamin, ka manmi hi haw a maw?
18 Titas hei cu nangmu lakah hawh tuk ngen ing a, hawhpih tukin Khristian u naupih uh pa khat vang hah bok ing. Mah cu Titas in ama ca amet zeinakin ohte mang tin tituk uh cim? Amah le kei cu lungmu pa khat nei in, nadek langkhat ung a, ka nunzia uh vang bangve saw ma maw?
19 Nangmu mai ah keimuh le keimuh hupdun cop li hengin ngaisung kha tuk uh ci. Mah kha ma hi! Pathian i mitmuhah Khrih in ottik a nuammi khi awn ung. Ka itmi u le naute aw, ihempoh ka bawl uhmi hi nangmuh bopnak tuah ngehin ka bawl uhmi haw hi.
20 Mahnaven nangmu lak ka hen ten mahti bang um haw le pha tin ka thuduhsammi bangin na hileh uh ma pang ahin tih hi lau em ing a, keimah vang mah tin hileh tin na deih sak uhmi ka hileh ma ahin tihvang cu lauzet bok ing. Nangmu lakah hauhdunnak, iksiknak, thincomnak, mai matan bek ngaihsutnak, zotsaknak le sonsiat dunnak, pualthaunak le buai cecunakte tawk kha kawn ing, tih hi lauzet ing.
21 Nangmu lakah ka henleh ten ka Pathian in nangmu mitmuhah zahcak tawkin bawl kawn tih lauzet ing; mah tin nunglam hun laih a, sualnak a bawltute thil nawngkai a phunkim, tisa nuamnak le nupa sualnak a bawl haw mi sihkiknak a neih haw ngawl hangin kap kha kawn ing tih hi lauzet ing.