KORIN
Khristian Tei Lakah Paul i Laikuat Vei Nihnak
(Paul’s Second Letter to the Corinthians)
Thulamsial
Korin Khristian tei lakah Paul i laikuat vei nihnak hi Paul le Korin khua Pawlpi laklawhah pehdunnak a haksa laih takin ngatmi hi. Pawlpi sung pen mi khenkhat ten nase zetin Paul khi do haw hi. Mahnaven lemdunleh theihnak tuk a deih zia langtikin, a lemdun theih haw ten a lungdam zia thu hilh hi.
A laikuat patnak lamah Paul in Korin Pawlpite tuah a pehzomdunnak haw thu khi hilhin, ita a zotsak haw ten nase zetin liatleh bok hum tih khi hilhciang hi. Mahmi in sihkiknak le lemdunnak tulpihin, mahmi hangin a lungdamnak vang hilh hi. Mah nungten Judah ngamah a umtu tei ca in, lungmu tak tuah a bop bok haw tukin pawlpi humah hehpihnak ngen hi. A dawlbelnakin Korin pawlpi sung a um mi dawmlaihno ten amuh khi nungzuitu tatak ung, Paul cu nungzuitu man ngawl, a hawh sual pa hi tin, a tih haw cu elin, Paul i nungzuitu tatak a hihnak khi langtik hi.
1
1 Khrih Jesuh nungzuitu, Pathian i lungkimin tenmi, keimah Paul le a unau pih uh Timote in Korin Khua ummi Pathian i pawlpite le Akhaia ngamsung a khua hempoh ah a ummi Pathian i pawlpi hempoh na venghawng uh lakah laikuat ung hi.Ref 1:1 Nung 18:1;
2 A Pa uh Pathian le Topa Jesuh Khrih hehpihnak le lemdaihnak cu nangmu humah um zal tahen.
Pathian Lakah Paul In Lungdam San
3 A Topa uh Jesuh Khrih i Pa le a Pathian, mi hehpihtu a Pa uh, ihempoh pen bopnak a piatu Pathian cu pahcawi nung hi.
4 Haksatnak nam tampi lak pen a co uhmi bopnak cu mangin, haksat vansannak a phunkim a tawkte bawm thei bok hung hi.
5 Iti bangin him titale Khrih thuaknak a phunkim sungah a tel bok uh bangin Pathian i bopnak sung hei ah Khrih hangin tel bok hung hi.
6 Haksatnak ka tawh uhmi cu nangmuh tei upnak tuk le nunpatnak tukin hi. Kohten bopnak ka ngah uh tale haksatnak ka thuak uhmi cu thinsaunak tuah nangmuh vangin na thuak theihnak tukin bopnak le thazaang ngahtu hi bok uh ci.
7 Mahti bang a hih hangin nangmuh tei humah muansannak ka neih uhmi cu lalthong awng ma hi. Itahim titale keimu thuaknak sungah a teltu na hih uh bangin bopnak ka co uhmi ah hei in teltu hi bok uh ci, tih thei ung hi.
8 U le naute aw, Asia ngam pen haksat ka thuak uhmi theitik nuam ung hi. Ka hum uh a, ka puak uhmi thil cu a ngengzet bek sial ngawlin a ngit leita hangin nung tuk hei in ngaisungleh ma zo ung.Ref 1:8 1Kor 15:32;
9 A thi tukin sonsa mi ung hi, tin ngaisung ung hi. Mahnaven hitih bangin thu a um cu keimuh le muh muangdun ngawlin thihnak pen a tholehtik tu Pathian ka muannak tuk uhin na hi saw hi.
10 Mahtibang a lauhuai thihnak sung pen pan suakin mailamah vangin pan suak tuk hi. Thungetnak tuah na bop uh hangin,
11 Pathian humah muannak nei ung hi. Mahten keimu ca na thungetnak uhte cu Pathian in sangin, thupha pia tuk hi. Mahten keima ai-in mi tampi ten Pathian nelah lungdam thu son haw tuk hi.
Paul In A Hawhnak Tuk Khel
12 Ka tuangkhawn pihzet uhmi pa khat um; mahmi cu ikaw titale: hi leihum a nundan uh le a cuangin, nangmuh tuah a pehzop dunnak uh hi, mihing cihnak i ukmi hi ngawlin Pathian hehpihnak huhamin uk hi. Amah Pathian i piakmi awn taituang le lungmu ngai tuah a nunzia uh cu a lungmu uh sia le pha deidan thiamnakin, a theihpihmi hi.
13 Nohtei lakah lai ka ngat ten na sial theih uhmi le na theih zawh tuk uhmi bek ngan ing. Atu-in kohte na theihnak uh cu cangkim ma laih hi, mahnaven cangkim zetin theileh tuk uh ci tih muan sannak cu nei ung;
14 mahtih bangin Topa Jesuh i Ni ten keimuh hi na tuangkhawnnak uh hi tuk ung a, nangmuh vang keimuh tei tuangkhawnnak hi tuk uh ci.
15 Hi thu hi ka theih cangcianzet hangin vei nih thupha co haw hen tin, a masa in nangmu lakah zintuk tum ing.
16 Ka tuptahmi cu Macedonia ah ka zin ten hawh thah nangin, ka kihleh lam ten palthahleh tum ing. Judah ngam ka hen theihnak tuk bopnak vang pia thei tuk uh ci tin ngaihsutnak nei ing.Ref 1:16 Nung 19:21;
17 Hitih bang tuptahnak ka neih ten nangmu lak pen lungmu nei ngawlmi bang ing maw? Khual ka zinnak tuk ka ngaihsut ten mai matan bek ngaisungin, “Mah ngai, mah ngai hi,” a tih nungten, “Mah ma, mah ma” tin thu a hengtik lehcettu ing maw?
18 Pathian cu thutak phuangtu a hih bangin nangmu lakah ka thutepmi cu “Mah hi,” tih le “Mahma mi,” tih cemcih ma hi.
19 Itahim titale nangmu lakah Silas, Timote le keimah in ka phuan uhmi Pathian Capa Jesuh Khrih cu “Mah hi,” tih le “Mahma,” tih cemcih ma hi. Pathian i mah hi ti in, a lungkimmi Capa hi.Ref 1:19 Nung 18:5;
20 Mah hangin Jesuh Khrih thawmin Pathian sunloihnakah, “Amen” tin a tih uh meknak hi. Itahim titale Jesuh Khrih cu Pathian thutiammi hempoh tei lakah, “Mahzuh hi,” tihmi khi hi.
21 Keimuh hihen, nangmuh hihen, munkhatin Khrih tuah pumkhat hung hi, tih a theiciangtiktu cu Pathian amah hi. Pathian in ama bulta hi tukin khenkhuai zo hi.
22 Ama bulta a hihnak uh cu eimu humah melciknak koih zo in, eimu ca koihsa in, a ummi hempoh ngah tuk tih amahkhannak in, a lungmu uhah Hawvang Thiangtho pia zo hi.
23 Pathian min salin hithu theihpihtu ing. Ka lungmu theitu cu amah hi. Korin khua hawh tuk ngawlin ka soncatnak cu nangmu ca ka ngaihsutnak hangin hi.
24 Na upnak tuk uh thu pen hi tin, muang unna, hi cu muang pahsuh un tin thuneih tum ma ung. Na upnak uhah khohzet uh ci tih cu thei ung hi. Nangmuh tei lungdamnak tukin nadek langkhat saw hung hi.