14
Hawvang Laksawng Dangte
1 Na muibatbel tuk uhmi cu itnak hi. Mahnaven hawvang laksawng dangte vang na tuptah tuk uh um bok hi. Mah tei lak pen na deihbel tuk uhmi cu Pathian thuhilh thiamnak laksawng hi.
2 Awn phundangin, a awntu cu mihing tei lakah awn hi ma hi. Pathian nelah awn hi. Itahim titale a otmi kuamah in theihsak haw ma hi. Hawvang awnin kuamah i theih ngawlmi thutak thu-ip awn hi.
3 Mahnaven Pathian thu a hilhtu in mihing lakah awn hi, mahten mi bawmtu in suak a, thapiaknak le hehnemnak ngah haw hi.
4 Awn phundang tuah a awntu in amah le mah bek bawmdun cop hi. Mahnaven profet bangin thu a hilhtu in pawlpi venghawngin khangtotik hi.
5 Na venghawng uhin awn phundang tuah na awn uh tale lungdam tung, mahnaven Pathian thu hilhthiamnak laksawng na ngah uh tale lungdamzet saw tung hi. A awn haw mi a hilhciang theitu umin, pawlpi sungah a bop tih sial ngawl awn phundang tuah a awntu sangin Pathian thu a hilhthiamtu cu sunglawi saw ngangai hi.
6 Mah hangin u le naute aw, nohtei lakah ka hen ten awn phundangin ka awn ahin, nohtei ca in nemcuamnak i poh um ni maw? Nemcuam tukma hi. Pathian lak pen thuphuanmi maw, ahimata theihnak pa kha khat maw, ahimata thuhilhnak maw, ahimata zilhnak pa kha khat maw ka keng thei ma tale nohtei ca in ka nemcuamnak um tukma hi.
7 Nunnak nei ma naven a aw nging thei awnmawi ngawsem, tingtang hihen, ngaisung teh un. A tum haw mi aw ciang zetin, a tul ma tale, akua in, a tum haw mi nging ihim tih a zak haw tuk?
8 Ngaldo man toh ung tihnak pengkul tumtu pa in, a pengkul ciangno in, a tum ma tale akua kaw ngaldo tuk a mansa in, a um thei tuk?
9 Mahti bang bokin awn phundang na ot uhmi cu imah a ciangmi a umma tale, akua in thei tuk him? Na ot uhmi cu huih lakah paithong tuk hi.
10 Leihumah awn phundang tampi um, mahnaven sullam nei ngawl awn pa khatno hei umma hi.
11 A otmi ikaw tih ka theithei ma tale mah bangin a awntu cu kei ca in awn theih ngawl mikhual hi, kei vang amuh tei ca in, ngamdangmi hi bok ing.
12 Hawvang laksawng co tuk cu na nuamzet uh bangin, pawlpi khangtotiktu laksawng cu na deih cuang tuk uhmi hi.
13 Awn phundang tuah a awntu in, a awnmi a hilhciang theihnak tukin thungen hen hi.
14 Mahtibang awnin, thu ka ngen tale ka hawvang cu thungen ngai naven ka lungmu ngangai cu mah thungetnakah tel ma hi.
15 Mah ahi tale itin kaw ka bawl tuk? Thu ka nget ten hawvang tuah ngen tung a, ka lungmu hei in ngen tung hi. La, ka sak ten hawvang tuah sa tuang a, ka lungmu vangin sa tung hi.
16 Na hawvang tuah bekin Pathian nelah lungdamnak thu na hilh ten itin kaw khawmnak a hengmi mipi ten na lungdamnak thuhilhmi “Amen” a tih theih haw tuk? Na ot mi le na tih nuammi thei haw ma si?
17 Pathian lakah lungdam thu na hilhmi cu phazet tuk naven midang bawmtu cu hi ma hi.
18 Nohte sangin awn phundangin tam saw ka ot hangin Pathian pakzet ing.
19 Mahnaven Pathian biaknak munah midangte zilhnak tukin awn phundang tuah thawng sawm ot sangin theihthiammi awn kam nga awn saw tung hi.
20 U le naute aw, na thu ngaihsutnak uh naupang bangin um pahsuh un. Na pha ngawl bawlnak naupang bang unna, thu ngaihsutnak lamah ngilcang un.
21 Lai Thiangtho sungah,
“Ka mihing tei lakah
awn phun dadang
a awntute mangin awn tung;
Ngamdang mitei
muk le kam mangin,
a lak hawah awn tung.
Mahnaven ka mihing ten
ka thu ngaicuang
haw tukma,” tin
Topa in ti hi, tin
ngatin um hi.Ref 14:21 Isa 28:11-12;
22 Mah a hih hangin awn phundang ot theihnak laksawng cu thu umngawltu tei ca in melciknak hi. Pathian thu hilhthiamnak laksawng cu a thu um ngawl tei ca hi ngawlin a thu umtu tei ca melciknak hi.
23 Pawlpi sung ummite na khawm uhten, a khawmmi na venghawng uhin, awn phundang tuah na awn khawng uh bang ahin, mahlai takin mi khenkhat, ahimata umngawltute a tum haw ahin, hi mite misil haw si ti haw tukma maw?
24 Mahnaven na venghawng uhin Pathian thu na phuan uh laih takin mi pa kha khat, ahimata umngawltu a tum ahin, na thuhilh uhmi in, a lungmu sun tuk a, a sualnak vang thei duncop tuk hi.
25 A ngaihsut kuh mite lang dedeuh tuk a, amah vang mahlai mun pen Pathian bia bok tuk hi. Mahten, “Nohtei lakah Pathian um ngangai hi,” tin ti haw tuk hi.
Khawm Ten Zoh Mawi No In
26 U le naute aw, ka hilh nuammi cu hi bangin hi. Na khawm uhten mi pa khatin lasa nuam tuk, a dang pa khatin thuzilh nuam tuk, a dang pa khatin, Pathian lak pen thu phuanmi nei tuk, a dang pa khatin awn phundangin awn nuam tuk, a dang pa khat leleu in awn phundangin, a otmi hilhciang nuam tuk, iti bang ahi vangin pawlpi khantohnak tukin bawl hen.
27 Miten awn phundang tuah a awn nuam tale, a tambelin, pa nih ahimata pa thum tian bekin awn haw henna, mah hei ten a sasangno in awn haw hen. A ot haw mi a sullam a son theitu um haw hen.
28 Mahnaven a sullam son theitu kuamah a um haw ma tale awn phundang tuah a awntu cu mengdenin um saw henna, amah le Pathian lak bekah awn hen.
29 Pathian thuhilhnak a ngahtu pa nih, pa thumte saw in thuhilh saw haw tahen. Midang ten a thuhilhmi a pha le pha ngawl ngai haw hen.
30 Mahnaven a khawmtu lak pen pa kha khatin Pathian lak pen thuhilh tuk a ngah tale thu hilh li laihtu cu cawl hih hen.
31 Na venghawng uh hei in Pathian thu cu a sasangin hilh thei uh ci. Mahten kua hei in cung pepel haw tuk a, thazaang ngah tek haw tuk hi.
32 Pathian thu hilhthiamnak laksawng a ngahtu in, a hilhmi thu cu luantik ngawlin a uk theih kul hi.
33 Itahim titale Pathian cu buainak le noksak hah Pathian kha ma hi, luallemnak le lemdaihnak Pathian hi.
Pathian pawlpi ten mun hempoh ah a bawl haw bangin,
34 khawmnakah numeite cu daino in um haw hen. Thu hilh bok haw pahsuh hen. Judah daan in, a hilh bangin hotu hei hi haw pahsuh hen.
35 Thu pa kha khat a thei nuam haw tale, a inn hawah a pasal dong haw poh hen hi. Pawlpi khopkhawmnak mun pen numei i thu hilh cu zahcak huai hi.
36 Pathian thu hi na lak uh pen a panmi maw? Nohtei lak bekah Pathian thu heng maw?
37 Mi pa kha khatin Pathian i profet ing tin ngaisung cawm hi. Ahimata hawvang laksawng ngah ing tin, a ngaisung cawm tale, hi bangin nohtei lakah ka ngatmi hi Topa i thupiakmi hi tih cu a theih kul hi.
38 Mahnaven hi thu hi imah a simsial ma tale amah cu imah simsial bok pahsuh un hi.
39 Mah hangin u le naute aw, Pathian thu hilh tuk cu nuam un hi. Mahnaven awn phundang tuah a awntu vang kham pahsuh un.
40 Ihempoh cu lemdunno in le zoh mawino in bawl un hi.