AMOS
Laibu
(The Book of Amos)
Thulamsial
Amos hi Lai Thiangtho sungah profet masabel hi in, a thusonmi saubelin sialsiah masabel mi hi. Judah ngam khuapi pen hungmi hinaven BC za liat laizang pawlin, Israel saklam uknak miphun tei lakah thu na hilh hi. Hih hun hi a khantoh haw laihtak, biaknak lamah a zuam haw laihtak le lungmuang zetin, a um haw laihtak haw hi. Mahnaven a khangtote cu mi dem saw bek hi haw in, dikcang viang ngawlin mi ca-ngahte a nuainepnak tuah a khangto mi haw tih cu Amos in mu leng hi. Biaknak lamah lungmu tak tuah zuam ngawlin le a lungmuannak haw vang cu a ngangai kha ma hi, tin hilh hi. Pathian in dantat tuk hi, tin hehpihnak tuah deihsak zetin hilh hi. Dikcangnak cu teuphei tui bang luang zihziah tuk deihin, “ Topa in hih miphun sung pen a nung calamte hehpih laih hei hi thei hi,” tin (5:15) sungah hilh hi.
1
1 Hithu cu Tekoa khua tuucing pa Amos i hilhmi hi. Hi thu in, hiinhing laihngawl kum nih, Judah kumpi Uzziah, Israel kumpi Joash i capa Jeroboam a deh laihin Pathian in Israel tei thu Amos lakah a theihtikmi hi.Ref 1:1 2Kum 15:1-7; 2Khang 26:1-23; 2Kum 14:23-29;
2 Amos in,
“ Topa cu Zion Mual pen
au sukin,
A aw cu Jerusalem pen
vanthum bangin nging hi.
Tuu tei tatnak hampa ko zo.
Karmel mualhum a,
hampate ko khawng zo,”
ti hi.Ref 1:2 Joel 3:16;
3 Topa in, “Damaskas khua mite a sual lelem haw hangin dantat tung hi. Gilead mite hehpih ngawlin siatsuah haw hi.Ref 1:3-5 Isa 17:1-3; Jer 49:23-27; Zek 9:1;
4 Mah hangin Hazael kumpi in inn humah mei alh hahin, kumpi Benhadad i ngal pannakte kang khawng tuk hi.
5 Damaskas khua kongkhahte vat ek khawngin, Betheden uktu le Aven munlawn a, umtute vang hawlvawk khawng tung. Siria ngam mite cu Kir ngamah salin, kai khawng haw tuk,” ti hi.
Filistin
6 Topa in, Gaza mite cu a sual lelem haw hangin dantat loli tung. A miphun pumpi in, Edom ngamah sal tukin zuak khawng haw hi.Ref 1:6-8 Isa 14:29-31; Jer 47:1-7; Ezk 25:15-17; Joel 3:4-8; Zef 2:4-7; Zek 9:5-7;
7 Mah hangin Gaza i khua kulhtian humah mei khesuk tung a, a inn phazette kang khawng tuk hi.
8 Ashdod le Ashkelon khua uktute cu lawl khawng tung. Ekron khua cu dantat tung a, tanglaih Filistin mite cu thi khawng haw tuk hi.”
Taiar
9 Topa in, “Taiar khua mite cu atu le tu a sual haw hangin bawlsia loli tung hi. Miphun phun khat salin Edom ngamah pui khawng haw hi. Pawlkomnak thutiam a bawl haw mi cu zui haw ma hi.Ref 1:9-10 Isa 23:1-18; Ezk 26:1-28:19; Joel 3:4-8; Zek 9:1-4; Mt 11:21-22; Lk 10:13-14;
10 Mah hangin Taiar khua i khua upnak pang tian humah mei alh khe tung a, a inn phazette tuah kang khawng haw tuk,” tin ti hi.
Edom
11 Topa in, “Edom mite cu a sual lelem haw hangin bawlsia loli tung hi. A unau Israel mite hehpih ngawlin nam tuah hawlvawk haw hi. A thinuknak haw cu tawp ni nei ngawlin le ituk mah ten phaleh thei haw tukma hi.Ref 1:11-12 Isa 34:5-17; 63:1-6; Jer 49:7-22; Ezk 25:12-14; 35:1-15; Oba 1-14; Mal 1:2-5;
12 Mah hangin Temah khua humah mei alh khesuk tung a, Bozrah inn phate kang khawng tuk hi.”
Ammon
13 Topa in, “Ammon mite a sual lelem haw hangin bawlsia loli tung hi. Mi ngam tawtin, ngal a do haw ten Gilead pen naupai numeite cu namin atkeh haw hi.
14 Mah hangin Rabbah khua kulhtian humah mei alh khesuk tung a, inn phate kang khawng tuk hi. Ngal a do ni haw ten aunak tamin, a dodunnak haw cu huih siapi bangin theu tuk hi.
15 A kumpipa le a khutnuai bawite cu salin kai haw tuk hi.”