25
Paul In Rom Kumpi Thukhen Sawlawntik
1 Festas cu mahlai ngamah a hen sawng nung ni thum ten Sisaria pen Jerusalem ah hawh hi.
2 Mahlai ah thiampi upate le Judah hotu ten Paul i hum a, sual a notnak haw thu cu hilh haw hi.
3 Paul cu lampi pen that tukin a ngaihsut haw hangin Jerusalem ah pui tukin Festas lakah ngen haw hi.
4 Festas in, “Paul cu Sisaria ah thawngta mi hi a, keimah vang Sisaria ah kikleh pal tung hi.
5 Na hotu uhte cu keimah tuah Sisaria ah hung hawleh, hi pa hin sualnak a nei tale hilh hen,” ti hi.
6 Festas cu amu lakah ni liat, ni sawm hawng a caam nungten Sisaria ah pinleh hi. Inn a hen i a zingten Festas cu a thusonnak zung sungah Paul hunpih tukin khungin thupia hi.
7 Paul cu hengin Jerusalem pen a hungmi Judah mite cu a elah ding menmun sual nawn het haw hi. Mahnaven a sualnot haw mi cu thuman a hihnak langtik thei haw ma hi.
8 Mahnaven Paul vangin sihsan khual bokin, “Judah mitei Daan thu, Biakinn thu le Rom kumpipa i thu ah hihen imah sualnak bawl mang,” ti hi.
9 Mahnaven Judah mitei lak pen maipha a ngah nuam hangin Festas in Paul cu, “Jerusalem ah hawhin mahlai pen ka mai ah na sual thu a son haw ahin na lungkim thei ni cim?” tin dong hi.
10 Paul in, “Rom kumpipa i thusonnak mai ah atu hi ding vengin hilai pen tazacuai haw hen. Nangmah in, na theih bangin Judah mitei lakah thil sual imah bawl mang hi.
11 Daan palcatin thihnak tham thil sual ka bawlmi a um tale ka luat ahin tin ngen mang hi. Mahnaven sual a notmi hawah thuman imah a umma tale kuamah in Judah mitei khutsungah hen thei haw tukma hi. Rom kumpi lakah thukhen sawlawn tukin ngen ing.”
12 Mahten Festas in ngaihsutnak a piatute tuah a khun khawm nung haw ten Paul cu, “Rom kumpi lakah thukhen sawlawn tukin na nget bangin a lakah hawh tuk ci,” ti hi.
Agrippa le Bernis Lakah Thuhilh
13 Mahnung hun tawkfang a ngei nungten kumpi Agrippa le Bernis cu Festas nuksatin le otpih tukin Sisaria ah zin haw hi.
14 Ni ngeithim nungten Festas in Paul i thu le la cu kumpi Agrippa lakah hilh hi. “Felix in thawngah a khiakmi pa khat Sisaria ah hin um hi.
15 Jerusalem ah ka zin laihin Judah thiampi upate le upa dang ten a sual thu son haw in, amah cu thah tukin ngen haw hi.
16 Mahnaven ka hilhmi cu: ‘Mi pa kha khat a sualthu a son haw ten a sual thusontu tuah maitonin ama sihsan khualnak a neih bok laih ngawlin a sual thusonmi pa khi a khut sung hawah piak tuk cu Rom mitei daan kha ma hi,’ tin ti ing.
17 Hilai ah a hun haw ten ni khat hei ngak ngawlin a zing loli ten thusonnak munah khungin mahpa cu pui un, tin thupia ing.
18 Amah a deih ngawltu ten dingto in thu cu hilh haw hi, ka ngaihsut zahin sual nawn haw ma hi.
19 A biaknak haw thu le Jesuh a tih haw pa cu thi in, ‘Paul in, Nungleh hi,’ tin, a hilhnak hangin thu eldunnak nei haw hi.
20 Hi thu ah itin kaw thu a ciangin ka theihtheih tuk, tih ka lungmu khenkhuai thei mang hi: mah hangin Paul cu Jerusalem ah hawhin, sual a not haw mi thu hi mahlai ah son ahin na lungkim ni cim? tin dong ing.
21 Mahnaven Paul in thukhen sawlawn tukin amah vang cu cing hih tukin le Rom kumpi in, a thu sonleh tukin ngen hi. Rom kumpi lakah ka kuat theih laihngawl sung cu ngalkap tei cin tukin thupia ing,” ti hi.
22 Agrippa in Festas cu, “Mahmi pa i thusonmi cu keimah loli in za bok nuam ing,” ti hi.
Festas in, “Zingten thei tuk ci,” ti hi.
23 A zingten Agrippa le Berius cu khansungah thupi zetin tawhdun khawmnak tum haw in, ngalbawi upabel le khuasung tangsuak upa ten zui haw hi. Mahten Festas i thupiaknak bangin Paul cu hunpih haw hi.
24 Festas in, “Kumpi Agrippa le hilai ah a hungmite; na muhmi pa uh hi Judah mi hempoh ten, hilai ah hihen, Jerusalem ah hihen, a deih haw ngawlnak thu keima lakah hengtik haw hi. Nung takma hi tih tianin au haw.
25 Mahnaven thah tuk takin sualnak a bawlmi mu thei mang hi. Rom kumpi lakah thu a khen sawlawntik hangin mahlai ah kuat tukin thusoncat zo toh ing.
26 Mahnaven Rom kumpipa i lakah a thu le la ngat tuk a ciangin theizet mang hi. Mah hangin atu-in nangmu mai ah puitik ing. Kumpi Agrippa, nangma mai loli ah tulpih ing. Ngat tuk nei nave nang maw tih ka nuamnak hangin a thu ka dot cangciannak hi.
27 Itahim titale keima ca hihimin thawngta pa khat i sualnak thu cu hilai ah a ciangno in imah ngan ngawlin kuat cu mawi ma hi,” ti hi.