16
Paul le Silas Tei Lakah Timote Hawh
1 Paul cu Darbe khua le Listra khua ah heng haw a, mahlai ah thu umtu Timote um hi. A nu cu Judah mi thu umtu hi bok naven a pa cu Grik mi hi.
2 Listra le Ikonium khua ah a ummi ten Timote cu phatsonzet haw hi.
3 Paul in Timote a puinak hangin a vuncep tansak hi. Ita a vunceptan him titale mahlai khua sungah a ummi Judah ten Timote i pa cu Grik mi hi tih a theih khawng haw hangin hi.
4 Khua pa khat nung pa khat hawh pepel haw in, Jerusalem khua a, nungzuitute le pawlpi upa tei soncatmite cu thu umtu tei lakah hilh pepelin zui tuk vangin so haw hi.
5 Mah hangin pawlpi cu Khristian upnakah cak dedeuh a, ni khat nung ni khat, mihing tam sesem haw hi.
Troas Khua Pen Paul i Muhnak
6 Asia ngam sungah Thuthangpha hilh tukin Hawvang Thiangtho in, a phal ngawl hangin Frizia le Galati ngam sungah zin kawkawi haw hi.
7 Misia ngamngi heng haw a, Bithinia ngam sungah tum tukin ngaisung haw naven Jesuh i Hawvangin phalma hi.
8 Mah hangin Misia ngam cu kalvawkin, Troas khua ah hawh haw hi.
9 Mah zan cu Paul in muhnak nei in, mah a muhnakah Mesidonia mi pa khat dingto in, “Mesidonia ah hung inna bawmin hi,” tin hehpih kun hi.
10 Paul i muhnak a neih ceng bek ten Mesidonia ah a hawh tukin vaithawi ung hi, itahim titale mahlai mitei lakah Thuthangpha hilh tukin Pathian in sam hi tin ngaisung ung hi.
Lidia Lungtheknak
11 Troas pen hawmkuang tuah hawh ung a, Samothrace ah hawh ngut ung; mahten a zingten Dipolis ah heng ung.
12 Mahlai pen keciahin Filipi khua heng ung a, Filipi khua cu Mesidonia ngamsung a, peng pa khat i khuapi bokin, Rom tei ukmi hi. Mahlai ah ni tampi cam ung.
13 Sabbath ni-in khuapi pen tui mawkah hawh ung a, mahlai ah Judah mitei thungetnak munkhat um tuk tin ngaisung ung hi. Mahlai ah a hungmi numeite cu a khungin thusonpih ung hi.
14 Amu lak pen ka thu uh a ngaitu pa khat cu Thiatira khua mi, puan sandup zuaktu Lidia hi. Pathian biatu a hih hangin Paul i thuhilhmi cu phano ngai tukin Topa in, a lungmu kongka hong hi.
15 Amah le a innkuate cu tuiphumnak a lak celh haw ten, “ Topa thu umtu tatak tin na ngaisung uh ahi tale ka innah cam zazal bok un!” tin zawm hi. Mahti bangin a zawp hangin hawh ung hi.
Filipi Thawnginnah
16 Ni khat cu thungetnak munah ka hawh lih laih uhin, khawhuai polhmi mailam thu a hilhham theitu sila numeinu pa khatin muak hi. Mailam thu a hilhhamnakin amah le a bawi tei ca in tangka tampi ngah hi.
17 Mah nu in, Paul le keimuh cu zui pepelin, “Hi mite hi Cungnungbel Pathian i sal hi haw hi! Nunpatnak thu nangmu lakah phuang haw hi!” tin au pepel hi.
18 Ni tampi sung cu cawl ngawlin au li hangin Paul cu a thinukin, nunglam hek vutin a, khawhuai i lakah, “Jesuh i minin thupia ing; hi nu i sung pen tulin hi!” tin ti hi. Thakhatin a khawhuai cu tul hi.
19 Amah a neitu ten tangka ngahnak lampi umma toh tih a theih haw ten Paul le Silas cu manin thuneitu bawi tei tangkhopnakah doktul haw hi.
20 Rom acozah bawi tei mai ah hawhpihin, “Hi mite hi Judah miphun hi haw in ka khua sung uhah buainak suaktik haw hi.
21 Keimu daan tuah a khawthu ngawlmi zilh haw a; kohte cu Rom mi ung, a zilhmi daan hi pom thei ma ung, a zui hei zui ma ung,” tin ti haw hi.
22 Mipite vang cu Paul le Silas huatu ah telbok haw hi.
Mahten acozah bawi ten Paul le Silas tei puan cu bawhkek sakin, vah tukin thupia haw hi.
23 Nase zetin, a vah haw nungten thawnginn sungah khumin, thawnginn uktu pa cu phano in tawh kalh tukin thupia haw hi.
24 Mah thupiak a ngahnak bangin thawnginn uktu pa in thawnginn sungta khansungah khumin, a ngit zetmi thingtum pa nih tuah kol bulh hi.
25 Zanngil laihtakin, Paul le Silas cu thungenin Pathian thangphatnak lasa in, thawngta dang ten ngai haw hi.
26 Thakhat hiinhingin, thawnginn cu a bul tian hing khawng hi. Kongka cu hongdun khawngin, thawngta hempoh tei khut khihnak thik taicin cu duk cawm khawng hi.
27 Thawnginn uktu cu khanglo to poh le thawnginn kongka hempoh hong khawng tih amuh ten thawngtate tai khawng zo haw tin a ngaihsut hangin a ngalnam dawkin, amah le mah thahdun tum hi.
28 Mahnaven Paul in, a aw neihtawp suahin, “Nangmah le nangmah thatdun cop pahsun hi! Ka venghawng uhin, um khawng leng ung,” ti hi.
29 Thawnginn cingtu pa in meivak un a tih ten thawnginn sungah manlangzet tumin, can tawtok thahin Paul le Silas tei kebulah bok hi.
30 A pualamah tulpihin, “Ka bawite aw, nunpatnak ngah thei tukin i bawl kam nang? tin dong hi.
31 Amuh ten, “ Topa Jesuh um inna, nangmah le na innkua hawng uhin nunpatnak ngah tuk uh ci,” tin ti haw hi.
32 Pathian thu cu amah le a innkua hawng tei lakah hilh haw hi.
33 Mah zan loli in, thawnginn uktupa in amuhte cu pui in, a liamma haw somsak hi; mahceng bek ten amah le a innkua hawngin tuiphum paih haw hi.
34 Paul le Silas cu a inn humlamah pui in, an eih tuk pia hi. Amah le a innkua hawngin Pathian a up ngah haw hangin lungdamnak tuah dim haw hi.
35 A zing vak ten Rom acozah thuneitu ten palik bawi lakah, “Hite khi hah un hi,” tih thu hilh tukin thupia haw hi.
36 Mah hangin thawnginn uktupa in, Paul cu “Bawi ten nangmah le Silas hah tukin thupia haw hi. Mah hangin tul unna, a kuhno in hawhta un,” ti hi.
37 Mahnaven Paul in palik bawi tei lakah, “Sualnak nei ma nave ung, mipi tei mai loli pen na vah uhmi, Rom mi hihnak nei bok si ung! Mah hum pen thawngah khia lalaih si uh si. Atu tale, a kuhno in maw na hawhtik tum uh? Mahtih bangin tizan pahsuh un! Rom Acozah bawi ten amuh loli hilai ah hungin suah haw hen!” tin ti hi.
38 Mahtin a tihmi cu palik bawi ten Rom Acozah bawi tei lakah hilh haw in, Paul le Silas cu Rom Acozah i mihing tih a theih haw ten lau haw hi!
39 Mah hangin Paul le Silas tei lakah hawhin ngaihthiam ngen haw hi; mahten thawnginn pen suahin khuasung pen mundangah hawh un hi, tin ngen haw hi.
40 Paul le Silas cu thawnginn pen suakin, Lidia i innah hawh haw hi. Mahlai ah thu umtute tawkin thathonak tuk thu a sosuah ceng haw ten mahlai khua pen tul haw hi.