FILEMON
Tengla Pawl Kah Capat
(PHILEMON)
Filemon he ueppang koei Khrihca pakhat la awm, Kolosa khaaw Khrihcabu ah aka awm thlaang pakhat mai cawi ni, Onisimas aka miingna sal khuehkung la awm. He sal tah a bawipa teng kalawng heeng vik tih metila nuem thong ah aka tla Pawl oen pha ahih. Pawl rang oen Onisimas tah Khrihca la awm. Filemon tengla Pawl kah capat he tah Filemon amah tengla Pawl lawng a tuih a sal oen koep roep hih ham, a sawah khawdawp a ngaai pe sal ti mailai ohla Khrihca boenhui pakhat tila a tengah awm sak koep ham a nawlna capat ni.
1
1 Khrih Jesuh kawngah thongtla kai Pawl oen mami kah manau Timote lawng puei paw oen bii bi haih la aka awm Filemon oen,
2 Na im ah aka tun Khrihca thli oen ngannu Apphia oen raalkap puei Arkhipas tengah ca kavan pat.
3 Pa Pathen oen Bawipa Jesuh Khrih lawng a lungvatna, ngaimawngna m'pe u hawn seh.
Filemon kah Lungna oen Oengna
4 Ka manau Filemon, ka thangthui veng roekk ah nang kawng ka thui tih ka Pathen tengah awmngaih ciil ka thui.
5 Metihtiah Pathen kah thlaang boeih na lungna oen Bawipa Jesuh na oengna kawng ka yaak dawngah ni.
6 Ka thangthuina tah aka oeng thlaang la ng'awm u angla nang oen kaimi kah pawlneengna lawng Khrih oen pumkhatla awmna dawng mami hingna ah aka awm yotheenna cungkuem te a dung ngaai la yaakmingna khueh ham ni.
7 Ka lungna ka manau, nang kah lungna lawng awmngaihna yahawh hlang m'peek tih ka tha avan thlue sak. Pathen kah thlaang boeih te nang lawng a kaw na hoe sak poen.
Onisimas Ham Reenna A Bih
8 Tedawngah he kawng ah he Khrih ah na maya la ka awm van angla na sai koei te sai ham tong-aa muehla nang he awl kan peek thai mai de ta.
9 Tede, kan lungna dawngah reenna kavan bih. Jesuh Khrih kah laipai, tahe Jesuh Khrih kawng ah thongtla kai Pawl lawng reenna kavan bih.
10 Tedawngah, thong ka tlaak vengah he Muithla ben ah ahih kah anna pa la ka awm tih Khrih ah ka capa la aka awm Onisimas yuengla na tengah reenna kavan bih.
11 N'hu vengah tah nang hamla ahih he cawmthawkk nawh, tede tahe tah nang oen kai ham la cawmthawkk poen.
12 Tahe ah namah tengla ahih he kavan tuih koep de ka thinkaw tah ahih tengah awm.
13 Awlthang theen kawngah thong ka tlaak veng he ah nang yuengah kai bawmcemkung la ahih he ka tengah awm sak ka ngaih.
14 Tede, nang te amangkhakla kai he bawmcem sak ham ka ngaih nawh, te lak ah namah kawthawh oen sai sak ham ni ka ngaih. Tedawngah namah kah kawtlaak nawh atah n'tu khaw ka sai manawh.
15 Onisimas he nang teng kalawng a phengter kawlkalh he thik at la namah tengah awm poe ham mai cawi ni.
16 Tahe ah ahih tah sal mailai tlaih nawh ni, tede ahih tah sal lak ah atheen ngaai Khrih ah mami kah lungna boenhui la ni a awm poen. Kai hamla tah ahih he aphu awm tangkiik, nang ham tah sal pakhat la khaw Khrih ah boenhui pakhat la khaw metila aphu a awm tare ai.
17 Tedawngah kai he biibipuei la na poek atah kai nan do ham koei angla te ahih he do koep lah.
18 Na sawah ahih lawng thawlhpalhna a sai tih laiba mai khaw a awm atah kai kah laiba la khueh mai hawn.
19 He he kamah kut roe oen kavan thut, Kai Pawl lawng kan sah koep badai. (Na hingna roe nan peek ham na ba te thui koep ham ngoe mai nawh)
20 Tedawngah ka manau, Bawipa mik-hai te yahna mai lang kavan bih he tah reenna oen van sai mai; Khrih ah boenhui pakhat angla ka kaw van hoe sak mai.
21 He ca dawngah ka thut angla kavan bih he na sai ngaai ai tila ka tangna tih yahawh ngaai pateng na sai tangtang ai tila ka ming.
22 Tecoengah kai hamla a huen pakhat ah pahoei roekbah oepsoeh, nangmi boeih kah thangthuina te Pathen lawng avan thung vetih kai he nangmi tengla m'pha sak koep ngai ai tila ka ngaiuep dawngah ni.
Aboet Lam Toeina Awl
23 Jesuh Khrih kawng ah kai oen thong aka tla haih Epafras lawngkhaw nang te n'toei,
24 Te tila te kai kah biibipuei Mark, Aristarkas, Demas oen Luka mi lawng nang te n'toei u.