PITER
Tengkah Capat Pakhatna
(1 PETER)
Piter capat pakhatna he tah Asia Maina ram aluenben ah aka awm, “Pathen kah thlaangtuek,” a ti u thlaang thli tengla a pat pe ni. He capat lawng atungpuila a mengteng tah, amami kah oengna dawngah heemtekna patang aka khang thli te tha peek ham ni. Cathutkung lawng he ca aka tae thli te Jesuh Khrih kawng awlthang theen, a duekna, thawhkoepna, ka law koep ai tila a thui a awlkam ngaiuepna te a thui pe. Tedawngah he ang patang raina he ahimi lawngah ueh thai ham oen ah ahimi kah oengna te cak tangtang tih ngaitluepna khueh tangtang te noekdakna ni tila mingna oen ah Jesuh Khrih a phumphona khawhin ah kutdo dangna akawng te a thui pe.
Cathutkung lawngah he kah patang khangna atue vengah tha a peekna dawngah he amah kah capat aka tae thli te Khrih kah thlaang thli a hing angla hing u van ham a thui pe.
1
1 Jesuh Khrih kah celtuih kai Piter lawngah--
Pontas peng, Galati peng, Kappadocia peng, Asia oen Bitinia peng ah thlaangpoeng poedoe angla aka awm tih aka yan khok Pathen kah thlaangtuek thli tengah ca kavan pat.
2 Jesuh Khrih awl te na ngaai tih amah kah thisen oen ciim sak hamla Pathen kah mengtengna angla nangmi tah tuek la na awm u tih amah Muithla lawng thlaangciim la n'sai u.
Lungvatna oen ngaimawngna tah nangmi tengah asoepbirla awm hawn seh.
Aka Hing Ngaiuepna
3 Mami Bawipa Jesuh Khrih kah ana Pa oen Pathen te mami lawng uem u lah sih! Metihtiah aka lenduet a lungna lawngah Jesuh Khrih te duekna kalawng a thawh sakna rang oen mami he hingna a thaai m'peek poen. Tedawngah mami tah aka hing ngaiuepna oen m'betoet u,
4 Pathen lawng a thlaang thli hamla a khueh pe yotheen kam-awmna yahawh hlang te pang van hamla n'ngaiuep u. Te yotheen kam-awmna te tah amah lawng nangmi ham vaan ram ah avan kuem tih te huen atah honn thai nawh, rong-athaang thai nawh tih muingen thai nawh.
5 Atue boetna apha vengah tueng sak hamla a khueh oepsoeh thlawnna te oengna rang oen ah Pathen kah huham tharana lawng akhoem abeel tih nangmi ham vaan ah avan khueh ro na pang ham koei ni.
6 Nangmi lawng khawdeng patang phun soeprep te na khang u dawngah tahe veng kawlkalhca tah na kaw the u de, thlawnna kawngah he awmngaih u lah.
7 He ang raina na tawng u he nangmi kah oengna te ataktang oen ataktang nawh te noekdakna ham ni. Phe thai koei la aka awm sui pateng khaw hai oen ah anoekdak ta; tedawngah sui lak ah aphu aka awm ngaai nangmi kah oengna lawng raina he ueh thai ham ah noekdak la awm. Te dengah ni Jesuh Khrih a tuengna Khawhin ah nangmi lawng thangpawmna, ruep-awmna oen hinyahna te na dang u ai.
8 Nangmi lawng amah te na hu u nawh de na lungna u, tahe ah na hu u nawh de na tangna u. Tedawngah awl oen thui thai nawh awmngaihna alentloe oen asang koek kawhoena te na khueh u,
9 Metihtiah nangmi lawng amah oengna dawngah mengtengna muithla thlawnna te na dang u poen dawngah ni.
10 He thlawnna kawng he tawngha thli lawng acek-aneh la a doet adap tih a tlap u. Pathen lawng nangmi peek ham a ngaih kutdo kawng te a thui oepsoeh.
11 Ahimi lawngah, te kutdo te meveng tue ah a awm vetih metuek tue ah a law ai tite ming hamla a yawm u tih tahe veng atue he ahimi kaw khuiah aka awm Khrih Muithla lawngah a khi pe. Muithla lawngtah Khrih lawng patang khang ham koei oen ah, te tila patang a khang dawngah dang ham koei ruep-awmna te a thui oepsoeh poen.
12 Tawngha thli lawng bii a bi u he tah amami kah hoeikhangna ham nawh tih nangmi kah hoeikhangna ham ni tite Pathen lawng a thui pe. Nangmi tengah awlthang aka thui laipai thli oen tawngha thli lawngah a thui oepsoeh a kawng alam te vaan kah avan tuih Ciim Muithla tharana huham oen ah avan phawng poen tih tahe ah nangmi lawng na yaak u poen. He kah thaihu kawng he vanthlaang thli lawng pateng khaw yaakming ham a ngaih u.
Aciim Hingna Oen Hing Uh
13 Tedawngah bii bi hamla na thinkaw te roekbah oepsoeh uh. Ahuertuela awm u lang, Jesuh Khrih a tueng vengah na dang ham koei lungvatna kutdo dawngah na ngaiuepna te khueh uh.
14 Pathen awl te ngaai uh, nangmi lawng n'tu khaw na ming u nawh vengah namami kawngaih la na hing u angla te hing u tlaih boel.
15 Nangmi khuekung Pathen te aciim van angla nangmi khaw na saina boeih dawngah aciimla awm uh.
16 Caciim lawngah, “Kai tah ka ciim dawngah nangmi khaw aciimla awm uh,” tila a thui.
17 Nangmi lawng Pathen tengah na thangthui u vengah ahih te a Pa tila na khue u, ahih lawng atah thlaang boeih te a saina taring ah pekbona awm ohla awl a cek. Tedawngah he dilai dawng na hing khuiah he amah te hinyahna langtah hing u lah.
18 Nangmi lawng na patuer hue tengkah na pang patoeng hoeikhangna aka awm nawh hingna kalawng aphu a peek tih n'loeih sak te nangmi lawng na ming u. Te tah sui, ngun angla mui-angen thai koei thaihu nawh ni.
19 Te thaihu tah angaw aha awm nawh tih cawttbauh kap nawh tuuca oen aka lo u aphu aka tlo Khrih kah luciik thawthuengna te ni.
20 Ahih te tah dilai suen thlan vengah Pathen lawng a tuek poen tih he kah atue khawhin aboetna tue vengah nangmi ham avan tueng sak.
21 Amah rang oen Pathen te nangmi lawng na oeng u tih, Pathen lawng amah te duekna kalawng a thawh sak tih ruep-awmna te a peek; tedawngah nangmi kah oengna oen ngaiuepna tah Pathen dawngah cak khak.
22 Tahe ah nangmi lawng awltak te na vaina rang oen nangmi tah na ciim u poen tih oengca na puei na paw thli te lungna taktak oen na lungna u poen, tedawngah nangmi khat oen khat thinkaw tak oen lung u tare lah.
23 Tedawngah aka hing tih dungyan aka cak Pathen awl rang oen nangmi tah na thangthaai u poen; aka duek thai nu oen pa kah ca-anau angla nawh tih aka duek thai nawh kah ca-anau la na awm u.
24 Caciim lawngah,
“Thlaang boeih he
sul-aram angla ni a awm,
ahimi kah ruep-awmna boeih tah
raipai angla awm,
sul-aram khaw au tih reu,
raipai khaw tlumtloei,
25 tede Bawipa kah awl tah yoeyahla cak” tila a thui.
Nangmi tengah avan phawng u awlthang theen tah he poen ni.