27
Pilat Tengla Jesuh A Ceh Puei U
(Mk. 15:1; Lk. 23:1-2; Jhn. 18:28-32)
1 Mincanghi atah Khawsoeih ahaamca hue oen Judah ahaamca hue boeih lawng Jesuh te ngawn ham khaw a khan u.
2 Ahih te thiirui oen a khih coengah a ceh puei u tih Rom ram ukbawi Pilat kut ah a peek u.
Judas Iskariot A Duekna
(Celtuih 1:18-19)
3 Paipi thleepkung Judas lawngah, Jesuh te ngawn hamla khaw a khan u te a yaak vengah yut tih tangka sawmthum te Khawsoeih ahaamca hue oen Judah ahaamca hue tengah a baal koep.
4 “Ka thawlh tangkiik, thawlhna aka khueh nawh te duek sak hamla a sawah paipi ka thleep hau poen,” a tina. Ahimi lawng, “Kaimi lawng n'tu ka tina ai? Namah ngaih poen ni,” a tina u.
5 Judas lawng tangka sawmthum te Tempal bok-im khuiah a voeih sut tih cet, te coengah kaiawk tih duek.
6 Khawsoeih ahaamca hue lawng tangka te a ruh u tih, “He kah tangka he thisen phu tangka la a awm dawngah Tempal bok-im kah tangkakong khuiah khueh ham mami kah Phungawl lawng ngaih nawh,” ti u.
7 Te kah tangka kawng te a thui u tih kawtlaakna a khueh coeng atah thlaangphun tloe kah phuel la khueh ham ah Ambawpkung kah Lohuen te laina ham tangka te a hawna u.
8 Tedawngah te lohuen te, “Thisen huen” tila tihin toe ah a thui u.
9 Te tila tawngha Jeremiah lawng a thuisut awl te soep poen. Tawngha Jeremiah lawng, “Israel thlaang thli lawng ahih kah phu ting la kawtlaakna oen aphu a kheh u tangka sawmthum te ahimi lawng a lawh u tih, Bawipa lawng awl n'peek angla,Ref 27:9-10 Zek. 11:12-13
10 Ambawpkung kah lohuen te laina ham tangka te a hawna u,” tila a thui te ni.
Pilat lawng Jesuh Awl A Doet
(Mk. 15:2-5; Lk. 23:3-5; Jhn. 18:33-38)
11 Rom ram ukbawi haiah Jesuh a pai vengah ram ukbawi lawng, “nang he Judah sengpahrang tang aw?” tila a doet. Jesuh lawng, “Na thui angla ka awm,” a tina.
12 Tede Khawsoeih ahaamca hue oen Judah ahaamca hue lawng thawlh a peel u te Jesuh lawng khat khaw thung pe nawh.
13 Tedawngah Pilat lawng, “Nang he ahimi lawng thawlh he yoeh m'peel u he na ya nawh aw?” tila a doet.
14 Tede Jesuh lawng kaam at khaw a thung pe nawh dawngah ram ukbawi tah a kawpoek rai tangkiik.
Jesuh Ngawn Ham Awltloekna
(Mk. 15:6-15; Lk. 23:13-25; Jhn. 18:39-19-16)
15 Rom ram ukbawi lawng Kaantaak Poei veng roekk ah rangpui lawng loeih sak ham a ngaih thongtla pakhat te a thlah pe.
16 Tevengah a thaang aka the soeh thlaangthe Jesuh Barabbas aka miingna thongtla pakhat awm.
17 Thlaang rangpui a tun soep vengah Pilat lawng, “A-u thlah sak ham na ngaih u? Jesuh Barabbas aw, tih nawh atah Messiah a ti u Jesuh aw?” tila a doet.
18 Ahimi lawng Jesuh he a uett u dawngah aana aka khueh Judah hue lawng ka kut ah avan pha sak u tite ahih lawng atheenla a ming.
19 Awlcekna yung ah Pilat a ngawlh vengah a yu lawng, “Thawlhna aka khueh nawh te kah thlaangdoeng sawah n'tu khaw sai boel. Ahih kawngah tiyiin ka mang ah ka patang tangkiik,” tila awl a tah.
20 Khawsoeih ahaamca hue oen Judah ahaamca hue lawng Barabbas te thlah tih Jesuh te ngawn hamla Pilat tengah bih ham ah rangpui te a ceemtuh.
21 Pilat lawng “He rawi pahih khuiah a-u thlah sak ham na ngaih u?” tila rangpui te a doet. Ahimi lawngah, “Barabbas” ti u.
22 Pilat lawng ahimi te, “Te atah Messiah a ti u Jesuh he metila ka sai ai?” tila a doet. Ahimi boeih lawng, “Thinglam dawngah ngawn” a tina u.
23 Tede Pilat lawng, “N'tu thawlhna a sai?” tila a doet koep u. Tevengah te thli lawng, “Thinglam dawngah ngawn!” tila angaihhlangla paang u.
24 Pilat lawng he tila awl doett khiing he coeng thai manawh, cumplaam la tho tih so tare poen ai tite a huh vengah tui a lawh tih rangpui haiah a kut te a silh. “He thlaangdoeng kah duekna kawngah kai ka thuum nawh! Namami kah sai ni!” a tina.
25 Tevengah rangpui lawngah, “Ahih kah duekna kawngah dantatna tah kamami oen ka cadil thli sawah tla hawn seh,” ti u.
26 Tecoengah Pilat lawng ahimi ham Barabbas te a thlah pe tih; Jesuh te cungpoelh oen a bawh sak u tih thinglam dawngah ngawn ham ahimi kut ah a peek.
Raalkap hue lawng Jesuh A Thena
(Mk. 15:16-20; Jhn. 19:2-3)
27 Tecoengah Pilat kah raalkap hue lawng Jesuh te ram ukbawi kah impui la a khuen u tih raalkap bu khat lawng a voel khoep.
28 Ahimi lawng a himbai te a pit pe u tih himbai ling a bai sak u.
29 Tecoengah thliing lumuek te a muek sak u, a bantang kut ah cawnghol a pawm sak u; tecoengah a haiah buekuep u tih a the akhana u, “Judah sengpahrang na hinglung vaang seh,” tila a the akhana u.
30 Ahimi lawng Jesuh te a tumthoeih u, cawnghol te a lawh pe u tih a luu ah a bawh u.
31 He tila a thena u coengah himbai ling te a pit pe tih amah kah himbai te a bai sak koep tih thinglam dawngah ngawn ham a ceh puei u.
Thinglam Dawngah A Ngawn U
(Mk. 15:21-32; Lk. 23:26-43; Jhn. 19:17-27)
32 Te tila a ceh u vengah Sairin khaaw kah Simon te a huh u tih raalkap hue lawng amangkhakla Jesuh kah thinglam te a kawh sak u.
33 Golgota a ti u huen te a pha u. Golgota ti he tah, “Luuruh Huen,” ti ngaihna ni.
34 Te huen ah Jesuh te misurtui oen tuikha a pawlh te a tuul u. Jesuh lawng a teng doek tih aw nawh.
35 Jesuh te thinglam dawngah a tai u, tecoengah talcung a suh u tih a hinaak himbai te rek ra u.
36 Tecoengah ngawl u tih Jesuh te a toet u.
37 Thawlh a peel te a thut u tih a luu sawah a tai pe u. “He tah Judah Sengpahrang Jesuh ni,” tila a thut pe u.
38 Tevengah thlaanghuen pahih khaw Jesuh oen haih bantang ben ah pakhat, banvoei ben ah pakhat thinglam dawngah a tai u.
39 Te kah aka cet paitai thli lawng a luu halh a voeih u tih a tamdeng kawkhahna u.
40 Tempal bok-im te aka phe tih hin thum ah aka sa koep ham koei! Pathen Capa la na awm atah namah oen namah thlawn u lah saw! Thinglam dawng kalawng rum thuk lah!” a tina u.
41 Tetih van angla khawsoeih ahaamca hue oen Phungawl cangpueikung hue oen ah Judah ahaamca hue lawngkhaw a tamdeng u van tih,
42 “Ahih lawng thlaangtloe tah a thlawn thai de, amah oen amah tah thlawn u thai nawh! Israel sengpahrang la awm nawh aw? Tahe roe ah thinglam dawng kalawng a rum atah mami lawng ahih he n'tangna ai ta!
43 Pathen a uepna tih Pathen Capa la ka awm ti, Pathen lawng tahe ah a thlawn ai aw bueh u lah sih!” ti u.
44 Jesuh oen thinglam dawngah a tai haih thlaanghuen rawi lawng pateng khaw ahimi angla a tamdeng hih van.
Jesuh Duekna
(Mk. 15:33-41; Lk. 23:44-49; Jhn. 19:28-30)
45 Hingthun ah ram pum boeih te yiinna lawng a thiing khoep tih khawnoek pathum khui yiin khoep.
46 Khawvaang ben khawnoek pathum yun atah Jesuh lawng, “Eli, Eli, Lama sabaktani?” tila angaihhlangla paang. A thuingaihna tah, “Ka Pathen, Ka Pathen, n'tu ah kai nan hoett sut?” ti ngaihna ni.
47 Te huen kah aka pai thlaang khatsut lawng a yaak u vengah, “Ahih lawng Elijah ni a khue,” ti u.
48 Ahimi tim kah thlaang pakhat lawng thlat cet tih himbaipeen te a lawh, misurtui ah a nuem tih cungkui dawngah a piin tih Jesuh te awkk sak ham kamthlah.
49 Tede atloe hue lawng, “Awm de lah! ahih thlawn hamla Elijah law ai nuem, bueh de lah sih,” ti u.
50 Jesuh lawng angaihhlangla paang, tecoengah a mal pat yip.
51 Tevengah Tempal bok-im khuikah himbaiyan te asaw kalawng adang toe pahih la poet pheuh u. Dilai hinghuen tih lungnu thli boeih rek.
52 Thlann thawhka boeih awng u tih aka duek tangte Pathen thlaang thli boehoeng mai te tho u.
53 Phuel te a ceh taak u tih duekna kalawng Jesuh a thawh koep coengah Aciim Khawpui khuila kuun u tih thlaang broe haiah tueng u.
54 Raalbawi oen Jesuh aka toet raalkap hue lawng likluei hinghuen tih atloe thaihu thli te tila a awm te a huh u vengah lakueng rih oen thuen u tih, “Ahih he Pathen Capa tang tang ni” ti u.
55 Galili kalawng Jesuh hu ah aka bang tih amah te aka bawmcem hutaa broe nawh te ah te awm u tih ahih te athla kalawng a toet tih a dan u.
56 Ahimi tim-ah Meri Makdalin, Jeem oen Josep manu Meri oen Zebedi yu khaw awm u.
Jesuh A Upna Kawng
(Mk 15:42-47; Lk. 23:50-56; Jhn. 19:38-42)
57 Thlemben apha atah Arimatia khaaw kah kuirang pakhat Josep aka miingna te avan pha. Ahih khaw Jesuh kah a hubang pakhat la awm van.
58 Ahih lawng Pilat tengla cet tih Jesuh kah a rawkk te a bih. Jesuh kah a rawkk te Josep kut ah peek ham Pilat lawng awl a peek.
59 Josep lawng Jesuh rawkk te a lawh tih himbai bawk athaithik oen a yaawl tih,
60 amah ham lungkaw a thuk heet thlann thaai ah te a up. Tecoengah lungto bo hlang oen thlann thawhka te a khaih tih a ceh taak.
61 Meri Makdalin oen atloe Meri mi khaw te ah te thlaan ben la mang tih ngawl u.
Thlaan A Toet U
62 Avuen Sabbath hin ah khawsoeih ahaamca hue oen Farasi thlaang thli tah Pilat oen huh u tih,
63 “Bawipa hoem thui thlaang ahih lawng te a hing vengah, ‘Kai tah duekna kalawng ka tho koep ai’ tila a thui te ka ming u.
64 Tedawngah athum hin toe thlann te atheenla a khaih tih a toet u ham awl van pe lah, te nawh kawinih a hubang hue lawng cet u vetih a rawkk te a huuen u coengah ahih tah duekna kalawng tho koep poen tila thlaang tengah a thui u ai. Hukhueng kah thailatna he acuek kah thailatna lak ah the-eep ngaai ai,” tila a thui pe u.
65 Pilat lawng “Raalkap bu khat aka toet la na khueh u te ta: cet u langtah thlann te a toet thai khui anepla toet sak uh,” a tina.
66 Tecoeng atah ahimi lawng cet u tih thlann khaihna lungto dawngah miknoekna a khueh u tih thlann te anepla a toet sak.