20
Misur Dum Ah Bii Aka Bi Thli
1 Jesuh lawng, “Vaan ram tah he tila awm. Dumkhuehkung pakhat lawng misur dum ah bii bi sak ham thlaang aka tlap hamla mincanghi ah cet.
2 Thapang a peek nooek angla hin-at kutphu ngun tangka pheek at peek ham biibithlaang thli oen a kaw vai u tih ahimi te dum la a tuih.
3 Mincang khawnoek pakua ah dawr la cet koep tih n'tu khaw bi ohla aka pai thlaang khatsut te a huh.
4 Tevengah ahimi te, “Nangmi khaw misur dum la cet u langtah bii bi uh, na thapang te ating atawkk la kan pe ai,” a tina.
5 Tedawngah ahimi tah cet u. Te-coengah hingthun khawnoek thlaihih vengah khaw, khawnoek pathum vengah khaw a sawkah angla a sai.
6 Thlemben khawnoek pa-ngaa tawm ah ahih lawng dawr la a ceh koep vengah thlaangtloe khatsut te huen ah a pai hun te a huh. “Ahimi te n'tu ah biibi ohla khawyung khun he ah na pai u?” tila a doet.
7 Ahimi lawng, “Kaimi he a-u lawngkhaw bii m'bi sak u nawh dawngah ni,” a tina u. Dumkhuehkung lawng, “Theen, nangmi khaw misur dum la cet u lang bii bi uh,” a tina.
8 Thlemben tue apha vengah dumkhuehkung lawng dumtoetkung tengah, “Bii aka bi thli te khue u lang a thapang te pe uh. Hukhueng koek bii aka bi kalawng tong langtah lamhacuek bii aka bi toe a thapang kutphu te peh,” a tina.
9 Thlemben khawnoek pa-ngaa kalawng bii aka bi thli te thapang ngun tangka pheek at rip a peek.
10 Lamhacuek la bii aka bi thli thapang lawh ham a law u vengah thapang yahawh ka dang ai, tila a poek u. Tede ahimi khaw thapang ngun tangka pheek at rip a dang u.
11 Tangka te a lawh u tih dumkhuehkung tengah caitoek u.
12 Ahimi lawng, “Hukhueng koek la bii aka bi thlaang thli he tah khawnoek pakhat khui bueng a bi u. Kaimi tah khawyungkhun khawling khawlai khuiah ka bi u. Tede ahimi na peek yoeh van te kaimi nan peek u,” a tina u.
13 Tevengah dumkhuehkung lawng ahimi timkah thlaang pakhat te, “Ka puei, hutung lah! Kan thaina moenih, hin at kutphu ngun tangka pheek at peek ham awl n'thui u nawh aw?
14 Na tangka te lo langtah im la cet loeih! A hukhueng koek aka bi he khaw nangmi kah dang yoeh van te peek ham ka ngaih.
15 Ka mah tangka te ka kawngaih angla ka hawna thai nawh aw? Kai ka moeihoeih dawngah nang na lungoe aw?” a tina.
16 Tecoengah Jesuh lawng, “Tedawng-ah hukhueng koek te lamhacuekla awm vetih lamhacuek te hukhueng koek la awm ai,” a tina.
Jesuh lawng A Duekna Kawng A thui Voeithumna
(Mk. 10:32-34; Lk. 18:31-34)
17 Jesuh lawng Jerusalem la a ceh vengah a hubang thlaihih te ahuep ahelna ah a ceh puei tih amami bueng noenoe ceh ruila ahimi tengah awl a thui pe.
18 “Hutung u lah,” “Mami tah Jerusalem khawpui la n'cet u ai. Te huen ah Thlaanghing Capa tah khawsoeih ahaamca hue oen Phungawl cangpueikung hue kut ah peek la awm ai. Ahimi lawng Thlaanghing Capa te ngawn hamla thawlh a peel u vetih,
19 thlaangphun tloe kut dawngah a peek u ai. Thlaangphun tloe hue lawng ahih te nuihbu kamring la a khueh u ai, athe akhana u ai, a bawh u coengah a ngawn u ai. Tede athum hin ah tho koep ai,” a tina.
A Manu lawng A Bih Pe
(Mk. 10:35-45)
20 Tecoengah Zebedi kah a yu te a capa rawi oen Jesuh tengla va law. Jesuh haiah khuklu oen cuengkueng tih buekuep ruila a tengah a kawngaih te a bih.
21 Jesuh lawng ahih te, “N'tu na ngaih,” tila a doet. Ahih lawng, “Sengpahrang la na law vengah ka ca rawi he na bantang ben ah pakhat, na banvoei ben ah pakhat a ngawlh hih thaina hamla awl van pe lah.” a tina.
22 Jesuh lawng, “Na van bih he na ming hih nawh! Kai lawng ka awkk ham koei patang khangna boengloeng he na awkk thai hih ai aw? tila te rawi boeinau te a doet. A hih rawi lawng, “ka awkk thai hih ai,” a tina.
23 Jesuh lawng, “Nanghih lawng ka boengloeng dawngkah na awkk thai tang tang ai. Tede ka bantang ben ah ahih ngawl seh, ka banvoei ben ah ahih ngawl seh tila kai lawng ka tuek thai nawh tih te huen tah a Pa lawng a nuuen tangte thlaang hue ham ni,” a tina.
24 He kawng he atloe hubang paha hue lawng a yaak u vengah te rawi boeinau sawah a thin sa u tangkiik.
25 Tedawngah Jesuh lawng a khue tun u tih, “Pathen aka ming nawh ukkung bawi hue lawng a uk thlaang thli sawah huham a khueh u tih mawtkung ahaamca hue lawngkhaw atlawh ngaaila aana a khueh u.
26 Tede nangmi tah tila na awm u manawh. Nangmi timkah pakhat lawng alenduet la awm a ngaih atah nangmi boeih kah tuihyoeihthlaang la awm seh;
27 nangmi timkah thlaang pakhat lawng pakhatna ah awm ham a ngaih atah nangmi kah sal la awm seh.
28 Te tila ni Thlaanghing Capa khaw thlaangtloe te bii bi sak ham law nawh tih thlaang kah bii bi ham oen thlaang yahawh te tlang ham oen ah hingna peek ham ni a law,” a tina.
Jesuh lawng Mikpum Pahih A Hoeih Sak
(Mk. 10:46-52; Lk. 18:35-43)
29 Jesuh oen a hubang hue tah Jeriko khaaw kalawng a ceh u vengah thlaangping yahawh hlang lawng a hu ah a vai u.
30 Lawngteng ah aka ngawl mikpum pahih lawng Jesuh kah a ceh tuen awl te a yaak hih vengah, “Devid Capa! Kai hih he n'reen lah, Bawipa!” tila paang hih.
31 Thlaangping lawng te rawi te a ho u tih duem awm hih a tina u, Tede ahih rawi lawng, “Devid Capa! n'reen lah, Bawipa!” tila angaihla paang tare hih.
32 Jesuh lawng pai tih te kah mikpum rawi te a tengla a khue tih, “Nanghih ham n'tu sai sak na ngaih?” tila a doet.
33 Ahih rawi lawng, “Bawipa! Ka mik na van tueng sak ham ka ngaih hih” a tina.
34 Jesuh lawng mikpum rawi te a reen tangkiik tih a mik te a tek pe. Teveng roe ah a mik tueng pahoei hih tih Jesuh te a hu ah a vai hih.