MARK
Kah A Thut Awlthang Theen
(MARK)
Mark kah a thut Awlthang Theen lawng, “Pathen Capa Jesuh Khrih kawng Awlthang Theen tila a tong. Jesuh he biibi ngaithuen tih saithaina aana aka khueh thlaang la a tueng sak. Ahih kah sai thaina te a cangpueina, thlaang sawah khawdawp a ngaaina, raaithe a hekna oen a tueng sak. Jesuh lawng amah kawng he a thui vengah thlaang he thawlhna kalawng loeihna ham, hingna aka pe hamla Thlaanghing Capa tah va law tila a thui.
Mark lawng Jesuh kawng a thut vengah Jesuh kah cangpueina oen a awlthui lak ah a saina te awlpui la a thut. Baptisma pekung Johan lawng Jesuh kah baptisma dangna oen suek-halh a tawngna kawng atoila a thut coengah Jesuh kah cangpueina oen thlaangtlo a hoeih sakna kawng te a thut. Atue atang asan bet hang atah Jesuh kah akawng alam te a hubang hue lawng voeh voeh a ming u. Tede Jesuh te aka thina thlaang lawngtah ngaih thuek u nawh. Aboetna ah dilai han ah Jesuh a hing veng kah hukhueng koek yarh a hawna oen thinglam dawng a taina oen ah duekna kalawng a thawh koepna kawng te awlpuila a thut.
Mark Awlthang Theen lawngah aboetna pahih a khueh tih te rawi te brekket khuiah a khueh u. He cabu aboetna he Mark amah kah thut nawh tih thlaangtloe lawng ni a thut tila a poek u.
1
Baptisma Pekung Johan Phungthuina
(Mt 3.1-12; Lk 3.1-18; Jhn 1.19-28)
1 He tah Pathen Capa Jesuh Khrih kawng Awlthang theen ni.
2 A tongcuek vengah tawngha Isaiah lawng:
“Pathen lawng ‘Nang hamla lawngpui tukkung
Kamah kah laipai na haiah kavan tuih ai, ti.’
3 Thlaang pakhat tah ramhum huhang ah paang tih,
“Bawipa ham lawngpui te roekbah uh,
a cehna ham lawngpui te doeng sak uh,” tila a thut.
4 Tedawngah Johan tah ramhum huhang ah va law, baptisma a peek tih phung a thui. Thlaangping thli te, “Na thawlhna yut u langtah baptisma dang uh. Te dengah ni Pathen lawng na thawlhna sawah khawdawp avan ngai u ai.” a tina.
5 Judia peng oen Jerusalem kah thlaang thli lawng Johan kah phungthui te hutung hamla cet u. A thawlhna a phawng u tih Jordan tuiva ah ahimi te Johan lawng baptisma a peek u.
6 Johan lawng Kala-uk mul oen a tah himbai te a baai tih a hingcen ah saphaw cihin a naak. Ahih lawngah khaurang oen khawitui te buh la a caak.
7 Ahih lawng thlaangping nala te, “Kai coengah aka law ham koei thlaang te tah kai lak ah aka lenduet ni. Kai tah ahih kah khowmuek rui thlam ham Pateng ka ting ka tawkk nawh.
8 Kai lawngtah nangmi he tui oen ni baptisma kan peek u. Tede ahih lawngtah Ciim Muithla oen baptisma m'peek ai,” a tina.
Jesuh Kah Baptisma A Dangna Oen Suek-halh A Tawngna
(Mt 3.13-4.11; Lk 3.21-22; 4.1-13)
9 Tecoeng kalawng a awm raih thlan ah Jesuh tah Galili peng Nazaret khaaw kalawng va law tih Jordan tuiva ah Johan lawng baptisma a peek.
10 Jesuh te tui dawng kalawng a thawh hang khoeng vengah vaan te awng u tih ahih sawah Muithla akhuu angla a cuuk te a huh.
11 Vaan kalawng aka law awl lawngah, “Nang tah kan thintlawhna ka Capa ni, na sawah ka kaw tluep, tangkiik” a tina.
12 Tecoeng atah Muithla lawng ahih te ramhum huhang la a tuih pahoei tih,
13 Te ah te khawhin sawmlii awm tih Seitan lawng a suek a halh. Ramsatlung thli khaw te ah te awm, tede vanthlaang thli law u tih Jesuh te a bawm acem u.
Jesuh Lawng Tuihawi Thlaang Palii A Khue
(Mt 4.12-22; Lk 4.14-15; 5.1-11)
14 Johan te thong a tlaak coengah Jesuh tah Galili ram la cet tih Pathen tengkah Awlthang Theen te a phawng.
15 “Atue atang tah avan pha khuek poen! Pathen ukna tah yoeii poen! Na thawlhna yut u langtah Awlthang Theen he tangna uh!” tila a thui.
16 Galili tuikeeng ah Jesuh a ceh phai vengah tuihawi thlaang pahih Simon oen a manau Andru lok a heeng hih te a huh.
17 Jesuh lawng ahih rawi nala, “Ka hu ah bang hih lah, thlaang tukung la kan coengg sak hih ai,” a tina.
18 Tevengah lok te pak a tloeng hih tih Jesuh hu ah bang hih pahoei.
19 Ahih tah cet hot phai tih Zebedi ca rawi Jeem oen Johan boeinau te a huh. Ahih rawi tah lowng khuiah lok te a baw hih.
20 Jesuh lawng a huh pahoei oen te rawi te a khue. Ahih rawi lawng ana pa Zebedi oen a bii aka bi pe thlaang thli te lowng khuiah a ceh taak hih tih Jesuh hu ah bang hih pahoei.
Raaithe aka Khueh Thlaang Pakhat
(Lk. 4.31-37)
21 Jesuh oen a hubang hue Kapernaum khawpui la law u tih Sabbath hin ah Jesuh te Sinakok la cet tih cang puei ham a tong.
22 Jesuh lawngtah Phungawl cangpueikung hue angla cang puei nawh tih sai thaina aana aka khueh angla a cang puei dawngah ahih kah cangpueina aka ya boeih lawngtah a kawpoek rai u.
23 Tevengah te a kaw khuiah raaithe aka awm thlaang pakhat sinakok bok-im khuila law tih rih oen thuen ruila paang,
24 “Nazaret Jesuh, kaimi he metila sai ham na ngaih? Kaimi he phe ham aw na law? Nang he me ang thlaang ti he kan ming: Nang tah Pathen kah laipai thlaang ciim ni” a tina.
25 Jesuh lawng raaithe te, “Awm duem lah, te thlaang kaw khui kalawng co loeih!” tila awl a peek.
26 Raaithe lawng te thlaang te a ngaih hlang la a thuen sak, rih oen thuenn doe ah paang tih te thlaang kah a kaw khui kalawng co.
27 Thlaang boeih te a kawpoek rai u tih khat oen khat te, “He he me ang kai? Cangpueina a thaai phun tloe kai aw? He thlaang lawng raaithe te aana oen awl a peek tih ahimi lawng awl a ngaai pe,” ti u.
28 Tedawngah Jesuh kawng awlthang te kawlkalh maiah Galili peng khaaw tawm ah thaang khonghak.
Jesuh Lawng Thlaang Moen A Hoeih Sak
(Mt. 8.14-17; Lk. 4.38-41)
29 Jesuh oen a hubang hue, Jeem oen Johan mi khaw, sinakok kalawng tho u tih Simon oen Andru im la poe cet u.
30 Simon kah a mase hutaa te tlo tih ral. Jesuh te a paipuek ah ahih kah sading nawh kawng te a thui pe u.
31 Jesuh lawng a tengla cet tih ahih te a kut ah a phoeih tih a thawh hang. A sa ding pahoei tih ahimi te a do a dan.
32 Khaw a tlaak coeng thlem khup atah thlaangping lawngah thlaangtlo boeih oen raaithe aka khueh thli te Jesuh tengla avan law puei u.
33 Te khawpui khuikah thlaang boeih tah im haiah tun u boeih.
34 Jesuh lawng tlawhnatna soeprep boeih oen aka tlo thli te a hoeih sak tih raaithe thli khaw boeih a hek. Jesuh he me ang thlaang tite raaithe thli lawng a ming u dawngah Jesuh lawng raaithe thli te awl kam at khaw thui sak u nawh.
Galili ah Jesuh Phung A Thui
(Lk. 4.42-44)
35 Avuen khawhin mincanghi khaw a thaih thlan ah Jesuh tah tho tih khawpui adauben ading asuekna huen la te cet tih te ah te thangthui.
36 Simon oen a paya thli lawng ahih te a tlap tih,
37 a huh u vengah, “Thlaang boeih lawng nang he n'tlap u ta,” a tina u.
38 Tede Jesuh lawngah, “He kah atloe khaaw teng khaaw vai la cet u sih. Ahimi tengah khaw phung ka thui ham awm. Te ham ni kai ka law roe ta,” a tina.
39 Tedawngah Jesuh tah Galili peng tawm ah cet, sinakok bok-im boeih ah te phung a thui tih raaithe thli khaw a hek.
Jesuh Lawng Thlaang Pakhat A Hoeih Sak
(Mt. 8.1-4; Luk 5.12-16)
40 Haibe aka tlo thlaang pakhat Jesuh tengla law tih khuklu oen cuengkueng ruila, “Na kawngaih atah nan hoeih sak thai,” tila reenna a bih.
41 Jesuh lawng a reen tangkiik dawngah a kut a thueng tih a tek, “Hoeih sak ham ka ngaih ta, hoeih loeih,” a tina.
42 Kawlkalh ah haibe natna te hoeih tih ciim pahoei.
43 Tecoengah Jesuh lawng ahih te he tila awl ceet ceet a uen tih a tuih pahoei.
44 Hutung lah! He kawng he a-u tengah khaw thui boel. Tede khawsoeih tengla cet phaat langtah na pum te nueh lah; tecoengah nang na hoeih poen tite thlaang boeih lawng a mingna ham Mosi kah awlpeek angla thawthuengna te sai,” a tina.
45 Tede te kah thlaang lawng cet tih amah aciimna kawng te a thui tih khaaw tawm ah thaang khonghak. Ahih lawng he kawng he yahawh la a thui lat dawngah Jesuh tah khawpui khuila langya ah cet thai tlaih nawh poen. Khawpui adauben adingruena huen ah awm tih te la te khaw tawm kah thlaang thli te a tengla law u.