JOHAN
CAPAT PAKHATNA
(1 JOHN)
Johan capat pakhatna dawngah mengtengna tungpui pahih awm: Pakhatna tah he ca aka tae thli te Pathen oen a Capa Jesuh Khrih oen ah pawlneeng haih ham tih pahihna tah he pawlneengna aka phe cang puei thawlhna kalawng ngaithuen sak ham thapeekna ni. He cang puei thawlhna tah he dilai dawngkah atheenna he dilai pumsa tuhkaina oen a thoeng dawngah thaihu boeih he thawlh boeih. Tedawngah Pathen Capa Jesuh Khrih he thlaanghing pumsa tangtang la a awm atah he dilai oen tuhkaina a awm dawngah thawlh van ai, tede thlaanghing pumsa la awm nawh tila cangpueina dawngah kung asut. He tila cangpueikung thli lawng thlawnna he dang ham tah he dilai kah hingna oen tuhkai u nawh tih khawboe ramlang theen, paya laikoei lungna he ngoe mai nawh tila a cang puei.
He cang puei thawlhna asoeng nawh te tueng sak ham he ca he a pat pe tih Jesuh Khrih tah thlaanghing pumsa taktakla va law, Jesuh aka oeng tih Pathen aka lungna lawngtah pakhat oen pakhat lung u ham awm tila cathutkung lawng aciimphanla a thui pe.
1
Hingna Awl
1 Acuekca veng kalawng aka awm tangte hingna Awl kawng te nangmi tengah ca oen kavan thut u. Te kawng te kaimi lawng ka yaak u, mik oen ka huh u tih ka kut oen ka tek u.
2 He hingna he huh thai la ava coengg vengah kaimi lawng ka huh u, tedawngah Pa oen aka awm haih tih mami tengah avan tueng sak dungyan hingna kawng te nangmi tengah kavan thui u.
3 Kaimi lawng ka huh u tih ka yaak u te nangmi tengah khaw kavan phawng u. Pathen oen a Capa Jesuh Khrih oen ah kaimi lawng ka khueh pawlneengna dawngah nangmi khaw na thuum thaina ham kaimi lawng ka huh tih ka yaak te nangmi tengah khaw kavan phawng u.
4 Kaimi kah awmngaih asoepna hamla he ca he kaimi lawng kavan thut u.
Pathen Tah Aangna Ni
5 Tahe ah, a Capa teng kalawng ka yaak u tih nangmi tengah kavan phawng u awl tah he ni: Pathen tah aangna la awm tih ahih dawngah yiinna roeroe awm nawh.
6 Tecoengah mami lawng ahih oen pawlneengna ka khueh n'ti u tih yiinna khuiah ng'awm u atah mami tah awlkaa oen khawseh, saina oen khawseh, hoem awl ni n'thui u.
7 Tede ahih tah aangna la a awm angla mami lawng aangna ah ng'awm u atah pakhat oen pakhat pawlneengna mami lawng n'khueh u tih a Capa Jesuh thisen oen soeprep thawlhna kalawng mami n'silh poen.
8 Mami lawng thawlhna ka khueh nawh n'ti u atah m'mah oen mah he, thailatna u tih mami khuiah awltak awm nawh.
9 Tede mami lawng thawlhna boeih te Pathen tengah m'phawng u atah ahih tah a awlkam cak tih thaihu doeng a sai dawngah mami thawlhna boeih te khawdawp a ngaai vetih mami kah sai thawlh boeih te avan ciim sak ai.
10 Mami lawng ka thawlh nawh n'ti u atah Pathen te hoem thui la n'sai u tih amah awl te khaw mami khuiah awm nawh.