TESALON
Thlaang Thli Tengah Pawl Kah Capat Pahihna
(2 THESSALONIANS)
Tesalon khrihcabu khuiah Khrih a lawkoepna kawngah awlpuungna a awm toeng toeng dawngah Bawipa a lawna khawhin avan pha coeng poen tila aka tangna Tesalon thlaang thli tengah capat pahihna he Pawl lawngah a thut pe. Te ang poekna te Pawl lawngah a tlaih avawng pe tih Khrih a law koep thlan ah Khrih amah te oelhtaihkung “Thlaang The Pui” kah mawtna rang oen ah theenna nawh oen athe-arana boeih athe khuetna toe a pha ai tila a thuituen. Celtuih Pawl lawngah he capat aka tae thli tengah awlpuila thui a ngaih tah raina oen patang khangna aka tlo tangkiik te van pha mai cakhaw na oengna dawngah acakla pai uh, na hingna oen khawsakna dawngah kai oen ka paya thli kah hingna he oett uh, kaimi lawng bii ka bi angla he atheenna te sai yoeyah uh, tila a uen a tawn.
1
1 Pawl, Silas oen Timote lawngah mami kah Pa Pathen oen Bawipa Jesuh kah thlaang thli, Tesalon khaw kah khrihcabu tengah ca kavan pat u.
2 Mami kah Pa Pathen oen Bawipa Jesuh Khrih lawngah nangmi te lungvatna, ngaimawngna m'pe hawn seh.
Khrih A Law Vengah Awlcekna
3 Maya manau thli, nangmi hamla Pathen tengah awmngaih ciil ka thui u poepa. Te tila awmngaih ciil thui te aka soeng ni, metihtiah nangmi kah oengna tah roeng hang tangkiik tih nangmi pakhat oen khat na lung u te a roeng hang tare dawngah ni.
4 Tedawngah nangmi kawng te Pathen kah khrihcabu thli tengah kamami roe lawng ka thangpawmna u. Nangmi lawng heemtekna oen patangraina na khang tangkiik u de na ueh thai u tih na oeng u dawngah kaimi lawng ka thangpawmna u.
5 He ang thli boeih lawngah Pathen kah awlcekna tah doeng tila a tueng sak tih nangmi tah Pathen Ram oen ah aphu ating-atawkk thlaang la na coengg u ai. Te ham ni nangmi lawng patangraina na khang u.
6 Pathen lawngtah asoeng ni a sai; nangmi patangraina aka pe thli te patangraina a peek van ai.
7 nangmi patangraina aka khang thli oen kaimi he khaw hoeikhangna te m'peek ai. He patangraina tah Bawipa Jesuh lawng amah kah thara vanthlaang thli oen ah,
8 hairawng haialh oen a law vengah, Pathen aka hoett thlaang thli oen mami kah Bawipa Jesuh Khrih kawng Awlthang Theen aka vai nawh thli te dan a tat ai.
9 Ahimi lawng dungyan rawkna, dantat patangna te a khang u ai, Bawipa lawng amah kah thlaang boeih teng kah ruep-awmna oen ah amah aka oeng thlaang boeih tengkah hinyahna te dang ham,
10 a lawna khawhin ah ahimi tah Bawipa teng kalawng ah thek u boeih ai. Nangmi tah kaimi lawng ka phawng awlthang te na tangna u dawngah Bawipa te ruep-awmna oen hinyahna aka pe thlaang thli tim ah na thuum u ai.
11 Te kawngah ni nangmi ham kaimi ka thangthui u poepa. Amah lawng nangmi n'khuena oen ating atawkk la na hingna u thai ham kaimi lawng mami kah Pathen tengah ka bih u. Pathen lawng amah kah huham tharana oen ah nangmi lawng na ngaih boeih theenna te van soep sak selangtah oengna oen bii na sai te van tluep sak seh.
12 He tila te mami Bawipa Jesuh miing lawngah nangmi rang oen ah ruep-awmna te a dang vetih, mami kah Pathen oen Bawipa Jesuh Khrih kah lungvatna rang oen nangmi lawngkhaw amah teng kah ruep-awmna te na dang u van ai.