GALATI
Thlaang Thli Tengla Pawl Kah Capat
(GALATIANS)
Jesuh kawng awlthang theen te Judah thlaangphun la aka awm nawh thlaang thli tengah phawng la awm tih a do u vengah Khrihca tangtang la awm ham Mosi kah Phungawl he vai ham angoe aw, ngoe nawh aw tila awldoetna he awm hang. Pawl lawng atah Phungawl te vai ham ngoe nawh tila a oelh. Atak tang atah Khrih ah hingna kungpui tah oengna bueng oen ni a awm tih te oengna oen ni Pathen oen thlaanghing boeih he roeproeina a awm ti. Tede Galati peng kah khrihcabu tim ah Pawl aka oelhtaih thlaang khatsut law u tih Pathen oen roeproeina ham tah Mosi kah Phungawl te vai hamla angoe tila a tina u. Galati peng he tah Rom acoyah kah ukkhui Asia Maina kah peng pakhat ni.
Pawl lawngah Galati khaw la capat a thut he tah asoeng nawh cangpueina ah aka cet thawlh hue te oengna aka soeng tih saina aka doeng dawngah te mawt koep hamla a kamthlahna ni. Pawl lawngah Jesuh Khrih kah celtuih pakhat la a awmna kawng oen awl a tong tih celtuih la a awmna he thlaanghing kah saithaina aana oen khue la awm nawh tih Pathen kah khuena oen ah celtuih la a awmna te a thui. Bii a bi khaw awlpuila Judah thlaangphun la aka awm nawh thlaang thli ham ni tila a thui. Tecoengah awlpuungna kawng te koep avoel tih Pathen oen thlaang boeih roeproeina he tah oengna bueng oen ni tila a thui. A cathut aboetna aboel dawngkah awlcuina atah khrihca khawsakna khawboe ramlang he Khrih oengna dawng kalawng aka thoeng lungna dawng kalawng ni a law tila Pawl lawng a thui tih aboet sak.
1
1-2 Galati peng kah khrihcabu boeih tengah kai Pawl lawngah ca kavan pat. He kah ka tengah aka awm maya manau boeih lawngah kan toei u. Kai he celtuih la awm ham khuena he tah thlaanghing teng kalawng law nawh tih thlaanghing kah tuih nawh ni; tede Jesuh Khrih amah te duekna kalawng aka thawh sak Pa Pathen tengkah khuena ni.
3 Mami kah Pa Pathen oen Bawipa Jesuh lawngah lungvatna, ngaimawngna te nangmi m'pe hawn seh.
4 Mami he tahe vengkah atue the khui kalawng loeih sak ham mami kah Pa Pathen kawngaihna te a vai tih mami kah thawlh dawngah Khrih lawng amah oen amah te pe u.
5 Pathen tengah dungyan toela ruep-awmna tah awm hawn seh! Amen.
Awlthang Theen tah Pakhat Bueng Ni
6 Ka kawpoek rai tangkiik mah aw! Khrih kah lungvatna oen nangmi khuekung te bawtbet khawlai kawl-kalhca maiah na hoett u tih awlthang theen atloe te na do u.
7 Ataktang atah, “awlthang theen atloe” awm nawh, tede he tila ka thui he tah, nangmi te ngaihangtum la n'khueh tih Khrih kah awlthang theen te thawveel hamla aka yawm thlaang khatsut a awm dawngah ni.
8 Tede kaimi lawngkhaw, vaan kah vanthlaang lawngkhaw, nangmi tengah awlthang theen te van thui u mai cakhaw kaimi lawng ka thui tangte oen aka lo u nawh awlthang theen te aka thui tah hell ah kawsi yawkk seh!
9 Kaimi lawng kavan thui u poen de tahe ah ka thui koep ai: nangmi lawng na do tangte awlthang theen oen aka lo u nawh awlthang theen te aka thui tah hell ah kawsi yawkk seh!
10 He tila ka thui he thlaanghing kawkhuekna dang ham aka yawm angla ka awm aw? Te tila dang ham ka yawm nawh! Pathen kah kawkhuekna te ni ka ngaih. Thlaanghing teng kah mik-hai theen te dang ham ka yawm aw? kai lawng te tila dang ham ka yawm khiing atah kai he Khrih kah tuihyoeihthlaang la ka awm manawh.
Celtuih La Pawl A Awmna
11 Maya manau thli, nangmi teng-ah kavan thui awlthang theen he thlaanghing teng kalawng akung tong la awm nawh tite kavan thui u ai.
12 Te awlthang theen te kai lawngah thlaanghing tengkah ka dang nawh tih a-u lawngkhaw kai he n'cang puei nawh. Te tah Jesuh Khrih amah lawng ka tengah avan phawng ni.
13 Kai lawng Judah bokna dawngah ka tlungmu veng kah ka hingna te nangmi lawng na ming u poen, kai lawng reenna khueh muehla Pathen kah khrihcabu te ka heem ka tek tih amilh amoeng hamla ka sai.
14 Judah bokna phung-alam vaina ben ah ka thawnpuei Judah hue lak ah ka cawh ngaai tih mami patuer thli kah awlro te khaw alawnla ka vai ngaai.
15 Tede Pathen lawng a lungvatna oen ah ka thang thlan veng kalawng n'tuek poen tih amah kah bii bi hamla n'khue.
16 Gental thlaangphun tengah amah kawng Awlthang Theen phawng hamla amah capa te kai tengah avan tueng sak vengah te a-u tengah khaw poekna bih ham ka cet nawh.
17 Kai he celtuih la ka awm thlan ah lamhala aka awm thli te huh ham Jerusalem la ka cet nawh. Arabia la te ka cet pahoei tih tecoengah Damaskas la koep ka law.
18 Kum thum coeng dengah Piter tengah hin ha thlai-ngaa ka awm.
19 Bawipa amah kah a manau Jeem bueng te ka huh tih atloe celtuih a-u khaw ka hu nawh.
20 Ka thut boeih he aka soeng ni. Hoem ka thui nawh he Pathen lawng a ming!
21 Tecoengah Siria oen Cilicia la te ka cet.
22 Tevengah te Judia ram kah khrihcabu thlaang thli lawng kai he pumpakla m'ming u nawh.
23 Ahimi lawngah a ming u tah, “Mami heemtekkung thlaang lawngah te n'cui ah phe ham a yawm oengna te ni tahe atah a thui poen!” tila thlaangtloe thli kah awlthui te ni a ming u.
24 Tedawngah ahimi lawng kai kawngah te Pathen a thangpawm u.