KOLOSA
Thlaang Thli Tengah Pawl Kah Capat
(COLOSSIANS)
Kolosa thlaang thli tengah Pawl kah capat he, Asia maina khuiah khawpui pakhat la aka awm tih Efesa khawpui kah khawcuuk ben ah aka awm Kolosa khaaw kah Khrihcabu ham a pat pe ni. He Khrihcabu he Pawl amah lawng phueng nawh de bii a bina peng khuiah a awm dawngah he Khrihcabu khuiah ka sai ham koei awm tila a poek. Asia ram Rom acoyah uk khuikah khawpui Efesa khaaw kalawng biibikung thli te a tuih. Kolosa khaaw kah Khrihcabu khuiah asoeng nawh cangpueikung thli awm tila Pawl lawng a yaak. Te kah asoeng nawh cangpueikung thli lawngah Pathen mingna ham oen thlawnna soep dangna ham tah “Muithla ukkung thli oen aana khuehkung thli,” bok hamla awm tila akhaklalla a cang puei u. Te bueng muehla yahhuivuen reetna phung alam thli oen caak awkk oen atloe thaihu dawngah khaw yehna ben phung alam he vai ham awm tila a thui u.
Pawl lawng he ang cangpueina he Khrihca thli kah aka soeng phung alam oen oelhtaih ham ca a thut pe. Ahih kah awlthungna kungpui tah Jesuh Khrih lawng thlawnna soep m'peek thai tih atloe oengna oen saina tah Khrih teng kalawng lawngpui aka phelh sak ni. Khrih rang oen Pathen lawng dilai he a suen tih Khrih rang oen amah tengla a doek koep. Khrih ah pumkhatla awmna bueng dawngah ni dilai lawng thlawnna a dang ai tila ngaiuepna a awm. Tecoengah Pawl lawng he awlthang cangpueina dawngah aka oeng thlaang thli kah hingna dawngah me ang thuingaihna a khueh tite a tueng sak. Pawl kah capat he Tikhikas lawngah Kolosa khaaw la a thak tih Onisimas lawng a puei. Onisimas tah Filemon kah sal la awm tih ahih yuengah Pawl lawng Filemon tengla ca a pat pe.
1
1 Pathen kah kawngaihna oen Khrih Jesuh kah celtuih pakhat la aka awm kai Pawl oen mami kah manau Timote lawng-
2 Khrih oen pumkhatla awmna ah uep-awm maya manau Kolosa khaw kah Pathen thlaang thli tengah ca kavan pat: Mami kah Pa Pathen lawng lungvatna ngaimawngna te nangmi m'pe hawn seh.
Awmngaih Thangthuina
3 Nangmi ham ka thangthui u vengah mami kah Bawipa Jesuh Khrih kah ana Pa tengah awmngaih ciil ka thui u poepa.
4 Metihtiah Khrih Jesuh ah nangmi kah oengna Pathen kah thlaang boeih na lungna u te ka yaak u dawngah ni.
5 Awlthang Theen asoeng taktak te nangmi teng avan pha cuek vengah ngaiuepna m'peek kawng te nangmi lawng na yaak u. Tedawngah nangmi kah oengna oen lungna tah vaan ram ah nangmi ham a khueh ngaiuepna dawngah akung asut.
6 Nangmi lawng Pathen kah lungvatna kawng na yaak cuekca kalawng te lungvatna te ataktangla na ming u veng atah nangmi tim ah apuung ataai van angla te awlthang theen tah dilai pum ah puung khonghak tih yotheen kam-awmna te m'peek.
7 Nangmi lawng Epafras teng kalawng Pathen kah lungvatna te na ming u, Ahih tah kaimi lawng ka lungna biibipuei haih kaimi yuengah uep-awm la Khrih kah biibikung ni.
8 Muithla lawngah nangmi lungna m'peek te ahih lawng kaimi tengah avan thui.
9 Tedawngah nangmi kawng ka yaak cuek veng kalawng nangmi ham ka thangthui poepa u. Amah Muithla lawng m'peek cuihna boeih oen yaakmingna, amah kawngaih mingna oen nangmi na betoetna u ham Pathen tengah ka bih u.
10 Tedawngah Bawipa kah ngaihna angla nangmi lawng na ming thai vetih amah kawhoena te na sai poepa u thai ai. Nangmi kah hingna lawng thaihu theen soeprep boeih a sai vetih Pathen mingna dawngah te na roeng u ai.
11 Soeprep boeih te thinsan kawdaw oen na ueh thaina ham Pathen ruep-awmna huham dawng kalawng aka law tharana boeih oen n'cak sak u seh.
12 Tedawngah a aangna ram ukna khuiah Pathen lawng a thlaang thli ham oepsoehla a khueh thaihu te nang lawng paang thai koei la saikung Pa te awmngaih oen koeh uh.
13 Amah lawng mami he yiinna thara huham khui kalawng n'thlawn tih a lungna a Capa ram khuiah ngaimawngla te n'kuun poen;
14 a Capa rang oen mami tah n'loeih u tih mami thawlhna boeih te khawdawp avan ngaai poen.
Khrih kah A Biibina oen A Thlaanghing Pumsa
15 Khrih tah huh thai nawh Pathen kah huh thai mueisam ni. Ahih tah a Capa camiing la awm tih a sai thaihu boeih lak ah asangluet la awm.
16 Metihtiah Khrih rang oen Pathen lawng vaan oen dilai dawngah aka awm thaihu boeih he a sai, huh thai oen huh thai nawh thaihu boeih, Muithla ben ah tharana thli, bawi thli, ukkung thli oen saithaina aana khuehkung boeih te a sai. Pathen lawng khawhipuempa dawngah aka awm boeih Khrih rang oen Khrih amah ham a sai.
17 Khrih tah thaihu soeprep boeih a awm thlan ah awm poen tih amah oen pumkhatla awmna ah thaihu soeprep boeih lawng amami awmna huen te rip a khueh.
18 Khrih tah amah kah pum la aka awm khrihcabu kah a luu ni; Ahih tah pum kah hingna kungpui la awm. Ahih tah camiing la awm tih thaihu boeih dawngah ahih bueng lawng lamhacuekla awmna huen a khuehna ham duekna kalawng a thawh sak poen.
19 A Capa lawng amah khuiah Pathen pumsa soepbir a khueh he Pathen amah kah awltloekna rang oen ni.
20 Tecoengah Pathen lawng a Capa rang oen khawhipuempa boeih he amah tengla doek koep hamla a ngaih. Pathen lawng a Capa thinglam dawngah a duekna rang oen roeproeina a sai tih vaan oen dilai ah aka awm thaihu boeih te amah tengah a doek koep.
21 N'cuiveng atah nangmi lawng athe thaihu thli na sai u tih, na poek u dawngah Pathen oen na thla u.
22 Tede tahe tah a Capa kah thlaanghing pumsa la a duekna rang oen Pathen lawng amah paya theen la n'sai poen. Te tila a sai he tah amah haiah nangmi te ciimcaih tih cawttbauh aka kap nawh la lawh ham ni.
23 Tedawngah, nangmi lawng thincak oen ayung na pengnelna dawngah te oengna oen acakla pai uh, awlthang theen na yaak vengkah na khueh u ngaiuepna dawng kalawng namah oen namah te thoeihnawng tlaih boel. He awlthang theen he dilai pum kah thlaang boeih tengah a phawng u tih he awlthang theen hamla Kai, Pawl khaw tuihyoeihthlaang la ka awm.
Pawl kah Biibina
24 Tahe ah nangmi ham patang palai ka khangna dawngah he ka awmngaih, metihtiah Khrih lawng amah kah pum la aka awm khrihcabu ham patang khang hamla aka awm hun te asoepna ham ka pumsa patang khangna oen a yueng ka theng pe.
25 Tedawngah, Pathen lawng Khrihcabu kah tuihyoeihthlaang la kai he n'khueh poen tih bii m'peek he tah nangmi theenna ham ni. Te bii tah amah kah awlthang asoepla phawng ham te ni;
26 te awlthang te yan veng atah thlaangphun boeih tengah phawng ohla a thuh, tede tahe tah a thlaang thli tengah a phawng poen.
27 Pathen kah mengtengna tah thlaang boeih hamla a khueh pe lenna oen ruep-awm tangkiik awlhuep te a thlaang boeih tengah phawng hamla ni. Te awlhuep tah nangmi khuiah aka awm Khrih te ni, thuingaihna tah Pathen kah ruep-awmna te nangmi lawng na khueh u van ai tina ni.
28 Tedawngah kaimi lawng thlaang boeih tengah Khrih kawng he ka thui u. Thlaang boeih lawng Khrih oen pumkhatla awmna ah pakhat rip te thlaangsoep la Pathen haiah pha puei ham cuihna boeih oen ngaithuenna ka peek u tih ka cang puei u.
29 He bii ka bi vengah he Khrih kah peek, ka khuiah bii aka bi tha-awm tharana te hawna oen ka tho ka tat tih bii rai he ngah ngah ka bi.