KAWRIN
Thlaang Thli Tengla Pawl Kah Capat Pahihna
(2 CORINTHIANS)
Kawrin thlaang thli tengla Pawl kah capat pahihna he tah Kawrin khrihcabu oen a kawpoek vai u nawh tih voemtoei pawlneengna a rai vengkah a thut pe capat ni. Khrihcabu khuiah thlaang khatsut lawng Pawl he akhaklalla a oelh a taih u, tede roeproei koep u ham a ngaih tangkiik te a tueng sak tih roeproeina a awm koep coengah metihtlukla a awmngaihna kawng te a thut.
A capat a tongcuekna he amah oen Kawrin khrihcabu roeproei pawlneengna te Pawl lawng a thui tih, khrihcabu khuiah ahih te akhaklalla a oelh a taih u vengah awltlawh oen a thungna kawng te a thut. Te tila awl a thung pe dawngah ahimi lawng yut u tih amah oen roeproeina a awm koep dawngah a awmngaihna te a thut. Tecoengah ahih lawng Judia ram kah khawdeng lungma khrihca thli ham thinkaw thluembuek oen moeihoeihla bawmcemna peek ham Kawrin khrihca thli tengah reenna a bih. A capat aboetna ben yun kah aboel dawngah tah Kawrin khaw kah thlaang khatsut lawng amami tah celtuih tangtang la ka awm u tih Pawl tah celtuih cet thawlh rawlrap ni tila a thui u te a thung pe tih Pawl amah he celtuih tangtang la a awmna kawng te a thut.
1
1 Pathen kawngaihna rang oen Khrih Jesuh kah celtuih la aka awm kai Pawl oen mami kah manau Timote lawng Kawrin khaw kah
Pathen khrihcabu oen Akhaia peng pum ah aka awm Pathen thlaang thli tengah ca kavan pat u.
2 Mami na Pa Pathen oen Bawi-pa Jesuh Khrih lawng lungvatna ngaimawngna te nangmi m'pe hawn seh.
Pawl Lawng Pathen Tengah Uem Awl A Thui
3 Mami Bawipa Jesuh Khrih kah ana Pa oen Pathen, thlaang reenkung mami na Pa, bawmcemna boeih a lawna kungpui Pathen te thangpawm u sih.
4 Raina phun soeprep aka tawng thlaangtloe te bawm thaina ham mami kah raina boeih ah amah lawng mami he m'bawm, te tila thlaangtloe te mami lawng m'bawm vengah Pathen tengkah n'dang u bawmna te n'hawna.
5 Mami lawngah Khrih kah patang khangna te n'dang u van angla Khrih rang oen ah mami lawng Pathen kah bawmna alentloe te khaw n'dang u van.
6 Kaimi lawng patang ka khang u atah nangmi te bawmna ham oen thlawnna ham ni; kaimi lawng bawmna ka dang atah nangmi lawngkhaw kaimi angla bawmna te na dang u van vetih kaimi kah patang khangna, te ang van te nangmi lawngkhaw kawdawna oen ah na ueh thaina ham tharana te m'peek u.
7 Tedawngah nangmi sawah ka ngaiuep-na te tah cak; kaimi kah patang khangna te nangmi lawng na khang u van tih kaimi lawng ka dang u bawmna te khaw na dang u van.
8 Maya manau thli, Asia peng ah kaimi lawng ka tawng u te nangmi ming sak hamla ka ngaih u. Kaimi sawah thalrih avan khueng u te bo aih tih arih aih tangkiik dawngah hing ham pateng ka ngaiuep tlaih nawh poen.
9 Kaimi he duek sak hamla awl a tloek u poen tila ni ka poek u. Tede he tila a awm he tah mami lawng mah oen mah te uepna ohla, thlaangduek aka thawh sak Pathen te uepna ham ni.
10 Nangmi lawngah kaimi he thangthuina oen nan bawm u van angla, rih awm tangkiik duekna kalawng kaimi he amah lawng n'thlawn tih hailam ben ah khaw n'thlawn baal hun ai.
11 Tedawngah nangmi lawng kaimi ham na thangthui poepa u te Pathen lawng avan thung vetih kaimi he yotheenna n'peek ai, thlaang yahawh lawng a awl a huer u vetih kaimi ham awmngaih ciil a thui u ai.
Pawl Lawng A Kamthlahna Te A Thaw Aleng
12 Kaimi lawng ka thangpawmna u tah he dilai dawng hing vengah awlpuila nangmi oen tuhkaina ah he thlaanghing kah cuihna nawh tih Pathen kah lungvatna huham tharana oen ah Pathen kah peek thinkaw ciimna oen thinkaw doengna oen ah ukna he athe atheen pekbona thinkaw oen m'ming sak he ni.
13 Ca kavan thut u he tah nangmi lawng na tae thai tih na yaakming thai koei ni kavan thut.
14 Tede tahe ah nangmi lawng kaimi nan ming u he tah avaang-athal mai ni, nangmi lawng kaimi he asoep heet la nan ming u ngai ai tila ka ngaiuep, mami kah Bawipa Jesuh Khawhin atah nangmi lawng na thangpawmna u tah kaimi vetih, kaimi lawngkhaw ka thangpawmna u tah nangmi van ai.
15 He ang thli he ka tangna khaklal dawngah nangmi lawng yotheenna arepla na dangna u ham lamhacuekla nangmi tengah yin hamla ka kamthlah.
16 Judia ram ka ceh vengah nangmi tengkah bawmna ka dangna ham ah Macidonia la ka ceh ah te nangmi tengla ka law silangtah ka mel ben ah khaw ka law koep ai tila ka kamthlah.
17 He tila kamthlah he thinkaw coep-hoeh la aw a awm kai? Ka kamthlah vengah he mah ham bueng poekna thinkaw khueh tih, “Oeih, oeih” ti oen ah, “Moenih, moenih” tila vai at maiah aka thui la ka awm aw?
18 Pathen tah uep-awm la awm tih awltak a thui angla nangmi tengkah ka awlkam he khaw, “Oeih,” ti oen ah, “Nawh ni” tila kawpoek thlumthle awl nawh ni.
19 Metihtiah, Silas, Timote oen kamah lawngkhaw nangmi tengah kavan phawng u Pathen Capa Jesuh Khrih te tah “Oeih” ti oen ah, “Nawh ni” tila thlumthle awl aka thui nawh ni. Tetih ohla ahih tah Pathen kah, “Oeih” tina ni.
20 Metihtiah ahih tah Pathen awlkam boeih dawngah “Oeih” tina ni. Tedawngah Jesuh Khrih rang oen Pathen kah ruep-awmna ham mami lawng, “Amen”, tila n'thui u.
21 Kaimi oen nangmi he thik at la a sai tih Khrih oen ah pumkhatla aka hing sak tah Pathen amah ni; mami he athloekla aka thloeng tih,
22 amah koe la awmna miknoekna te mami sawah a deng tih mami ham a toen oepsoeh boeih te aamahkhanna ham mami thinkaw ah Ciim Muithla pekung tah Pathen amah ni.
23 Pathen tah kai ham sausi la awm, amah lawng ka thinkaw a ming! Kawrin khaaw la law nawh ham kaw ka poek he tah nangmi na sa a suengna ham ni.
24 Nangmi lawng me ang na tangna ham koei tite nangmi tengah thui ham ka yawm u nawh; nangmi tah oengna dawngah acakla na pai u tite kaimi lawng ka ming. Tedawngah namami kah awmngaihna ham ni nangmi oen bii m'bi haih u.