KAWRIN
Thlaang Thli Tengah Pawl Kah Capat Pakhatna
(1 CORINTHIANS)
Kawrin thlaang thli tengah Pawl kah Capat Pakhatna he tah Kawrin Khaaw ah Pawl amah lawng a pai sak khrihcabu khuiah Khrihca khawsakna oen oengna kawngah awlpuungna oen tuhkai u. Teveng san ah te Kawrin khaaw tah Krik ram kah thlaangphun soeprep khaw a sakna khawpui la awm tih Rom ram uk khui Akhaia peng kah khawpui pakhat la khaw awm. Thaihu thaiha kaawn-ava tangthung tanglengna khaw, siing-ayoe ben ah khaw, thawlhna ben ah khaw, bokna ben ah khaw aphun soeprep awm tih a miing thaang soeh.
Celtuih lawngah awlpuila ca thut ham a ngaih he tah khrihcabu khuiah pekbona oen thawlhna, hutaa tawngpa thawlhna oen yu lawh vaa sakna, luciik thawthuengna meh te caak tueng oen caak tueng nawh kawng, khrihcabu khuiah bokna phung alam, Ciim Muithla kah kutdo kawng oen thawhkoepna kawng te awlpuungna a awm dawngah ni ca a thut pe. Pawl lawng adung hlang acek aneh la a poek heet tih he kah awlpuungna kawng he Awlthang Theen lawng metila a thui tite a tueng sak.
Pathen lawng atheen koek kutdo a thlaang thli tengah a peek lungna kawng a thuina aboel thlaithumna he tah, he cabu khuiah, thlaang yahawh kah a ming koek awl la te awm mai ai.
1
1 Pathen kawngaihna oen Khrih Jesuh kah celtuih la awm ham khue la aka awm Kai Pawl oen mami kah manau Sostenes lawng -
2 Pathen kah thlaangciim la awm ham khue la aka awm tih Jesuh Khrih oen tuhkaina rang oen ah amah kah a koe la aka awm Kawrin khaaw kah Pathen Khrihcabu, mami oen ahimi kah Bawipa la aka awm Jesuh Khrih te a bok tih khaaw tawm ram tawm ah aka awm thlaang thli tengah khaw, naangmi tengah khaw ca kavan pat u:
3 Mami kah Pa Pathen oen Bawi-pa Jesuh Khrih lawng lungvatna, ngaimawngna te nangmi m'pe u hawn seh.
Khrih ah Yotheen Kam-awmna
4 Khrih Jesuh rang oen lungvatna te nangmi m'peek dawngah Pathen tengah awmngaih awl ka thui poepa.
5 Metihtiah Khrih oen pumkhatla awmna rang oen ah awlcal thingkaa oen thoemthai cuihna boeih ah khaw soeprep boeih ah na bawireng soeh u poen.
6 Khrih kawng awlthang te nangmi kaw khuiah acakla awm poen tih,
7 mami kah Bawipa Jesuh Khrih te na lamtoen u vengah he yotheen kam-awmna pakhatca khaw avoetna na khueh nawh.
8 Mami Bawipa Jesuh Khrih khawhin ah cawttbauh kap awm nawh hamla amah lawng aboet toela nangmi te n'cak sak ai.
9 A Capa Jesuh Khrih mami Bawipa oen pawlneeng haih hamla khuekung Pathen tah uep-awm ni.
Khrihcabu Khuiah Pekbona
10 Maya manau thli, mami Bawipa Jesuh Khrih kah saithaina aana oen nangmi boeih tengah reenna kavan bih u, nangmi tim ah pekbona a awmna nawh ham awlthui kaalai dawngah na kaw vai u sak. Poekna pakhat, mengtengna pakhat oen ah awm uh.
11 Maya manau thli nangmi tim ah tawhsina awm tih Khloe kah imkhuikaw thlaang pakhat lawng avan thui.
12 Ka thui ngaih tah he ni: Nangmi pakhat rip lawngah athloek athloekla na thui u. Pakhat lawngah “Kai tah Pawl kah hubang ni” ti tih atloe khat lawngah, “Kai tah Apollos kah hubang ni,” ti, atloe khat lawngah, “Kai tah Piter hubang ni,” ti tih atloe khat lawng, “Kai tah Khrih hubang ni.” tila a thui u ti he ni.
13 Khrih he bu la pekbo u aw! Nang ham thinglam dawngah Pawl aw aka duek! Nangmi he Pawl kah hubang la awm ham aw baptisma na dang u?
14 Krispas oen Kaias bueng nawh atah nangmi tim kah a-u khat khaw baptisma ka peek nawh dawngah Pathen te ka uem tangkiik.
15 Tedawngah kamah kah hubang la awm ham baptisma ka dang tila a-u khat lawngkhaw thui thai manawh.
16 (Aw, Stetanas oen a imkhuikaw te baptisma ka peek; tede atloe baptisma ka peek te ka ming nawh.)
17 Khrih lawngah kai he baptisma aka pe hamla n'tuih nawh. Thinglam dawngah Khrih kah duekna te ahongla a coenggna nawh ham thlaanghing kah cuihna te hawna ohla Awlthang Theen thui hamla ni n'tuih.
Khrih Tah Pathen Kah Tharana Oen Cuihna ni
18 Metihtiah thinglam dawngah Khrih kah duekna kawng awlthang he ha-ata lii thlaang thli hamla tah awlpoei la awm de, mami thlawn la aka awm lii hue ham tah Pathen kah tharana ni.
19 Caciim lawngah,
“Thlaangcuih thli kah Cuihna te
ka phe vetih thoemthaina
aka khueh thlaang thli kah
mingna te khaw ka hoett pe
bangtlang ai.” tila a thui.
20 Tedawngah thlaangcuih thli te mela a awm ai? Thoemthaina aka khueh thlaang thli te mela a awm u? He dilai han kah calthai thli mela a awm u? He dilai dawngkah cuihna he tah ngau-athuuna ni tite Pathen lawng a tueng sak poen!
21 Thlaanghing lawng amah kah cuihna oen Pathen te a ming thaina nawh ham amah lawng a cuihna oen a sai poen. Kaimi lawng ka phawng, “ngau-athuuna” a ti u awlthang he aka tangna thlaang te thlawn hamla Pathen lawng awl a khueng.
22 Judah thlaang thli lawng kawpoek rai miknoekna te a ngaih u tih Krik thlaang thli lawngtah cuihna te a tlap u.
23 Kaimi lawngah thinglam dawngkah a ngawn u Khrih te ka phawng u tih te awlthang te Judah thlaang thli ham tah tlimna lungto la awm tih Gental thlaang thli ham tah awlpoei la awm;
24 tede Gental thlaang khaw, Judah thlaang khaw seh Pathen lawng a khue thlaang thli ham tah te awlthang te tah Pathen kah cuihna oen tharana la aka awm Khrih te ni.
25 Metihtiah Pathen kah ngau-athuuna tah thlaanghing cuihna lak ah apuehla cuih ngaai tih Pathen kah thayokna he tah thlaanghing kah tharana lak ah a tha ra ngaai.
26 Maya manau thli, Pathen lawng nangmi n'khue vengah metila na awm u tite tahe ah poek u lah. Thlaanghing kah huhna atah nangmi he thlaangcuih khaw, huham tharana aka awm thlaang khaw, hinyah koei thlaang khaw yoehca mai ni na awm u.
27 Thlaangcuih thli te yah pawh sak ham dilai lawngah n'tu tamu nawh la a poek te Pathen lawng a tuek tih huham tharana aka khueh thlaang thli te yah phueih sak ham dilai lawng tha aka ra nawh thlaang la a poek te a tuek.
28 Dilai lawng awlpuila a poek te phe hamla dilai lawng dapsitla a huh thlaang, thlaangnuih pariing la aka awm, thlaang la khaw a toehtham nawh thlaang te Pathen lawngtah a tuek noeng roe ni.
29 He ngoen tah Pathen haiah a-u khaw oekthloen u thai nawh ti ngaihna ni.
30 Tede nangmi tah Pathen lawng Khrih Jesuh oen pumkhatla n'awm sak poen tih Pathen lawng Khrih he mami kah cuihna la avan sai poen. Ahih rang oen ah mami tah Pathen oen roeproeina awm poen; mami tah Pathen kah a thlaangciim la n'coengg u tih mami he n'loeih sak poen.
31 Tedawngah Caciim lawng, “A-u khaw oekthloen u ham a ngaih atah Bawipa kah thaihu sai dawngah oekthloen u seh,” tila a thui.