5
1 Uvthyi vie kha chuo kha yi, na paa haakhata rue la paakie la chang tie. A syi vie tie kha na nuta haata rue tie yi.
2 Canung uvthyi vie kha na nung haata rue yi la, canung a syi vie tie kha pathiypalung pathesa pata na sieta haata rue tie yi.
3 Nunghlyi a cuo hmisipa tie kha pa-uvsathyi tie yi.
4 Nunghlyi ta saata a cuo li kie samingta a hnyi kieca iema chungkhue cuota ama hrie riypata a cuopa biena luo kuo ta hrie riypa phung kha a cuv taa yi sala ama nungpaa tie kha mangsang hriy yi se; tahematapakieca caca Khazing hmielie palungtluona tana a cuo.
5 Ama se ta a awpa nunghlyi hmisipa ca a nguopuona kha Khazing'a lie chi te, chungzuo ci li pata thlaa a chuo.
6 Cuorasala saapa anuona cuota a hringpa nunghlyi ca a hringpa ta athiypa tana a cuo.
7 Iema ca syisaapa ama cuo li riypata hing nawbie hing pi tie yi.
8 Ahunghmuo cuose a tieriy, a hlyi vie ta a chungkhue kha mangchiy li pata a aw kieca zangna a thawpa hne zanglituv tie laata a chie viepa tana a cuo.
9 Kung sawcaruv a hlyipa hne yikha dyi navaa zaa hnyi buopa kha nunghlyi cazing lie pangie tie.
10 Repha hriena lie ming a hnyipa, a saata zaw a phasa pata a mangchiypa, khyche a duepa, mingpathepa tie phyi a pasiypa, ruvnaana a tawpa tie a byapa, hne hmangpha tuena lie a cuo hne a thaazuo a pipa a cuo aa.
11 A kungnupa nunghlyi tie kha ca cazing lie pangie kha yi; tahematapakieca saapa khingna ta Khrih hne che'a yite navaa ama hnyi khing aa.
12 Cahaa cata bie amaa kuo taapa kha ama para nakawta suephawpa ama cuo aa.
13 Cadyi cuo li pata, ingkha hnang ingkha a khie yite thaathuvna ta ama cuo kha ama pachuo. Ama thaathuvpa dyi cuo li pata malie kaw ri yite, bierangle yite ri li'apa ting ta ama ri.
14 Cacuonakawta a kungnupa nunghlyi ca navaa hnyi pakhaa thluo yi sala, saa sa yi sala amaa chungkhue kha mangchiy yi se tapa i khing. Cata a cuo kieca ma carie tie ta malie rithuochi khu'a vayi.
15 Tahematapakieca nunghlyi chekha ca Setaa ziy riypata amaa pali tli.
16 Zangtuv canungnote 5:16 Hluo vie caa-uv lieca zangtuv capaa* a cuo li kie canung* ta te chekha lieca zangtuv capaa* a ta ta nunghlyi hmisipa tieriy a hnyi kieca, ama ta mangchiy sala khrihsaabuv hmangriy cuo kha se. Cakiedyina khrihsaabuv ta a buchuo riy a hnyi hmisi lipa nunghlyi tie kha aa bya khu'a yi.
17 Khrihsaabuv kha a phasa pata mangsang te a hlyi ta phungri hne pacuv kha te a maapa Khrihsaa uvthyi ca hrie muo lehning ta hmung aa phuvpa tana a cuo.
18 Tahematapakieca Caapathepa ta, "Suo a ciy nguoluopa cuetungpa kha a hmya hy kha," ta te, "Rehrietuv ca hrie muo kha hmung aa tla," a ta.
19 A cawce ta a daakhyituv pahning pathung chuo ama aw li kieca khrihsaa uvthyi kha sue ama phaw tiyta naathlie kha.
20 Suena a tuepa tie kha zaapuv hmielie pasiypa-ya yi la a hrangpa zaw kha ama ciy aa.
21 Hingpa pacuvna hing akuo ta a daana hne thleduona hnyi li pata na ziy riypata Khazing hmielie hne Khrih Zingsuv hmielie hne a tlawpa avuoming hmielieta a raaringna ica pi.
22 Khazing rehrietuv cuo riypata ahung cunglie hmuo a catli pata na kuv va khang kha.
23 Na riy a pasa thesa nakaw khata tiy dyi dang li tli pata mingsuv tiy kha a cawta tah za dang tie.
24 Cawsaa chekha suena ca a siesa pata a luo te ama suena ca iema hluo ta bieripana luo a chiy taa ning kha, a hrangpa tie suena ca a hnang ta aa luo.
25 Cahaa cata repha hriena zaw a luo te, a luo li kie zaw ma nu pari khu aw vyi.