7
1 Cakhutaacata alyi kiy paliy lie avuoming papaliy amaa daapa kha i hmung. Alyi lie cuose, riyliy lie cuose, thingkung cunglie cuose a hruo li riypata thliy luopuv suopaliy kha ama patuv.
2 Avuoming a hrangpa pakha kha a hringpa Khazing caakhe kha a hrie te ningchiyna luo taata a kya kiepa kha i hmung. Alyi hne riyliy para riypata cahrana ama pipa avuoming papaliy kha ue a suopuv ta,
3 "Ma Khazing sii zaw kha ama puo lie caa ma khe diy hluo li yi alyi hne riyliy hne thingkungpa zaw kha para kha ung," a ta yi.
4 Cakhutaata Israel mingphang mekaa taata caa ama khepa bangkhuo ca thaw zakha thaw sawliy thaw paliy a cuopa kha i thyi.
5 Judah phang chung taata thaw hraa hlyihning,
Reubin phang chung taata thaw hraa hlyihning,
Gad phang chung taata thaw hraa hlyihning,
6 Asher phang chung taata thaw hraa hlyihning,
Naftali phang chung taata thaw hraa hlyihning,
Manasseh phang chung taata thaw hraa hlyihning,
7 Simeon phang chung taata thaw hraa hlyihning,
Levi phang chung taata thaw hraa hlyihning,
Issakhar phang chung taata thaw hraa hlyihning,
8 Zebulun phang chung taata thaw hraa hlyihning,
Josef phang chung taata thaw hraa hlyihning,
Benjamin phang chung taata thaw hraa hlyihning ta ama cuo.
9 Cakhutaacata i mang ca ahung -tahmuo ama ri tie li riypa cawsaa-zaapuv kha i hmung. Iema ca ruo ting, phang ting hruo ting taa hne ryi ting taata cuo yite, pangruopa amaa hryi, ama kuv lie chanungbachuv hnaa a cyi yite byithude hmielie hne tuvtaata hmielie kha amaa daa.
10 Khuopuv ta khi yite,
"Khuona ca byithude cunglie
a tupa ma Khazing hne
Tuvtaata huopa tana a cuo!" ama ta.
11 Avuoming bangkhuo ca byithude hne uvthyi tie hne a hringpa saruopa tie kha cadung yite amaa tu, byithude hmielie kha a khuv yite Khazing kha amaa bie.
12 Amen! Thluechiy hne
rungnaana hne singna hne
palungtluona bie hluona hne
pa-uvsathyina hne
cahrana hne lesyina ca chuozaa taata
chuozaa te ma Khazing huopa ta
cuo mangsue! Amen," ama ta.
13 Cakhutaata uvthyi zaw hraw taata pakha ta kama kha, "Pang ruopa a buvpa tie hing ahung zaw tama ama cuo? Khaapa taata ma amaa vaw? ina ta.
14 Kama ta, "Abyipa, nama na a pachang ciy," i ta. Cakhutaa ama ta, "Iema ca ruvnaana lesapa chung taata a vya lawpa tie tana ama cuo. Ama pang kha tuvtaata thiy lie pasuv yite a ruo phaalaa tli," ina ta.
15 Canakaw catana
Khazing byithude hmielie aw yite,
Biena-ing chunglie
chung hne zuo hne amaa bie.
Byithude lie a tupa khata
iema ca a mangchiy yi.
16 Ama nang diy li tli'a pata,
ama tiy zaw hrie'a va tli;
ningsaa ta e li tli'a pa yi ta,
a lingpa khaapatahmuo riethyi pi'a va tli yi.
17 Tahematapakieca
byithude liekhingkhuo lie a awpa
Tuvtaata ca ama tuvkhietuv cuo'a te,
Ama ta iema kha
hringna tiyhnaa luo aa chiy'a yi.
Khazing ta ama mingthliy bangkhuo kha
a hruvpa thluv'a yi."