5
1 Cacuonakawta, kiema ca zangna thueta duopacupa ma cuo nakawta Zingsuv Khrih thueta Khazing hne maa re mangtli.
2 Ama thue cata Khazing vihnyina chung luo kha a ngie pate ma aw. Khazing rungnaana maa hraw aa tapata maa nguopuo nakawta ma thaa a pha.
3 Cadyi ca cuo vyi, te-angna maa taw zaw ta ma palung a tluo ngiethie, tahematapakieca te-angna ca chaw khuna kha chiykhyi te,
4 chaw khuna ta zyazaaphana chiykhyi te, zyazaaphana ta anguopuona kha a chiykhyi.
5 Cakhutaata a ruechuona ta ma palung chuo li pata malie a chi. Tahematapakieca kiema'a luo malie a pipa Khazing duena ca Thlaapa Pathe'a taata ma pathiypalung chung luo kha a bya ta malie a za bya.
6 Khaahmuo a tue khu lipa ma cuo thluo ning, a cuo aa deta ning kha Khrih ca cawsaa a suepa cuo khata a thiy.
7 Cawsaa phapa cuota ca a thiy nguopa ama aw ri aa, cuorasala cawsaa aa dangpa cuota thiy ca a ruvpa hmang tana a cuo.
8 Cuorasala Khazing ta khatluv tama malie a due tapa kha hinghaahingta a paluo sa; a suepa ma cuo nguoluo thluo pata Khrih ca kiema cuota a thiy.
9 A thiyse thueta kiema ca duopacupa ma cuo kieca, Khazing hihaana taata malie khuo li pata ca aw changchiy vyi.
10 A cariepa ma cuo nguoluo ningta a Saacapaa thiyna thueta Khazing hne pare sapa ma cuo kieca, capa pare sa ciepa ta a cuopa ca a hringna ta malie a khuo hryly aa.
11 Cadyi ca cuo vyi, Khazing hneta a rena malie a pahmung satuv ma Byipaapa Zingsuv Khrih thueta Khazing'a lie kha maa law.
12 Cacuonakawta, cawsaa pakha thueta suena ca chuelyi luo vya tlung te, ca suena taacata thiyna a vya tlung. Cakhutaa thiyna ca cawsaa bangkhuo cung luo a tlung, tahematapakieca ama bangkhuo ta ama sue nakawta a cuo.
13 Suena ca phungbie hluo ta hing chuelyi lie hing a aw lu tli, cuorasala suena ca phungbie a aw lina lieca suena ta ripa cuo vyi.
14 Tuokhaata a cuo zaw, thiyna ta Adam chuo taata Moses chuo te kha uv diy yite, Adam a suepa haata a sue lipa zaw cunglie kha hmuota a uv diy yi. Adam ca a vaw riypapaa hmaathla paluosana tana a cuo.
15 Cuorasala a selawpa ta pipa lasaw ca suena hne a lu vyi. Tahematapakieca pakha suena thueta cawsaa hluvpuv kha ama thiy pata a cuo kieca, Zingsuv Khrih ama pakha vihnyina thueta malie a pipa Khazing vihnyina hne a selawpa ta pipa lasaw ca cawsaa hluvpuv cuota khatluv tama a le vie aa?
16 A selawpa ta pipa Khazing lasaw hne cawsaa pakha suena ca a lu vyi. Suena suokha a vya paziypa bierina ca, "Na sue," tapa hingta a cuo. Cuorasala suena hluvpuv a vya paziypa a selawpa ta pipa lasaw ca, maa phuv maa siy lipa "Sue vaciy," tapa biechina tana a cuo.
17 Cawsaa pakha suena thueta thiyna ta cawsaa kha a uv pata a cuo kieca, Zingsuv Khrih pakha thueta tluo a tlingpa Khazing vihnyina hne a selawpa ta pipa a dangna lasaw a cupa tie cunglie hringna ta khatluv tama a uv vie'a yi?
18 Cawsaa pakha suena ta cawsaa bangkhuo kha suephawpa a pacuo sa pahaayita cawsaa pakha adangna ta cawsaa bangkhuo cuota duopacuna hne hringna ta a cuo.
19 Cawsaa pakha ri a ngie lina thueta cawsaa hluvpuv kha a suepa ta a pacuo sa pahaayita, cawsaa pakha ri-angiena ta cawsaa hluvpuv kha aa dangpa ta a pacuo sa'a yi.
20 Phungbie kha aa vaw ca suena kha aa cha tyly, cuorasala suena a chana hmang lie kha Khazing vihnyina ca aa cha hryly ra.
21 Cacuonakawta, suena ta thiyna taata malie a uvpa haata, Khazing vihnyina ta a dangna taata malie uv ra te, Abyipa Zingsuv Khrih thueta chuozaa hringna luo kha malie aa chiy.