3
1 Cacuokie Judah ming amaa suo viena ca khaapa hing maw? A cuo li kie vangdaw a tena muo ca khaapa hing tama a cuo?
2 Amaa suo viena a phangphang tana a aw. A suokhana ta Khazing bie kha cake sa pata ama cuo.
3 A che kha zang a tla lipa ama cuo kie haw, tuokhaatama a cuo aa? Iema zangtluo amaa tla lina khata Khazing zangtluo atlana kha a para'a ma?
4 Cuo changchiy vyi. Cawsaa bangkhuo hing a hangpa ma cuo zaw ta, Khazing ca zangtluo a tla pari aa. Caapathepa ta,
Na ripa bie ta aa dangpa
na cuopa kha paluo sa'a te,
na bie aca ripa thue yi ta na te aa,"
a tapa haakhata a cuo aa.
5 Cuorasala kiema maa dang lina ta Khazing a dangna kha a sie vie ta a paluo sa kie, khaama ri riy a aw'a tli? Khazing ta duo malie a te tiyta a paa ma ta'a ma? (Saapa bie na i ri).
6 Cuo changchiy vyi. Cacuokie Khazing ta chuelyi hing tuokhaatama bie a ripa khu aa?
7 Cuorasala i hangthena hingta Khazing adangna kha paluo sa hryly te a ming rungnaana a cuo kieca, khaapanakawma kama ca a suepa haata bie ripa pa i cuo kalie riypa a aw?
8 Khaapanakawma, cawsaa chekha ta malie pachie yite, iema na a ri yi tapata ama rilepa bie haakhata, "Phana aa vaw riypata hmang pha lipa hrie'a ungpuv," ma ta va ung? Aa phuvsa pata suephawpa ama cuo aa.
9 Cacuokie tuokhaata? Kiema hing ma pha vie ung maw? Cuo changchiy vyi; ma ri ciepa haakhata Judah ming hne Krik ming hne suena cahranapa rawlie ta a awpa tana ma cuo.
10 Caapathepa ta,
Aa dangpa pakha hmuo aw vayi,
pakhata hmuo aw vayi;
11 Pachangna a hnyipa
pakha hmuo aw lipa yi ta,
Khazing a huvpa pakha hmuo aw vayi.
12 Ama bangkhuo ta sichie diy yite,
hmuosa a phapa pakha hmuo aw vayi.
Kawpacuona a hnyipa pakha hmuo aw lipa yi ta,
pakhata hmuo aw vayi.
13 Ama rawkariy ca
aa pahawpa thluokhue hne a lu te,
ama palyi kha dungna ta ama hmuo.
Ama palyi rawlie pariy ca-ie aw te,
14 Ama hmya ca biechiepa hne chiesana ta a bi.
15 Thiyse palang riypata ama phyi catli te,
16 rana hne cuopasana kha ama luopuv lie a bi.
17 Diena luopuv kha pachang lipa yi ta,
18 Ama ming lieta Khazing ciyzaana aw vyi,"
a tapa haa khatana a cuo.
19 Ata hing ca phungbie ta tuokhaata a ri zaw ta, phungbie rawlie a awpa tie huota a ripa kha pachang pate, caca, cawsaa bangkhuo ca duo yi sala, chuelyi bangkhuo hing Khazing hmielie zangtluo aa tla riy'apa tana a cuo.
20 Phungbie ta a ripa ama tuena thueta ahunghmuo Khazing hmiekunglie duopacupa aw vayi, tahematapakieca phungbie ca ama suena tlaku khana a paluo sa.
21 Cuorasala ata hing ca phungbie thueta cuo li pata luopuv hrang taata Khazing adangna ca a luo te phungbie hne profet tie zaw ta amaa daakhyi.
22 Zingsuv zangna thueta hmungpa ca Khazing adangna cuote zangtuv bangkhuo cuota a cuo. Tahematapakieca pahlyipalena khaahmuo aw vyi,
23 ma bangkhuo ta a suepa cuo pate Khazing rungnaana hneta maa hla diy.
24 Cuorasala kiema ca Khrih Zingsuv'a taata a vawpa khuona taata, a vihnyina thueta a selawpa ta duopacupa ta ma cuo.
25 Zingsuv Khrih ca Khazing ta a thiy ta a ngiethena satuv riypata a chipa cuote capa a ngiethena ca Zingsuv Khrih zangna thueta hmung riypatana a cuo. Khazing ta hingpa hmang a tuepa hing ama adangna kha paluo sa riypatana a cuo, tahematapakieca hluo ningta ama tuepa suena kha palung pasiysa pata a ngiethe yite,
26 ata hing ca ama kha aa dangpa a cuona hne Zingsuv a zangtuv tie duopacu sa ama cuona kha paluo sa riypata a cuo.
27 Cacuokieca, hruotle riypa khaama a aw? Khaahmuo aw vyi. Phungbie ma ziy nakawta a cuo ma? Cuo vyi. Zangna thue tana a cuo.
28 Tahematapakieca cawsaapa hing phungbie ta a ripa re hrie nakawta cuo li pata zangna thueta duopacupa a cuopa kha ma ri tli.
29 A cuo li kie Khazing ca Judah ming Khazing dyi ta ma a cuo? Jentail ming Khazing zaw ta cuo ra vama? A cuo, Jentail ming Khazing zaw ta a cuo ra.
30 Khazing ca pakha ta a cuo nakawta; vangdaw a tepa tie kha zangna ta duopacu sa'a yite, vangdaw a te lipa tie zaw kha zangna ta duo a pacu sa'a yi.
31 Cacuokie zangna thueta phungbie ca ma thaw tana ta a cuo ma? Cuo changchiy vyi. Phungbie khana ma pa cu sa vie.