13
1 Uvtuv byi kha ama ri vaa ngie tie ung; tahematapakieca Khazing'a taa ta li pata uvtuv byi aw the vyi. Ata lie uvtuv byi tie zaw hing Khazing ta a pipa tana ama cuo.
2 Cacuonakawta uvtuv byi a dupa ca Khazing ta re a pipa tie a du pata cuo yite, bierina na amaa taw aa.
3 Tahematapakieca uvtuv byi tie ca hmangpha a tuepa tie ta ciy riypa cuo li pata pha lina a tuepa tie dyi ta ciy riypatana a cuo. Uvtuv byi tie ciy li pata na aw khing ma? Cacuokieca hmangphapa kha tue la aca pathuo sa aa;
4 tahematapakieca uvtuv byi ca nama phana cuota Khazing changtaapa a cuopa tana ama cuo. Cuorasala hmangpha lipa na tue kieca, na ciy yi a hu aa, tahematapakieca uvtuv byi ca a cakhawpa ta zueziy kha a cyi vyi! Pha lina a tuetuvpa tie cunglie Khazing hihaana a patlung satuv Khazing changtaapa tana ama cuo.
5 Cacuonakawta Khazing hihaana nakaw dyi ta cuo li pata nama chiephathleduona nakaw khata ama ri kha a ngie tie ung.
6 Ngukhyi nama pipa zaw hing, uvtuv byi tie ca ama cuo bangkhuo uvna luota aa hmuopa Khazing changtaapa ama cuo nakawtana a cuo.
7 Ama hmung riypa a cuopa bangkhuo kha pi tie ung _ pangpa ngukhyi a hmung riypa kha pangpa ngukhyi pi ungla, nama hnyipa hmang ngukhyi a hmung riypa kha nama hnyipa hmang ngukhyi pi tie ung. Hmiezaa tluo a cuopa ca hmiezaa ungla, pa-uvsathyi tluo aa tlapa ca pa-uvsathyi tie ung.
8 Pakha hne pakha a due riypa ri li pata ahung cunglie hmuo lyibuo hnyi kha ung; tahematapakieca cawsaa hrangpa a duepa ca phungbie a patling sa patana a cuo.
9 "Nungvaathingsuena tue kha; lie va naw kha; va paruv kha; malie hmang kha hie va tlie kha; tapa nawbie hne nawbie hrangpa zaw bangkhuo ca, "Na ingpaa kha nama pangpa naa due pahaata va due," tapa bie lie hingna amaa vya sawhmya diy.
10 Duena ta ingpaa cunglie pha lina tue buo vyi; cacuonakawta duena ca phungbie tlingna tana a cuo.
11 Capa khutaa cata, khaapa cuota ma a cuo tapa hne ata cuo hing ca maa hmungna taata maa kya chana cuo tana a cuo tapa kha nama pachang. Tahematapakieca khuona ca zangtuv ma vya cuo baaning ning laa khata malie aa vya ngie vie mangtli.
12 Zuo cuo ca khung tli te ningchung a vya ngie tli. Cacuonakawta zingna hmang tuena kha thuse ung sala khena cehre kha a la ungsiy.
13 Ningchung a cuopa haata pa-uvsathyi tluo aa tla pata aw ung sala, paringpasu pata hne sahmyisahmaa pariy pata aw kha ungsiy, aparuvsuena tue kha ungsiy, mang a ngie li pata aw kha ungsiy, ahru-achie li pata hne i a hnyi li pata aw ungsiy.
14 Abyipa Zingsuv Khrih kha a hryi hriy ungla, saapa khingna palung patluo riypa kha huv kha ungsiy.