11
1 Cacuokie, Khazing ta a cawsaa zaw ca a thaw yi ma? Thaw changchiy vayi! Kama hrahring hing Israel ming, Abraham saming, Benjamin phang ta i cuo.
2 Khazing ta hluo ning taata a za pachang ciepa a cawsaa zaw kha thaw vayi. Caapathepa chunglie Elijah ta Israel ming kawlie kha Khazing'a luo tuokhaatama a ri tapa kha pachang va ung cama?
3 Elijah ta, "Abyipa, na profet tie kha thie yite, na bienatluophie kha ama phi diy; kama dyi hingna a ngaa ang, kama hing hmuo thie inaa nang kalie yi," a ta.
4 Cuorasala Khazing'a taata tuokhaatama a palie? "Kama cuota Baal hmielie a pakhuv a pane lipa thaw sariy i pangaa kalie yi," a ta.
5 Cahaa cata ata cuo lie zaw hing Khazing ta vihnyina ta aa tlawpa amaa ngaa kalie.
6 Cuorasala capa aa tlawpa yi ca tuehriena thueta cuo li pata vihnyina thue tana a cuo. Caacuolikieca vihnyina ca vihnyina ta cuo'a vyi.
7 Cakhutaa, tuokhaama ma ta aa? Israel ming ta ama huvpa kha hmung vayi. A tlawpa tie ta capaca hmung yite, cuorasala aa ngaapa tie ca ama palung kha a pakhung sa yi.
8 Caapathepa lie a capepa ca,
Khazing ta iema kha
ama palung pakhung sa yite,
ata ning tepa hingta
ama ming hmung li'a pata,
ama naa zaw thyi'a vyi," a ta.
9 Cakhutaata David ta ri te,
"Ama cabya ca sariy hne cyihyi ta a li sala,
ama cuota a pachiyna alung hne
phuv aa lana ta a li se.
10 Ama hmung the li riypata
ama ming ca pacuepa cuo sala,
ama ke ca chuozaa ta a kang se," a ta.
11 Cacuokie, iema ca amaa pachiy kie amaa lie'a ma? Cuo changchiy'a vyi. Cuorasala, iema amaa pachiynanote 11:11 Gk Suena thueta Khuona ca Judah ming hietlie riypata Jentail ming'a luo kha aa vaw.
12 Iema a pachiyna ta chuelyi lie thluechiyna a hluvpuv chiykhyi te, iema a sungna ta Jentail ming cuota thluechiyna hluvpuv a chiykhyi kieca, a tlingta tah iema amaa te rapa ca khatluv tama aa ky hryly aa!
13 Ata hing ca niema Jentail ming khana ica ta yi. Jentail ming'a luo lucuotuv i cuo chung bangkhuo ca i re ca i palesakhyi pari aa.
14 I mingphangnote 11:14 Gk I thiysaa zaw zaw kha ama hie patlie sa pata a cawta chuo khuo khu the'a yi angma i tanapa tana cuo.
15 Tahematapakieca, iema kha thawpa ama cuona pata Khazing hne chuelyi a rena ta a cuo kieca, iema kha cuhluo pata ama cuona ca khaapama a lu aa? A thiypa tie cuota hringna na a cuo aa.
16 Viechuo tluo taata tluokha kha Khazing pacuo pate a pathe pata a cuo kieca tluo hrangpa zaw bangkhuo kha pathe te, a thariy kha a pathe pata a cuo kieca a ce zaw kha ama pathe ra.
17 Cuorasala cyipa Oliv kung a nge chekha kha te pata, niema ruo Oliv kung a nge kha iema hmang lieca patue pata, cyipa Oliv kung thariynote 11:17 Hluo vie caa-uv lieca a hnyipa taata* a ta. taata a la kha namaa hraw thluo pata a cuo kieca,
18 tepa nge tie kha ahruo tlesue kha ung. Ahruo nama tle kieca, niema ta a thariy kha ring lipa ung cata a thariy ta niema aca ringpa yi kha a thyi tie ung.
19 Nama ta, "Kama kha patue riypatana a nge kha te pata ama cuo," na ta aa.
20 Capaca aa hmuopa a cuo. Iema ca ama zang li nakawta tepa ama cuo, cuorasala niema ca zangna thue dyi tana nama aw. Cacuonakawta ahruo tle kha ung, ciyna pathiypalung tuv kha hnyi tie ung.
21 Tahematapakieca Khazing ta a nge hmisipa kha ngie a buo li pata a aw kieca, niema zaw kha ngie caa buo ra'a vayi.
22 Cakhutaata, Khazing duena hne ciy aa chiyna kha a thyi tie ung. A liepa tie cuota ciy a chiysa te cuorasala Khazing ta niema cunglie a hnyipa duena ta a duena chunglie kha aca pa-aw sa pazue'a yi. Caacuolikieca niema zaw kha tepachung pata nama cuo ra aa.
23 Cakhutaata, Israel ming kha hmuo ama zang lina kha ama sise kieca patue pakhaa pata ama cuo aa, tahematapakieca Khazing ca iema kha patue pakhaa riypata cahrana a hnyi.
24 Tahematapakieca niema kha ruo Oliv kung taata ca te yite, a phung a cuo li raalaa pata cyipa Oliv kung luo patue pata nama cuo kieca, khatluv tama ace hmisipa a cuopa kha a kung puvnung luo patue pakhaa ca a na vie aa.
25 Cacuonakawta, uvnu hne sieta zaw,note 11:25 Gk Uvnu zaw niema nama cuona laata a sing vie pata a rue kha ung. Hingpa bieparuv hingna ica pachang sa khing yi: Israel ming chekha cunglie ta palung a khungna tlung'a te, caca Jentail ming zangna chung luo a vaw riypa zaa amaa vawna cuote khiy tana a cuo aa.
26 Cakhutaata Israel ming bangkhuo ca khuo pata ama cuo aa. Caapathepa ta,
Zion taata khuona a vaw'a te,
Jakob'a taata pha lina bangkhuo kha
a cade diy aa.
27 Ama suena kha i lapa thue yi ta,
Hingpa biekuona hing
iema hneta i tue aa," a ta.
28 Thuophaabie ta ripa kieca iema ca Khazing cariepa ta cuo yite, caca niema cuota na a cuo. Cuorasala a tlawna ta ripa ta a cuo kieca iema ca ama mingchingmingvuo tie thueta Khazing ta a duepa ta ama cuo.
29 Tahematapakieca Khazing lasaw hne kuna ca a thle buo vyi.
30 A hluo taca niema ca Khazing ri a zaa ngie li pata nama cuo, cuorasala atalie hing Judah ming kha ri amaa ngie li nakawta niema ca Khazing ngiechina kha nama hmung.
31 Cacuonakawta niema nama hmungpa nangduena thue khata iema zaw nangduena ama hmung ra riypata iema ca Khazing ri kha a ngie li pata a pa-aw sa yi.
32 Tahematapakieca cawsaa bangkhuo cunglie nangduena a hnyi the riypata Khazing ta ama bangkhuo khata ri a ngie lina thaw chunglie a chi diy yi.
33 Khazing hing a hnyirung hring-hruo de! A singna hne a pachangna hing aa thuv hringhruo de! A biechina hing ahung ta a khingna capya khu'a te ma, a hmang tuepa hing ahung ta a pachang khu aa!
34 "Tahematapakieca ahungma
Khazing pathiypalung a pachang?
Ahungma ruena a pi khu?"
35 "Ama'a taa lasaw hmung pakhaa riypata,
Ahungma ama kha lasaw a pi buo?"
36 Tahematapakieca hmangting bang-khuo hing ama'a taata hne ama thueta hne ama huopa tana ama cuo diy. A cunglieta rungnaana chuozaa ta aw mangsue. Amen.