4
1 Cacuonakawta, i duesapa hne i vuosapa, i palungtluona hne i byilakhuv ta a cuopa uvnu hne sieta zaw,note 4:1 Gk Uvnu zaw cahaa cata Abyipa chunglie kha a cusa pata a daa mya ung, i duepa zaw.
2 Euodia hne Sintikhe, icaa nue yi, Abyipa chunglie nama palung a palu tie ung.
3 Zangtluo aa tlapa i rehriehne, hingpa canung tie hing zaa bya thi yi la tapata paa ica kie. Tahematapakieca, iema ca Klement hne, hringna caa-uv chunglie ming capepa a hrangpa i rehriehne tie hne khata thuophaabie phuna re kha kama hne a hrie hnepa tana ama cuo.
4 Abyipa chunglie kha nama palung tluo pari se; i ri canyi aa, nama palung tluo se.
5 Nama nangnena kha cawsaa bangkhuo ta pachang yi se. Abyipa ca a vaw patang aa.
6 Khaapa kawlie hmuo nama palung rie thyi kha se. Cuorasala, hmangting kawlie kha thlaachuona, ryiphaacyina hne palungtluona hluona ta nama khingpa kha Khazing ca pachang sa tie ung.
7 Cacuonakawta cawsaa pachangna ta a pha khu lipa Khazing diena ta nama pathiypalung hne nama ruena kha Khrih Zingsuv chunglie aa bangta tah a chi aa.
8 A hnangcawce ta, i duepa zaw,note 4:8 Gk Uvnu zaw aa hmuopa, pathuosa tluo aa tlapa, aa dangpa, a pathepa, palungtluo aa chiypa, khing aa chiypa, a phacepa hne pathuosa aa phuvpa suokhakha a aw kieca, capa kaw ca nama palung lie pari ung.
9 Kama'a taata namaa cuvpa, nama cuhluopa, nama thyipa hne nama hmungpa tie kha tue a zue tie ung. Diena Khazing ca niema'a lie aw mangsue.
10 Kaw ina pacuonapa ung cakha cuo syipuv khu taata nama paluo sa pakhaa nakawta Abyipa'a lie khuopuv ta i law. Hmisi ta kieca i cuo ina ruesa ungciy, cuorasala paluosana cuo za hnyi va ungciy.
11 I hubunapa kha i paluo sa khing pata cuo vyi; tahematapakieca i hnyi thathiypa lie palung tling pata aw kha i the tli.
12 Phahlavuosuo pata awpa hing khaapama a lu tapa pachang ang te, a hlyikhung ta hnyipa hing khaapama a lu tapa i pachang. I riy a bi ning cuose, i nang a diy ning cuose, a hluvpuv i hnyi ning cuose, i phahla ning cuose cuona a phangphang lie kha hringzya i the tli.
13 Thaa naa patlungtuv Khrih thueta hmangting bangkhuo kha i tue khu.
14 Tuokhaa a cuozaw, i palung riethyi ningta inaa bya nakaw ung cata icaa law yi.
15 Niema Filipi khyming ta nama pachang thluo kha, thuophaabie i za ri thaa ning, Masidonia ruo luo i si ning kha niema ri li pata khaapa khrihsaabuv tahmuo pihluona hne cuhluona re lieta kama hne a zaa hrawpa aw vayi.
16 Tahematapakieca, Thesalonika khy lie i aw ning kha a bya i huna lieta yikha laata a hluv vie inaa bya ungciy.
17 Nama lasaw hmung i khingpa dyi cuo vyi, nama cazing lie amie a pahlaw chiy vie se tapa khana i khing.
18 I hupa laata a hluv vie tana ina pi ungciy. Ata lie Epafroditas taata ina vya paphyapa ungciy nama lasaw, rang pa-uepa, cuhluo aa tlapa hriykhung a rina hne Khazing palung a patluopa cunglie hing i palung a tling hringhruo.
19 Cakhutaata, i Khazing ta Khrih Zingsuv chunglie hne a rungnaana chunglie a hnyirungna ta nama phahlana lie kha nama palung ca patling yi se.
20 Ima Paa Khazing ca chuozaa ta pathuosa pata cuo mangsue. Amen.
21 Khrih Zingsuv chunglie ming-pathepa bangkhuo kha nama kuv ica patuv yi. Kama hne a awpa i viesaanote 4:21 Gk Uvnu zaw tie zaw ta nama kuv aca patuv yi.
22 Mingpathepa tie bangkhuo, a hlyi ta siepahruo ingchungkhue tie ta nama kuv aca patuv yi.
23 Abyipa Zingsuv Khrih vihnyina ca nama cunglie aw mangsue.note 4:23 Hluo vie caa-uv lieca Amen* ama bechiypuo kalie.