2
1 Cuorasala hluoning Israel ming hrawlie kha profetpakhipa tie ama za aw; cahaa cata niema hrawlie zaw pacuvtuv pha lipa aw'a yite malie a parapa ruena kha ama chiykhyi aa. Iema a thlatuv yi ama Byipaapa kha hmuo thaw'a yite ama cunglie kha a catlisa pata rana ama patlung sa aa.
2 Cata a cuona cang cata cawsaa hluvpuv ta a pyalyipa ama zyazaa kha ziy yite, iema nakaw cata biehmisipa luo ca ripachie pata a cuo aa.
3 Karuo aw pata niema kha dungviena bie ta dya aca pata'a yi. Hluoning taata thli ciepa iema duotena ca a lie a riy vyi, ama rana riypa zaw a hmung vyi.
4 Khazing ta avuoming a suepa tie kha pahlung li pata hellnote 2:4 Gk Tartaros luo thaw yite biechinapa ning te pahuo sa riypata aa thuvcepa zingna thaabuoliriy ta a hre yi.
5 Hluo chuoning chuelyi zaw kha Khazing ta za pahlung ngiethie vyi. Adangna biephyatuv Noah kha a hrangpa pasariy hneta a khuo raalaa pata Khazing a ciyzaa lipa chuelyi kha tiypa-aa a patlung sa.
6 Sodom hne Gomorrah khypuv kha myi ta duote te buvcuo ta a pali; Khazing siysaa a ri lipa tie cuota a raaringna riypata a tue.
7 Zyazaa pha lipa a pyalyipa aw zya ta khuopuv ta a palung rie a pathyipa Lot kha a khuo.
8 Capa cawsaa aa dangpapaa ca iema'a lie kha khy sa te, ning kha hnang ning kha a hmungpa hne a thyipa ama tuepa a pha lipa khata a palung khuopuv ta a pasa sa.
9 Abyipa ta Khazing a ciyzaapa kha ruvnaana ama angpa chung taata tuokhaatama i khuo'a yi tapa kha pachang te, cawsaa pha lipa tie kha bierina ning te ta duotena chunglie chi riypa zaw a pachang.
10 Cahaapa tie ca a hlyi ta a pyalyipa saapa khingna luo ziy pata Khazing nawhnyina siysaa a ri lipa tie ta ama cuo.
Iema ca ama rie pha te ama khing a pasa, rungnaana a hnyipa tie thuo pachi riypa khahmuo ciy vayi.
11 Avuoming hing iema laata a lesyi viepa hne a cahra viepa ama cuo raalaa pata Abyipa hmielie ca iema kha thuo pachi pata bie ripa'a vayi.
12 Cadyiseca, hingpa cawsaa tie hing ca a khingpa tue cakhaw riypata sapa, patuv pata thie riypata zaa puvpa, ruena a hnyi lipa saruopa hneta a lu yite,
13 ama tue suepa duotena a ang nguoluopa tana ama cuo. Iema ca ningchungsaaraa ta ningdang pata duvkhing ta khi-upa kha anuona ta ama ri. Iema ca nangzaa aa chiypa hne dutla lipa cuo yite, niema hne pyi nama tue pakhawna lie zaw amaa nuona chunglie duvkhing ta a khi-u pata ama cuo.
14 Nungvaathingsuena tue khingna ming dyi kha padyi yite, ama sue khingna ca die buo vyi. Ama palung a diydyapa tie kha ama dung. Karuo awna pathiypalung ama hnyi. Chiesapa saa zaw tana ama cuo.
15 Aa dangpa luo kha thuse yite luo ama pie, hmangpha lipa tuena muo a khingsapa Beor saacapaapa Balaam luopuv kha ama ziy.
16 Cuorasala a suena kawlieta chuopa cuote, bie a ri the lipa laata cawsaapa ryi cyi te profet ngaana kha a thlu.
17 Hingpa cawsaa tie ca a hnaa a ky tlipa acaa hne thliychie ta a phyalepa myiching haata cuo yite, aa thuvcepa zingna kha chipa pata ama cuo.
18 Tahematapakieca iema ca siyluo a hnyi lipa hruotlena bie kha ri yite, suena lie a awpa tie'a taata a vya law thaa baaningpa tie kha saapa suekhingna hneta ama dung.
19 Lawna na maca pi'a yi, tapata bie kuo yite, cuorasala iema hrahring kha rana sii ta ama cuo. Tahematapakieca cawsaa hing suokhakha ta a te kieca capa a tetuv sii catana a cuo.
20 Tahematapakieca ma Byipaapa hne Khuotuv Zingsuv Khrih pachangna thueta chuelyi pyalyina taata ama law khu taata capa chuelyi pyalyina cata patuv pakhaa te a te pakhaa kie yi ca ama cuona thaapa ca ama cuona hlungpa laa khata a chie vie.
21 Adangna luo kha ama pachang khu taata iema'a luo ama pipa nawbie pathepa kha thuse pata hnang luo ama kaapa laa taca za pachang bangby li pata aw yi sala a pha vie aa.
22 "Uv ta a paliy kha ning pakhaa te,
Va ca pasiy khu taata zaw
caakaw luo na aa naw pakhaa,"
tapa aa hmuopa phungthluv haa khatana ma cunglie a tlung.