12
(Mar 2:23-28; Luk 6:1-5)
1 Capa cuo ning, Sabbath ning kha Zingsuv ca lu kha capiepaa le te a si. Ziytuv tie ca ama nang a diy nakawta sa-uv kha pahriy paale yite a chuo kha ama baale.
2 Farasi ming ta ama hmung tiyta, Zingsuv kha, "Mang tie, caa ziytuv tie ta Sabbath ning tue phung a cuo lipa ama tue hing," ama ta.
3 Zingsuv ta, "David hne a cawsaa zaw ama nang a diy ning kha David ta khaapama a za tue tapa kha ri buo va ung cama?
4 Khazing ing chung luo kha a ngie te ama cuose, a viesaa zaw cuose, ningphung a cuo lipa, tluobyi tie dyi ta ning riypa, Khazing ama pipa viechuo ama ning pakha.
5 Cakhutaata Sabbath ning ta tluobyi tie ta Biena-ing chunglie Sabbath phung kha ama para thluo pata a sue tapata ama cuo lipa kha Phungbie caa-uv chunglie ri buo va ung cama?
6 Biehmisi tana ica chang yi: biena-ing laata a le viepa na hingpa lie hing a aw.
7 Caapathepa ta, 'hriykhung a rina laata nangduena na i khing vie,' a tapa hingta khaapama a ri khing tapa kha pachang ungla ca a sue lipa kha sue phaw'a va ungciy.
8 Tahematapakieca Cawsaa Saacapaa ca Sabbath Byi tana a cuo.
(Mar 3:1-6; Luk 6:6-11)
9 Zingsuv ca khapa hmang taakhata pya te apungna-ing luo kha a ngie. Capa lieca a kuv a pakyapapaa kha a za aw.
10 Ama a pachie khingpa tie ta Zingsuv kha, "Sabbath ning ta cawsaa patluo sa phung a cuo ma?" ama ta.
11 Zingsuv ta, "Abiephungpa ta niema chung taa pakhakha hingta tuv sakhata dyi hnyi ungla, kha nama tuv kha Sabbath ning ta khue chung luo a tla kieca thue li pata nama aw'a ma?
12 Cawsaa ca tuv laata khatluv tama muo a hnyi vie! Cacuonakaw Sabbath ning ta hmangphapa tue ca a phung ta a cuo," a ta.
13 Cakhutaa a kuv a pakyapapaa kha, "na kuv pazuo," a ta. Pazuo te a kuv ca hrakha luo haakhata a tluo.
14 Farasi ming ca cakuo yite Zingsuv thie khuna riypa kha khue ama khuo.
15 Zingsuv ta capa kaw ca a pachang tiyta capa taacata a pya. Cawsaa hluvpuv ta ziy yite, a pasapa bangkhuo patluo sa yite,
16 ama kaw kha a ahunghmuo chang li riypata a thlu yi.
17 Hinghaahingta a tuepa ca profet Isaiah pakaa taata Khazing ta:
18 I tlawpa i changtaapa ca hingpa lie hingna a aw.
I duepa ta cuote a cunglie i palung a tluo.
A cunglie i Thlaapa za chi'a ang te,
Ama ta a dangna bie kha
mingphang bangkhuo'a luo a pathyi aa.
19 Ama ca khuopuv ta khi li'a pata,
Ahungtahmuo a ueryi kha Luopuv lieta thyi'a vayi.
20 Adangna kha tena a pacuo sa hluo li
A tlipa phiepahlaa kung kha
thlipachung li'a pata,
A thiy'a nangpa myi-ing kha pache'a vyi.
21 Ama ming ta mingphang bangkhuo kha
a ruechuona ama hnyi aa,"
a tapa patling sa riypatana a cuo.
(Mar 3:20-30; Luk 11:14-23)
22 Cakhutaa Zingsuv'a luo kha khuevuo ta aa hryi nakawta a ming cue te bie a ri khu lipa kha amaa vaw khyi. Zingsuv ta patluo sa te, bie ri khu te a ming zaw a vuo pakhaa.
23 Cawsaazaapuv ca ama nang uo te, "Hingpapaa hing David saacapaa ta a cuo'a ma?" ama ta.
24 Cuorasala Farasi tie ta capa bie ama thyi tiyta, "Hingpapaa ta khuevuo a papya khupa ca khuevuo byipa Beelzebul ta naw a pi nakawtana a cuo," ama ta.
25 Zingsuv ta khaapama ama rue tapa kha pachang te, iema kha, "Khaapa ruo hmuo cuose iema hne iema a che yite a dupa tie ca rana luo na ama chiy aa. Cakhutaa khy khykha a cuo li kie ingchung khue khuekha ca a che te iema hne iema amaa du kieca a daa khu'a vayi.
26 Cahaa cata Setaa ta Setaa kha a papya kieca ama hne ama a dupa cuo te a ruo ca tuokhaatama a daa khu aa?
27 Kama na Beelzebul ming ta khuevuo a papya ang tapata a cuo kieca niema caa ziytuv tienote 12:27 Gk niema saata kha haw ahungma khuevuo papya khunapa kha a pi yi? Cacuonakawta iema khana niema cuota bie a chituv a cuo'a yi.
28 Cuorasala kama na thlaapa cahrana ta khuevuo a papya ang tapata a cuo kieca Khazing pena ca niema'a luo a vaw tli tanapa tana a cuo.
29 Cawsaa thaaruvpapaa kha ciypaki taa li pata ahungma a ingchung luo a ngie pata a chechiy kha a lapa khu aa? A ciypaki taa kiedyi na a la khu aa.
30 Kama naa daakhyi lipa ca naa dutuv tana a cuo. Kama kha pahmyapakhaw naa bya lipa ca a cadaapatlaatuv tana a cuo.
31 Cacuonakaw, biehmisi tana ica chang yi: cawsaa hing ama suena phangting hne Khazing a du pata bie ama rina taata a ngiethe pata ama cuo aa, cuorasala Thlaapa a du pata bie ama ripa ca a ngiethe khu pata cuo'a vayi.
32 Cawsaa Saacapaa a du pata bie a ripa ca a ngiethe khu pata ama cuo aa, cuorasala Thlaapa Pathe a du pata bie a ripa ca ata chuo lie cuose, hmie luo chuo lie cuose a ngiethe khu pata cuo'a vayi.
(Luk 6:43-45)
33 "Thingthyi phapa lu the riypata thingkung phapa hnyi aa hu, a kung a chie kieca thingthyi a chie ra aa. Thingkung ca a thyi ta ma pa chang khu.
34 Pariy ciypathla tie zaw, cawsaa chiepa nama cuo pata ca tuokhaatama biephapa ca nama ri the aa? Pakaa ca pathiypalung chunglie a awpa khana a ri.
35 Cawsaa phapa taca hmangphapa a pacungpa chung taa khata hmangphapa pachiy te, cawsaa chiepa ta ca hmangchiepa a pacungpa chung taa khata hmangchiepa kha a papya.
36 Biehmisi tana ica chang yi: nama pakaa taata biesiysapawpa nama ripa bangkhuo cuo khata khaapanakawma i za ri tapa kha Bierinapa ning thueta ca nama pasie sa a hu aa.
37 Niema bie mamaapa khata duopacupa cuo'a ung cate, niema bie mamaapa khata suephawpa nama cuo aa.
(Mar 8:11-12; Luk 11:29-32)
38 Cakhutaa Phungbie saya tie chekha hne Farasi tie chekha ta, "Saya, kharuehaa hmang suokhakha na tuepa na ma hmung khing," ama ta.
39 Cuorasala Zingsuv ta, "A pha lipa hne Khazing hmiekunglie zangtluo a tla lipa mingphang zaw ma kharuehaa hmang a hie ungciy? Profet Jonah kharuehaa hmang ta li pata kharuehaa hmang suokha hmuo tue'a va ang.
40 Jonah ta ngapuv riy chunglie ningthung hne zuothung a awpa haakhata Cawsaa Saacapaa zaw alyi chunglie ningthung hne zuothung a aw ra aa.
41 Bierinapa ning thueta Nineveh khy ming kha a daa yite sue aca phaw'a yi, tahematapakieca iema ca Jonah phungripa ama za thyi pata sue amaa zaa ngiepachiy; ica chang yi: ama lie hingna Jonah laata a le viepa a aw!
42 Bierinapa ning thueta Sheba siepahruonung kha a daa te sue aca phaw'a yi, tahematapakieca ruo luohlaa puv taata Solomon singna hne a pacuvnapa naathlie repa ta a vya tlaw. Biehmisi tana ica chang yi: ama lie hingna Solomon laata a le viepa a aw!
(Luk 11:24-26)
43 " A pyalyipa thlaapa ca cawsaa chung taakhata pya te tiy aw lina ruocaapa chunglie kha a awna hmang huv te aa khie, cuorasala suvkha hmuo hmung vyi.
44 Cacuonakawta "I vya pyanapa ing luo khana i kaa pakhaa aa," a ta. A kaa ca a ing kha a hripa, a pathesapa, hne a chikakysa pata a va hmung.
45 Cakhutaa vaa te ama laata a chie viepa thlaapa chiepa pasariy kha va u yite a vaw yite capa lieca ama aw. Capa cawsaapa aw zya ca a za cuotaana laa khata a chie vie. Cahaapa cana ata chuo cawsaa pha lipa zaw cunglie hing a tlung aa," a ta.
(Mar 3:31-35; Luk 8:19-21)
46 Zingsuv ta cawsaazaapuv'a lie bie a ri nguoluo ning kha a nung hne a nuta zaw ta ama kha bie rihne riypata ale lie a daa yite ama huo.
47 Cacuonakaw cawsaa pakha ta, "Na nung hne na nuta zaw na bie rihne riypata ale lie caa huo yi," a ta.note 12:47 Hluo vie caa-uv lieca rina tluo 47 * hing aw vyi.
48 Zingsuv ta ama paa kyihuo khata, "Ahungma i nung, hne i nuta zaw ta a cuo yi?"
49 a ta khu taata ziytuv tie kha a kuvdaw ta daw yite, "Iema hingna i nung hne i nuta zaw ta a cuo yi!
50 Ahunghmuo cuo sala vuoruo lie a awpa i Paa khingnapa a tuepa ca i nuta, i sieta hne i nung ta ama cuo," a ta.