Thuophaabie
MARKA
Marka ta Zingsuv kaw a cape tiyta a bie hne a pacuvna laata a hriepa kaw kha biepuv vie ta a chi. Tiynawtuv Johan kaw, Zingsuv tiy aa nawna kaw hne pasupaliy a angna kaw a pachangta tah a cape khu pahne Zingsuv pacuvna hne patluosana kaw kha a cape paluo. Cuo a vya syi vie taata Zingsuv ziytuv tie ta ama kha ama vya pachang the viele, cuorasala Zingsuv a dutuv tie taca ama hue hryly. Marka caa-uv a chuona luo hingta Zingsuv alyi lie a hring chung a hnangcawce zaa hne a hlyi vie ta vieluo lie taa yite a thiyna kaw hne a thupakhaana kaw kha a ri.
Marka thuophaabie hing ta bie pachuosana suohning hnyi te bareket (cadungkhuopa) chunglie chipa ta ama cuo. Hingpa tie hing Marka cuo li pata cawsaa hrang ta ama capepa tana a cuo thlu'a mang tapata ruepa a cuo.
1
Tiynawtuv Johan Phungrina
(Mat 3:1-12; Luk 3:1-18; Jhn 1:19-28)
1 Khazing Saacapaanote 1:1 Hluo vie caa-uv lieca Khazing Saacapaa * tapa hing aw vyi Zingsuv Khrih thuophaabie a pathanapa ca hinghaahingta a cuo.
Ref 6:17-18: Luk 3:19-20
2 Profet Isaiah ta,
"Mang tie, i tluo-utuv ca
niema cuota luo salu riypata,
nama hmie luo i pathlielu aa;
Ref 6:17-18: Luk 3:19-20
3 ueryi suokha ca ruochung lie kha u te;
'Abyipa cuota luopuv kha sa tie ung;
a ziy riypa luo ca padang tie ung!'"
a tapa haakhata a cuo sasaw.
4 Tiynawtuv Johan ca ruochung lie kha vya pya te sue a ngiethena riypata a ngiepachiyna hne aa patuvpa tiy a nawna kaw kha a u khyi.
5 Judea pe khyta bangkhuo taa hne Jerusalem khypuv taata cawsaa bangkhuo ca Johan'a luo kha vya pya yite ama suena a phu yite Jordan cavaa lie kha tiy a naw yi.
6 Ref 6:17-18: Luk 3:19-20Johan ca kala-uv hming ta ama taapa caw kha a tue te a se lie kha savang tesaw aa saw, khawbyapa hne khyitiy kha a ning.
7 Cawsaazaapuv kha, "Kama laata hmang a tue khu vie papaa na i hnang taata a vawle nguoluo. Kama hing ca a bung pata a phyipakaw riy pathluo riypata hmuo a tla va ang.
8 Kama ca tiy ta tiynawna ica pi yi, cuorasala ama ca Thlaapa Pathe tana tiynawna aca pi'a yi.
Zingsuv Tiy-anawna
(Mar 3:13—4:11; Luk 3:21-22; 4:1-13)
9 Capa ningkhue lieca Zingsuv ca Nazareth pe Galilee taakhata a vaw te Jordan cavaa lie kha Johan ta tiy a naw.
10 Tiy chung taata a kya thu pahne ta vuoruo a pahaw te Thlaapa kha thuvruv haata a cunglie a za cungpa kha a hmung.
11 Ref 6:17-18: Luk 3:19-20Vuoruo taata ueryi kha a zuv te, "Nama ca i Duepa i Saacapaa tana na cuo, na cunglie i palung a tling hringhruo," a ta.
12 Cakhupahne Thlaapa ta Zingsuv ca ruochung luo kha aa chiy.
13 Ruochung lieca ning sawliy chung aw te Setaa pasupaliyna kha a ang. Saa a hruopa zaw hne ta ama aw; cadyiseca avuoming ta ama ca ama aw khyi.
Galilee Lie Rehrie A Pathunapa
(Mat 4:12-22; Luk 4:14-15; 5:1-11)
14 Johan kha ama patuv khu taata Zingsuv ca Galilee luo kha vaa te Khazingnote 1:14 Hluo vie caa-uv lieca pena thuophaabie * a ta. Thuophaabie kha a phu.
15 Ref 6:17-18: Luk 3:19-20"Cuo ca a tling tli, Khazing pena ca aa ngie tli! A ngiepachiy ungla Thuophaabie hing zang tie ung," a ta.
16 Galilee riyliy kielie a cakuole pata ngaavaapa pahning, Simon hne a nuta Andru kha ngaa ama vaa nguoluo pata a hmung yi, tahematapakieca iema ca ngaa a vaapa tana ama cuo.
17 Zingsuv ta, "Na ziy tie ung, cawsaa a patuvpa tana ica tue'a yi," a ta.
18 Amaa sue kha thuse yite ama ziyle paluo.
19 A cawta a va cakuo vie pata a hrangpa uvcanu tie, Zebedi saacapaa Jeim hne Johan kha amaa sue ama thyi nguoluo pata a hmung yi.
20 A hmung pahne yi ta a ku yi ca ama paa Zebedi hne sawkawpalaw kha rehrietuv tie hne khata thusesiy yite ama kha ama ziy.
Thlaapa Pyalyipa Ta Aa Hryipapaa
(Luk 4:31-37)
21 Karpenaum khy luo kha va chiy yite Sabbath ning a vya chiy ca Zingsuv ca apungna-ing luo kha a ngie te phung a chang yi.
22 Ref 6:17-18: Luk 3:19-20A pacuvnapa kha ama kharue a haasa, tahematapakieca phungbie pacuvtuv saya tie haata cuo li pata nawhnyituv pakha haata a pacuv nakaw yi ta a cuo.
23 Cakhupatahne ta apungna-ing chunglie a awpa, a pyalyipa thlaapa ta aa hryipapaa kha khi te,
24 "Naazaretpa Zingsuv, "Kiema hing tuokhaatama malie na tue khing? Malie na para khing ma? Ahungma tapa kha maca pachang, nama ca Khazing'a taata a vawpa A pathepa tana na cuo," a ta.
25 Zingsuv ta, "A dieta tah aw, hingpapaa chung taahingta pya!" ta te a chuo.
26 A pyalyipa thlaapa cata cawsaapapaa ca khuosa ta siy te khuopuv ta a khi khu taata a chung taa cata a pya.
27 Cawsaazaapuv ca ama nang ta uo te pakha hne pakha kha, "Hingpa hing khaapatama a cuo? Naw hnyina cangta pacuvna thaapa tana a cuo! A pyalyipa thlaapa hmuo naw pi te a ri amaa ngie," amaa ta.
28 A thuohlaa ca sungkha ta Galilee pe bangkhuo kha a ze paluo te a pathuo diy.
(Mat 8:14-17; Luk 4:38-41)
29 Apungna-ing taakhata amanote 1:29 Hluo vie caa-uv lieca a pya pahne * a ta. pya pahne Jeim hne Johan hne khata Simon hne Andru tie ing luo kha ama vaa.
30 Simon piynung ca a nge ling te iehmang cunglie a zaa zie nakaw kha ama chiy pahne ama chang paluo.
31 Ama'a luo ca vaa te, a kuvbuo ta la te a padaa. A nge lingpa ca cakaa te iema kha a mangsang yi.
32 Zuoluo, ningtla khu taata a pasapa bangkhuo hne khuevuo ta a tuepa bangkhuo kha Zingsuv'a luo ca ama vya chiykhyi.
33 Khyming bangkhuo ca chiypakaa a thaa lie kha amaa hmya.
34 Pasana phangting ta a pasapa a hluvpuv kha patluo sa yite khuevuo hluvpuv zaw kha a papya. Khuevuo tie kha bie hehmuo pari sa vayi, tahematapakieca iema ta ama kha ama pachang.
Galilee Lie Zingsuv Phungrina
(Luk 4:42-44)
35 Mawdiy khy dyi hluo ta Zingsuv ca thu te khyle ruoduona luo kha pya te thlaa a chuo.
36 Simon hne a viesaa zaw ta ama ca va huv yite,
37 ama hmung pahne, "Cawsaa bangkhuo tana aca huv yi," ama ta.
38 Ama ta a paliepa yi ca, "Hingpa cahriy lie a awpa khyhrangpa luo zaw hing thuophaabie i phu the riypata tlaw ra'a ungpuv, tahematapakieca ama cana i vaw hnuochuopa ta a cuo," a ta.
39 Ref 6:17-18: Luk 3:19-20Cacuonakawta Galilee pe kha tlaw diy te, apungna-ing lie thuophaabie phu te khuevuo zaw kha a papya.
Zingsuv Ta Caahminghmaa A Phyapa A Patluo Sa
(Mat 8:1-4; Luk 5:12-16)
40 Caahminghmaanote 1:40 Caahminghmaa tapa caasuo hing pasana phangphang * tana zaw a cuo khu. a phyapa pakha ca Zingsuv'a luo kha a vaw te a pakhuv pane te,note 1:40 Hluo vie caa-uv lieca a pakhuv pane te * tapa hing aw vyi. "Na khing kieca ina pathe sa khu ciy," tapata paa a kie.
41 Zingsuv ta ngie a chisanote 1:41 Hluo vie caa-uv lieca a hi haasa te * a ta. nakawta a kuv va pazuu te a hrie. "Ica pathe sa khing, pathe tie," a ta.
42 Caahminghmaa pasanapa ta sungkha ta thuse te cawsaapapaa ca a pathe.
43 A raaringna khuosa ta a pi khu taata ama kha pathlie paluo te, Zingsuv ta,
44 Ref 6:17-18: Luk 3:19-20"Naathlie tie, hingpa kaw hing ahunghmuo chang'a vayi ciy; cadyiseca tluobyipa'a luo kha vaa la vaa pamang sa tie. Cakhutaata cawsaa ta a pathe tli tapa aca pachang na riypa yita Moses ta tue riypa a za tapa hriykhungrina kha va tue tie," a ta.
45 Cuorasala cawsaapapaa ca pya te capa kaw ca hya zangsa pata a rile nakawta bie ca pathuo diy te, Zingsuv ca luohuo ta khychung luo a ngie nguo li pata khyle luo ruo lie kha aw te hmangting taata ama vya pangie.