21
(Mar 12:41-44)
1 Zingsuv ta a kya mang ca a hnyirungpa tie ta Biena-ing tuokaa thingkaw lie sue ama pathla nguoluo pakha a hmung;
2 a siypasanung nunghlyinung ta piesepa pie hning a pathlapa zaw kha a hmung.
3 Ama ta, "Ica chang yi: Nunghlyinung hingna a hrangpa bangkhuo laata a hluv vie a pi;
4 tahematapakieca a hrangpa tie pathuo ca ama hnyi lebuopa ca muo ama pi ta, cuorasala hingpa nung hing ca a siy a pasasa thluo pata a hringna cuota a hnyipa kha a bangkhuo ta a pi diy," a ta.
(Mat 24:1-2; Mar 13:1-2)
5 Chekha ta Biena-ing kaw kha ri yite, alung phasa pata pangi yite a puvthena zya hne Khazing'a luo ama pipa a ahlu kaw zaw kha ama ri. Zingsuv ta,
6 "Hingpa bangkhuo hing nama hmung; hingpa alung bangkhuo hing thawpathla diy'a yite suokha cunglie suokha hmuo a aw lina cuo a vaw aa," a ta.
(Mat 24:3-14; Mar 13:3-13)
7 Iema ta, "Saya, capaca khatiy thuema a cuo aa? Capaca a vya chiy'a tli tana pata tuokhaapa pamangsana ma a aw aa?" tapata ama hiehriy.
8 Zingsuv ta, "Aca dung li riypa yita a raaring tie ung; Cawsaa hluvpuv kha i ming ta a vaw'a yite, 'Kama hingna ama ta a cuo ang, a cuo na a ngie tli,' aca ta'a yi.
9 Rietuvna hne a duna kaw nama thyi tiyta ciy kha ung; cahaapa hmang ca a vya chiy taa aa, cuorasala a chuona ta vya paziy paluo'a vyi," a ta.
10 Cakhutaata iema kha, "Ruokha hne ruokha amaa du aa; acuzaa suokha hne suokha ama tuv aa.
11 Aling khuosa ta a siy'a te, ruo ting lie cakuo ruvnaana a tlung aa; ciy aa chiypa hmang hne pamangsana lesapa kha vuoruo taata a luo aa.
12 Cuorasala hingpa hmang bangkhuo a vya chiy hluo ta niema ca ca patuv'a yite aca hrisaa'a yi; apungna-ing luo kha bieripa riypata ca chiykhyi'a yite thaw a ca pathla'a yi; I ming kawlieta siepahruo tie hne uvtuv byi hmie luo aca chiykhyi'a yi.
13 Capaca nama cuota tehte khuona cuopha ta a cuo aa.
14 Nama hne nama kha a rikuo pacie riypata na palung chunglie kha a ting pacie kha,
15 tahematapakieca bie hne singna kha ca pi'a yi ang te nama carie tie ahungtahmuo nama bie kha a du pata ca i khu'a vayi.
16 Nama nung nama paa, nama uvnu, nama tieriy hne nama viesaa tie ta calyi'a yite chekha ca aca thie'a yi.
17 I ming kawlieta cawsaa bangkhuo ta aca hue'a yi.
18 Cuorasala nama luv lie suobuv buvkha hmuo vie'a vyi.
19 Naa daapahrang khu kiena hringna na hmung aa" a ta yi.
(Mat 24:15-21; Mar 13:14-19)
20 Rieka tie ta Jerusalem ama cadungpa kha nama hmung tiyta a ru hluo ta a ra'a tli tapa kha nama pachang aa.
21 Catiyta Judea lie a awpa ca tluocung luo kha a ruo yi se, khypuv chunglie a awpa ta pya yi sala khyta lie a awpa tie ca khypuv chung luo kha a ngie kha yi se.
22 Tahematapakieca hingpa hing 'Phuvlana Ning,' tapa kha cuote Caapathepa ta a ripa bangkhuo a tlingna riypata a cuo.
23 Capa cuo ca nu a phyapa canung hne ahnung a pathlie li liepa haaseta a hnyipa tie cuota a ruv hringhruo aa! Tahematapakieca hing alyi cunglie hing ciy aa chiypa ruvnaana za tlung'a te hingpa cawsaa zaw cunglie hing Khazing duotena ca a tlung aa.
24 Chekha ca zueziy ta thiy'a yite chekha ca chuelyi ruo ting luo sii ta a dapa ama cuo aa; Jentail ming ta Jerusalem kha iema cuo a chuo hluo li ama phyi ta ama chaapuo aa.
(Mat 24:29-31; Mar 13:24-27)
25 "Ning hne thlaapa hne aasiy lie khiy pamangsana hmang aa luo aa. Chuelyi cung ruo zaw ca riyliy tiylaw pachipa hne a khipa pu khata ciyna hne lalilahie chiy pata a tue'a yi.
26 Chuelyi cunglie a tlung riypa ama rue tiyta cawsaa ca ciy'a yite ama thiychie aa, tahematapakieca vuoruo cahrana ca a cahang aa.
27 Cakhutaata cawsaa saacapaa ca rungnaana lesyina'a nata cahrana hneta amyi cung taata a zuvpa kha ama hmung aa.
28 Hingpa hmang zaw a vya chiy a vya cuole tiyta, a daa ungla cungluo kha mang tie ung, tahematapakieca niema a thlana ning ca a ngie tli," a ta.
(Mat 24:32-35; Mar 13:28-31)
29 Cakhutaa Zingsuv ta pakhing-puonabie suokha a chang yi: "Thyikuv kung hne thingkung bangkhuo kha mang tie ung.
30 A hnaa a kya pakiypa nama hmung tiyta, cuovuo na a ngie tli tapa kha nama pachang.
31 Cahaangiethiecata, hingpa hmang a vya tlungpa nama hmung tiyta Khazing Pena ca a ngie tli tapa kha nama pachang aa.
32 Biehmisi tana ica chang yi: Ata lie a hringpa tie ama thiy diy hluo hingta hing hmang bangkhuo hing a vya tlung aa.
33 Avuo hne alyi ca ama ra aa, cuorasala i bie ca ra buo hluo'a vyi," a ta.
34 "A raaring ung! Pariyna te ning dangna kaw hne khysatungbang ruvnaana kaw dyi kha rue kha ung, capa ningkhue cata rue li pata ca vya pha'a yite
35 cyihyi pa-uo ta a ca pa-uo'a yi. Tahematapakieca capa ning ca chuelyi cunglie a awpa cawsaa bangkhuo cunglie a vya tlung aa.
36 A vya tlung riypa hmang bangkhuo taahingta nama law khu na riypata thaazuo nama hnyi riypa hne Cawsaa Saacapaa hmielie namaa daa khu thena riypata a raaringsa pata aw ungla thlaa chuo pari tie ung," a ta.
37 Zingsuv ca a ning tating ta Biena-ing lie kha pacuv yite zuo a vya chiy tiyta pya te Oliv tluo luo kha aa kya ri taw.
38 Biena-ing lie a bie naathlie riypata cawsaa bangkhuo ca mawdiy ta ama thu.