11
(Mat 6:9-13; 7:7-11)
1 Luokha ca Zingsuv kha suvkha lie thlaa a chuo. A pachuo pahne a ziytuv pakha ta, "Abyipa, Johan ta a ziytuv tie thlaa chuo a changpa haayita thlaa chuo malie chang ra tie," a ta.
2 Zingsuv ta, "Hinghaahingtana thlaa nama chuo riypata a cuo aa:
Ima Paa,note 11:2 Hluo vie caa-uv lieca Vuoruo lie a awpa ma Paa * a ta.
Na ming pathepa ca
pa-uvsathyi pata cuo mangsue;
na penapa tlung paa tie se.
3 Ningting maa hupa sa ca malie pi tie.
4 Ma cunglie a suepa tie maa ngiethe pahaayita,
ma suena kha malie a ngiethe ra tie.
A ruvpa pasupaliyna luo malie papha sa kha,'
nama ta aa," a ta.
5 Cakhutaa iema kha, "Abiephungpa ta niema hrawlie pakhakha ca zuocang ta a viesaa ing luo kha vaa te, 'I viesaapa, viechuo tluo thung na picaw thi tie.
6 I viesaa pakha ata balata hing vya chiy te i pi riy hnyi va ang,' a ta.
7 Ama ta ingchung taata, 'Hnaa na pahnaw kha, ingchiy khaa tli pate i saata zaw hne maa zie tli. Kya thu pata ca pi khu va tli ang,' a ta.
8 Ica chang yi: kya thu li pata hne viechuo kha pi paluo li pata aw ra mang sala a viesaa a cuo nakaw hne nangzaa li pata a hie byalya nakawta kya thu'a te a khingpa bangkhuo kha a pi aa.
9 Cacuonakawta ica chang yi: hie ungla pi pata nama cuo aa; huv ungla nama hmung aa, cakhaw ungla nama cuota ingchiy ca pahaw pata a cuo aa.
10 Tahematapakieca a hiepa bangkhuo ca pi pata cuo'a yite, a huvpa bangkhuo ta ama hmung aa, a cakhawpa bangkhuo ca ingchiy kha pahawpa pata ama cuo aa.
11 Niema chung taahingta na saata tah ngaa caa hie sala pariy a pipa nama aw'a ma?note 11:11 Hluo vie caa-uv lieca viechuo caa hie yi sala alung a pipa nama aw'a ma? * a ta viepuo.
12 Aatiy acaa hie pata tluociekuopa a pipa nama aw'a ma?
13 Hing tluv ta nama pha li thluo pata nama saata zaw kha hmangphapa pi riypa nama pachang kieca, vuoruo lie a awpa nama Paa taca a hiepa tie kha Thlaapa Pathe ca pi li pata aw changchiy'a vayi," a ta.
(Mat 12:22-30; Mar 3:20-27)
14 Zingsuv ta bie a ri the lipa khuevuo kha papya te; khuevuo a pya khu taata bie a ri the lipa cawsaapapaa cata bie a ri ca cawsaazaapuv ca ama nang ta a uo,
15 Cuorasala cawsaa chekha ta, "Khuevuo tie byicepa Beelzebul ming tana khuevuo hing a papya," ama ta.
16 A hrangpa tie ta ama dyapasya khing nakawta, vuoruo taata a cuopa kharuehaa hmang suokha tue riypata ama hie.
17 Cuorasala Zingsuv ta ama ruenapa kha a pachang nakawta iema kha, "Tuokhaapa pena hmuo cuose iema hne iema a che yite amaa du kieca ama ra aa; iema'a na iema a dupa chungkhue ca amaa chepatlaa.
18 Setaa zaw a phuv a phuv ta amaa du kieca, tuokhaatama a pena ca a daa khu aa? Niema ta Beelzebul ming tana khuevuo a papya ina ta ungciy.
19 Cahaa cata i papya kiehaw, nama khuevuo papyatuv tienote 11:19 Gk nama saacapaa zaw kha ahung ming tama ama papya? Cacuonakawta iema khana nama bie a chituv ta a cuo'a yi.
20 Cuorasala kama ca Khazing cahrana ta khuevuo kha i papya pata a cuo kieca, Khazing Pena ca niema'a luo a vya pha tli.
21 A thaaruvpapaa ta a cehre bangkhuo hneta a ing kha a huo kieca a hnyipa hmang ca a bang taw.
22 Cuorasala a thaaruv viepapaa ta a du te a te tiyta, ing a hnyituvpapaa ta aa buchuopa cehre bangkhuo ca lapa diy te a paruvpa chechiy kha malie a re patlaa diy yi.
23 Kama naa daakhyi lipa bangkhuo ca naa dutuv tana ama cuo; pahmyapakhaw naa bya lipa ca a cadaapatlaatuv tana a cuo," a ta.
(Mat 12:43-45)
24 Thlaapa pyalyipa pakha ca cawsaa pakha chung taata a pya tiyta a pahyna hmang huv riypata ruocaapa chunglie kha hmangting ta a khie. Suvkha hmuo a hmung khu li tiyta, amaa na ama kha, 'I pya se ciepa i ing luo khana i kaa pakhaa aa, aa ta.'
25 A va kaa ca pathe phiyliy te a chikaky pata a za awpa kha a hmung.
26 Cakhutaa va pya te ama laata a chie viepa thlaapa pasariy kha a vya chiy yite capa lieca ama aw. Ca cawsaapapaa a chuona lie a daahmang ca a hruothu lie laata a ruv vie," a ta.
27 Zingsuv ta hingpa bie a ri diy pahne ta cawsaazaapuv chung taata canung pakha kya khi te, "Nama caa phyapa hne ahnungtiy caa pipa nung hing khatluv tama thluechiypa a cuo! a ta.
28 Cuorasala Zingsuv ta, "Khazing bie kha thyi yite a ziypa tie na thluechiyviepa ta a cuo yi," a ta.
(Mat 12:38-42)
29 Cawsaa ama vya hluv vie hryly tiyta, Zingsuv ta, "Ata chuo cawsaa hing a pha li hringhruopa tana ama cuo! Pamangsana tuepa riypa a maa hie, cuorasala Jonah pamangsana ta li pata kharuehaa hmang hrangpa khaahmuo pahmung sapa cuo'a vayi.
30 Profet Jonah ca Nineveh cawsaa zaw cuota pamangsana a za cuo pahaakhata Cawsaa Saacapaa zaw hing ata chuo cawsaa zaw cuota pamangsana a cuo ra aa.
31 Bieripana ning thueta sungluo ruo siepahruonung ca a daa'a te ata chuo cawsaa zaw hing sue a phaw aa, tahematapakieca Solomon singna kha naathlie riypata alyi dena luo taata a vya pha; mang tie ung: Solomon laata a le viepa na hingpa lie hing a aw.
32 Bieripana ning thueta Nineveh khy ming zaw kha a daa'a yite ata chuo cawsaa zaw kha sue ama phaw aa, tahematapakieca iema ca Jonah phung ripa kha ama thyi tiyta ama suena amaa ngiepachiy; mang tie ung: Jonah laata a le viepa na hingpa lie hing a aw," a ta.
(Mat 5:15; 6:22-23)
33 "Ahungtahmuo myi-ing ama vuo tiyta aa nuna hmang lieta chi buo vayi, beke zaw pakhuvsue buo vayi. Cawsaa amaa zaa ngie tiyta a phata tah ama hmung the riypata myivuona tung cunglie khana ama chi.
34 Nama ming ca nama pangpa cuota myi-ing tana a cuo. Nama ming a tluo kieca nama pangpa yalya ta khe'a te, nama ming a tluo li kieca nama pangpa ca a zing diy aa.
35 Cacuonakawta nama chunglie khena hing zingna a cuo li pakha pachangpasie tie ung.
36 Nama pangpa bangkhuo ca a khaapa kha hmuo zingna chunglie aw li pata a khe diy kieca, myi-ing ta aca khepa haa yi khata a khe diy aa," a ta.
(Mat 23:1-36; Mar 12:38-40)
37 Bie a ri nguoluo ning kha Zingsuv ca Farasipa pakha ta sa ning a ku; cacuonakawta vaa te sa ning riypata cabya lie kha a tu.
38 Zingsuv ca sa a ning hluo ta a kuv aa siy lipa kha Farasipa ta hmung te a kharue a haasa.
39 Cacuonakaw Abyipa ta, "Niema Farasi tie ca nama panuo hne nama pakaa kha ale luo dyi pasiy ung cate, cuorasala nama chung luo ca karuo-awna hne phalina ta nama pabi.
40 A ngaapa tie! Ale luo a tuetuv Khazing ta a chung luo zaw kha a tue cuo vama?
41 Cacuonakawta a chunglie a awpa hmang tie kha a siypasapa tie va pi ungla khaapa bangkhuo kha nama cuota a pathe aa.
42 Farasi tie, niema ca thluechiylipa tana nama cuo! Khazing kha putinan, hruohmie, iesing hne uohnaasiyhnaa phangting kha chehraachekha nama pi raalaa pata a dangna hne Khazing duena ca hnang nama chaw. Hingpa zaw hing tue'a ung cate muo a cunglie ma ri taapa zaw hing hnangchaw li pata nama aw'a ta.
43 "Farasi tie niema ca thluechiylipa tana nama cuo! Apungna-ing uvthyi thude lie a tu ca khingsa ung cate, chadawtluo lie pa-uvsathyina hneta bie a changpa ca nama tlechuosa.
44 Thluechiylipa tana nama cuo! Niema ca aa hnangna ama tue lipa thluo, cawsaa zaw ta pachang li pata a cunglie ama cakuo tawpa hne tana namaa lu," a ta yi.
45 Phungbie saya tie chung taa pakha ta, "Saya hinghaahingta na ri tiyta kiema thuo zaw malie na pachi puo ra," a ta.
46 Zingsuv ta, "Phungbie saya tie, niema zaw thluechiylipa tana nama cuo! Cawsaa zaw ke cunglie hmang a riypa khang ung cate, cuorasala niema ca phyakhyi riypata nama kuvdaw ta hmuo de khing va ungciy,
47 thluechiylipa tana nama cuo! Nama mingchingmingvuo tie ta ama za thiepa profet tie cuo khata thluo phasapa nama tuepa.
48 Cacuonakawta niema ca nama mingchingmingvuo tie ta ama za tuepa kha a daakhyituv hne a pacusatuv tana nama cuo, iema ta profet tie kha thie yite niema ta ama thluo nama tue.
49 Cacuonakaw muo Khazing Singna ta, 'Kama ta profet tie hne thuophaabiephyatuv tie i pathliepa'a yi, chekha kha thie'a yite a hrangpa kha hrisaa'a yite ama thie aa,' a ta ta.
50 Cacuonakaw ata chuo cawsaa zaw hing Abel ama za nawna taata patha pata bienatluophie hne hmangpathepa a lala lieta ama nawpa
51 Zekhariah'a nata chuelyi hruothu baataata profet tie ama za palangpa thiyse bangkhuo muo kha hie pata ama cuo aa. A cuo, ica chang yi: Ata chuo cawsaa zaw'a lie hingna hie pata a cuo aa.
52 "Niema Phungbie saya tie, thluechiylipa tana nama cuo! Singnapa ing pahawna taw kha cake ung cate, niema zaw a ngie lipa ung cata a ngie khingpa tie zaw kha nama pakhuo," a ta yi.
53 Ale luo a pya tiyta phungbie saya tie hne Farasi tie ta ama kha hue laalaw yite, hmang a hluvpuv kaw kha bie hluvpuv ama hiehriy,
54 a ripa bie mamaapa chung taata a suena patuv khu riypata mangkhuo yite ama huo.