2
1 Ningthungna lie kha Galilee pe Kaanaa khy lie kha a chiyhiena pyi aw te Zingsuv nung kha capa lieca a aw.
2 Zingsuv hne ziytuv tie zaw kha a chiyhiena pyi luo ca ama ku ra.
3 Ama mingsuv tiy a chuo tiyta a nung ta Zingsuv kha, "Mingsuv tiy hnyi va tli yi," a ta.
4 Zingsuv ta, "Canung nung, nama hne kama khaapama maa se, i cuo pha valie," a ta.
5 Zingsuv nung ta changtaapa tie kha, "Ama ta aca changpa bangkhuo kha tue mya ung," a ta yi.
6 Judah ming ta ama phung haata a pathena riypata capa lieca ruocuo suocaruv chi yite; ruocuo suokha ta tiy gaalaan suokiy taata sawthung te a tlaw.
7 Zingsuv ta changtaapa tie kha, "Hingpa ruocuo hing tiy pabi diy tie ung," a ta yi. A lepalana te ta pabi yite,
8 iema kha, "Tiy kha siy ungla saduona pyi mangchiykingkaatuv kha va pi tie ung," ta yite, ama va pi.
9 Mingsuv tiy ta a lipa tiy ca mangchiykingkaatuv cata a pacuo te, hingpa mingsuv tiy hing khaapa taata ma a vaw tapa kha a pachang li nakawta (Tiy a thepa changtaapa tie kha taca ama pachang thluo), napuv a chiytuvpapaa ca ku te,
10 "Malie ca mingsuv tiy pahuocepa kha thu taa yite muo aa de pata ama dang khu taata mingsuv tiy cakhawpa kha ama pi ta. Cuorasala nama ca a pahuocepa kha ata te pata na thu kalie," a ta.
11 Zingsuv ta hingpa kharuehaa hmang suokhana hing Galilee pe Kaanaa khy lieta a tue; capalie ca a rungnaana kha paluo sa te, a ziytuv tie ta ama kha ama zang.
12 Cakhutaata Zingsuv hne a nung, a nuta zaw, hne ziytuv tie ca Kapernaum khy luo kha zuv yite ning cawta chung ama va aw.
(Mat 21:12-13; Mar 11:15-17; lk 19:45-46)
13 Lawsena Pyi a ngiesa tli nakawta Zingsuv ca Jerusalem luo kha a vaa.
14 Biena-ing chunglie kha cue hne tuv hne valale a zaapa tie hne tuokaa a thlepa tie zaw ama cabya lie amaa tupa kha a hmung yi.
15 Cacuonakawta khuhriy kha china riypata a camaa te tuv hne cue hne, iema zaw bangkhuo kha Biena-ing taata a cade diy yi, tuokaa thletuv tie cabya zaw kha palipathi diy te ama tuokaa diyta zaw kha a hipatlaa diy.
16 Valale a zaapa tie kha, "Hingpa hmang taahingta nama valale kha pyakhyi diy ung! I paa ing ca chadaw zaana ta hmuo kha tie ung!" tapata naw a pi yi.
17 Ziytuv tie ca Caapathepa ta, "Vya Khazing, na ing i uevuopa hing i chunglie na myi haata a ling," a tapa kha ama nang a kya vuo.
18 Cakhutaata Judah ming ta, "Hingpa hmang na tuena kawlie hingta khaapa pamangsana ma malie na pahmung sa aa?" ama ta.
19 Zingsuv ta, "Hingpa Biena-ing hing para ungla ning thung chunglie i sa pakhaa aa," a ta.
20 Judah ming ta, "Ning thung chung tama na sa pakhaa aa? Hingpa Biena-ing sana lie hing kung sawliy kung caruv tli hing ama za ru!" ama ta.
21 Cuorasala Zingsuv ta biena-ing a tapa ca ama pangpa khatana a cuo.
22 Cacuonakaw thiyna taata pathu pakhaapa a cuo khu taata, ziytuv tie ca ama hing muo a ripa khata a cuo ta tapa kha ama nang vuo te Caapathepa hne Zingsuv ripa kha ama zang.
23 Zingsuv ca Lawsena Pyi chung Jerusalem lie a aw ning kha cawsaa hluvpuv ta kharuehaa hmang a tuepa zaw kha hmung yite ama zang.
24 Cuorasala Zingsuv taca zang diy vayi, tahematapakieca cawsaa bangkhuo kha a pachang diy yi.
25 Iema kaw kha cawsaa hrangpa ta changpasie a hu vyi, tahematapakieca ama palung chunglie khaapama a aw tapa kha a pachang diy.