1 Kama ca mingsuv zuung hmisi ta cuo ang te i paa ca mingsuv diedung hnyituv ta a cuo. 2 A pathyi lipa i ce bangkhuo kha pasepathla diy te a thyi a pathyipa ce bangkhuo kha a pathyi hryly riypata a pathe. 3 Niema ca kama ica changpa yi bie khata aca pathe sa diy tli yi. 4 Kama hne a pazue ungla kama zaw niema kha icaa pazue ra'a yi. Mingsuv ce ca a zuungpuvnung lie aa pazue li kieca amata tah a pathyi khu lipa haata niema zaw kama chunglie nama aw li kieca niemata tah thyi pathyi khu'a va ungciy. 5 Kama ca mingsuv zuung cuo ang te niema ca ace tana nama cuo. Ahunghmuo cuose kama chunglie aw te kama zaw ama chunglie i aw kieca thyi a hluvsa a pathyi aa, tahematapakieca kama li pata ca nama tue khupa khaahmuo aw vyi. 6 Kama chunglie a aw lipa ca mingsuv ce caapa haakhata ale luo thaw pata nama cuo aa. Cahaapa a ce zaw ca pahmya yite myi luo kha thaw yite a kuo diy. 7 Kama chunglie aw ung cate i bie kha nama chunglie a aw kieca nama khingpa bangkhuo kha naa hie ungla tuepa pata nama cuo aa. 8 Thyi a hluvsa nama pathyina thue hingta i Paa rungnaana kha paluo sa ung cate kama naa ziytuv nama vya cuonapa a cuo. 9 Paa ta ina due pahaata kama ta ica due ra yi; i duena chunglie hing aw tie ung. 10 I Paa phungbie kha ziy ang te a duena chunglie i awpa haahingta i phungbie nama ziy pata a cuo kieca i duena chunglie hing nama aw aa. 11 I palungtluona kha nama chunglie aw te namaa lawna ca a tling riypata hingpa bie hing ica chang yi.

12 I phungbie ca hingpa hing tana a cuo. Kama ta niema ica duepa yi haahingta pakha hne pakha kha a due ra tie ung. 13 Ahungtahmuo viesaa cuota a hringna pipa duena laa hingta a le viepa duena hnyi vyi. 14 Ica changpa yi hing nama tue kieca i viesaa ta nama cuo. 15 Niema ca changtaapanote 15:15 Gk Sii ca ta va tli yi ang, tahematapakieca changtaapa taca a byipaapa ta khaama a tue tapa kha pachang vyi. Cuorasala kama ta ca viesaa ica ta yi, tahematapakieca i Paa'a taata i thyipa bangkhuo kha ica pachang sa diy yi. 16 Niema ta naa tlaw va ungciy, cuorasala kama na caa tlaw yi ang. Kama ming ta ama'a luo nama hiepa bangkhuo kha Paa ta aca pi riy'apayita a hmangpa thyi kha va pathyi tie ung tapata ica chang yi. 17 Cacuonakaw ta naw ica pipa yi ca hingpa hing ta a cuo: pakha hne pakha a due tie ung.

18 Chuelyi ta aca hue kie yi ca, niema aca hue hluo yi ta kama na ina hue taa yi tapa kha pachang tie ung. 19 Chuelyi huopa ta cuo ungla ca chuelyi hingta a huopa haata aca duesa'a yi. Cuorasala kama ta chuelyi taahingta caa tlaw yi ang te a huopa nama cuo li tli nakawta chuelyi ta aca hue yi. 20 "Changtaapa tie ca ama byipaapa laata le vie buo vayi," ica tapa yi i bie kha a thyi tie ung. Kama kha ina hrisaathierue kie yi ca niema zaw aca hrisaathierue ra'a yi; kama bie kha ama ziy kieca niema bie zaw kha ama ziy ra aa. 21 Cuorasala kama cawsaa nama cuo nakawta hingpa hmang bangkhuo hing nama cunglie ta ama tue aa, tahematapakieca kama naa pathlietuv kha pachang vayi. 22 Iema'a luo a zuv li pata hne bie chang li pata aw ang sala ama cunglie suena aw'a vyi, cuorasala ata hing ca sue a ngiethe khupa cuo'a vayi. 23 Kama naa huepa ca i Paa zaw kha ama hue ra. 24 Ahungtahmuo ama tue buo lipa i tuepa hing iema'a lie tue li pata za aw ang sala ama suena aw'a vyi. Cuorasala ata hing ca i tuepa kha hmung yite kama hne i Paa hneta malie ama hue. 25 "Khaapa bie hmuo aw li patana ina hue yi," tapata ama phungbie chunglie a capepa bie a tlingna riypatana a cuo.

26 I Paa'a taata niema'a luo i za pathlie riypa Byatuv, Thlaapa Pathe a vaw'a te kama kaw kha tehte a khuo aa. 27 Niema zaw a hruothu taata kama'a lie a awpa nama cuo nakawta kama kaw kha tehte nama khuo ra aa.