5
1 A hnyirungpa zaw, a vaw ungla nama cunglie a vya chiy riypa ruvnaana kawlie kha caa ungla a ngiy tie ung.
2 Nama hnyirungna ca hmaw diy te, nama caw ca a pabung diy tli.
3 Nama siyy hne nama ngu ca a se ta ce diy te, capa a se cata niema kha caa du'a yite nama saa kha myi haata aca ning'a yi. Niema ca ninghnangcepa cuo tana sue hne thiy kha namaa pacung.
4 Naathlie tie ung! Nama lu lie rehrietuv tie kha dya dung ung cate namaa pangaapa ama thavie muo una ueryi hne sa caa hriepatuv tie zaw khina ueryi na cungnungce Khazing naa luo a chiy tli.
5 Hing chuelyi lie hing lunghruotlungsa pata anuona chunglie nama hring; aca thiena riypa yi ning hne cuo cuota namaa pathu pacie.
6 Niema caa vielie lipa aa dangpa tie kha sue phaw ung cate nama thie.
7 Cacuonakawta duepa zaw Abyipa aa vawna te ta palung pasiysa pata aw tie ung. Lu a thlupa ta a lu taata a sungnaapa sa a vyi riypa kha palungpasiysa pata a huo taw. Cuovuo khy hne suepuvdaw khy aa vaw riypa kha palungpasiysa pata a huo.
8 Niema zaw nama palung a pasiy riypatana a cuo. Nama palung a pacu tie ung, tahematapakieca Abyipa a vawna riypa cuo ca aa ngie tli.
9 I duepa zaw,note 5:9 Gk Uvnu zaw bie ripa pa nama cuo li riypata pakha hne pakha cunglie kha a cie kha ung. Mang tie ung, bieripatuv ca chiypakaa lie a daa khiy!
10 I duepa zaw, Abyipa ming ta bie a phupa profet tie te-angna hne palungpasiyna kha a mangpuo tie ung.
11 Hmisi ta kieca ang khuna a hnyipa tie kha thluechiypa tie ma ta yi. Job ang khuna kaw kha nama thyi mangtli. Abyipa aa tingna hne khatluv tama kawpacuona hnyi te nangduena a hnyi tapa kha nama hmung mangtli.
12 Cakhutaacata, i duepa zaw, vuoruo cuose, alyi cuose, a hrangpa suokhakha ming ta cuose chie a sa kha ung. Khazing suephawna nama ang li riypata a cuo nama tapa kha "a cuo" ta ungla, cuovyi nama tapa kha "cuovyi" ta tie ung.
13 Nama hrawlie ruvnaana a tawpa nama aw ma? Thlaa chuo yi se. A palung a tluopa nama aw ma? Pathuosana hlaa kha sa yi se.
14 Nama hrawlie a tluo lipa nama aw ma? Khrihsaa uvthyi tie kha ku yi sala, iema ta Abyipa ming ta chiytiy thuv yi sala thlaa chuopa yi se.
15 Zangna ta thlaa ama chuona khata a pasapa kha a khuo aa. Abyipa ta patluo sa'a te, suena a tuepa zaw kha a ngiethe aa.
16 Cacuonakawta pakha hne pakha'a lie kha nama suena a phu ungla, thlaa a chuopa tie ung, cacuokieca patluo sa pata nama cuo aa. Aa dangpa thlaachuona ca cahra te hmang tue khuna a hnyi.
17 Elijah kha kiema haapa cawsaa tana a cuo ra. Khy saa li riypata khuopuv ta thlaa a chuo tiyta, kung thung'a nata thlacaruv chung khy saa vyi.
18 Cakhutaata thlaa a chuo pakhaa ca avuo ta khy pasaa sa te alyi ta kung a pavyi sa.
19 I uvnu hne sieta zaw,note 5:19 Gk Uvnu zaw biehmisipa taata a viepa pakhakha kha a hrangpa pakha ta a vya kaakhyi pakhaa tiyta,
20 capa a suepa a vya kaakhyi pakhaapa ca a suepa thlaapa kha thiyna taata khuo te, suena hluvpuv zaw kha a buvkhung tapa kha pachang tie ung.