1 Uvnu hne sieta zaw, niema a hluvpuv kha pacuvtuv nama cuo riypa cuo vyi, tahematapakieca kiema pacuvtuv tie hing malie laata a hlyi vie ta bie ripa patana ma cuo aa tapa kha nama pachang. 2 Tahematapakieca ma bangkhuo hingta paana a hluvpuv ma tue. Bierina lie paana a hnyi lipa ca cawsaa tlingpa ta cuote, a pangpa a uv khupa tana a cuo. 3 Aruo ca ma ri malie a ngie se tapata a pakaa lie hmyakhe ma tuv kieca a pangpa yalya ta ma khingna luo ma pasi sa khu. 4 Tiypalaw khiy rue tie ung: a lesapa cuote a cahrasapa thliy ta a pasi sa, cuorasala a cawkariyta tah a cuopa a palawmaana ta uv te a mawtuv ta a khingna luo kha a pasi sa. 5 Cahaa cata palyi hing a cawta tah a cuo, cuorasala khuopuv ta aa pale taw.

A cawkariypa myihliy ta ruo a kupuv a pakuo sa khu pakha nama pachang. 6 Palyi ca myi haatana a cuo. Ma palyi ca ma pangpa chebuo zaw hrawlie a awpa pha lina aa hmyana hmang ta cuote, ma pangpa bangkhuo kha a papyalyi sa. Ma hringna kha myi luo hmaw te, ama hne ama zaw kha hell taata a thupa myi luo aa hmaw. 7 Cawsaa hingta saruopa hne pavaa phangting, a valepa hne aa thiylepa saruo phangting hne tiy chunglie a awpa saruopa phangting hing hri te a pasing khu, 8 cuorasala palyi a hri khupa ahunghmuo aw vayi. Palyi ca thiyna ca-ie hneta a bipa, hri khu lipa, a tle paripa pha lina tana a cuo. 9 Ma palyi hingta Abyipa hne Paa Khazing kha pathuosa pate, capa palyi ngiethie cata Khazing hmingsuo a lu pata sapa cawsaa kha chie ma sa. 10 Thluechiy bie hne chiesana kha pakaa suokha taacata a pya. I uvnu hne sieta zaw, cahaa cata a cuo riypata cuo vyi. 11 Tiyhnaa suokha taata tiy thlungpa hne tiykhapa ama pya hne the'a ma? 12 I uvnu hne sieta zaw, thyikuv kung ta Oliv thyi a pathyi the ma? Mingsuv kung ta thyikuv thyi a pathyi the ma? Tiy-iepa zaw ta tiythlungpa papya khu vyi.

13 Nama hrawlie ta ahung hingma a singpa hne a pachangpa ta a cuo ungciy? Hringzya phapa, singna taata a pyapa nangnena ta nama hriepa re khata paluo sa tie ung. 14 Cuorasala nama palung chunglie ta hietliena hne niema kaw dyi a pacuona a aw kieca biehmisipa kha a du pata suena hne a palena kha tue kha ung. 15 Cahaapa singna ca cungluo taata a zuvpa cuo vyi, cuorasala chuelyi singna, thlaapa hmang a cuo lipa hne a pha li patana a cuo. 16 Tahematapakieca hietliena hne kiema kaw dyi a pacuona a awna hmang lie ca a re lina hne pha lina phangting zaw a aw aa. 17 Cuorasala cungluo taata a zuvpa singna ca a suokhana ta a pathe, cakhutaata diena hne a bi, a nang a ne, a viesaa a the, nangduena hne thyipaa pha ta bi te, pahlyipalena hne a cuo pakhina hnyi vyi. 18 Diena a tuetuv tie ta diena chunglie ama tuvpa saciy taata ama pahriypa ca a dangna tana a cuo.