JEIM
Caapaphya
Jeim Caapaphya hing chuelyi ruo ting ta aa chepa Khazing cawsaa zaw'a luo paphyapa tana a cuo. Khrihsaa hringzya hne awtuv zyazaa cawpanapa caa ta a cuo. Caa a capetuvpapaa ta a ri khingpa a sie the vie riypata pakhingpuonabie a hluvpuv a ri. Capa a ripa tie ca hnyirungna hne siypasana, pasupaliyna, zyazaa phana, palunghringna, zangna hne tuena, thyiliparyi cyina, singna, ahruna, hruotlena hne a panena, caw-yina, a palena, palung pasiyna, hne thlaachuona kaw zaw ta ama cuo.
Hingpa caapaphya hingta khrihsaa biena lieta zangna hne tuena aa khele riypa a biepuvna zya kha a paluo sa.
1
Bie-achangna
1 Khazing hne Abyipa Zingsuv Khrih changtaapa ta a cuopa Jeim ta chuelyi khy ting ta aa chepatlaapa Khazing cawsaa zaw bie icaa chang yi.
2 Kama uvnu hne sieta zaw,note 1:2 Gk Uvnu zaw ruvnaana phangting hne namaa taw tiyta nama palung tluo se,
3 tahematapakieca nama zangna lie dyapasya ruvnaana namaa tawpa khata ang khuna aca pahnyi sa yi tapa kha nama pachang.
4 Nama bupa aw li pata ruena aa kypa hne tluo a tlingpa nama cuo riypata nama ang khuna kha paky tie ung.
5 Niema hrawlie pakhakha ta singna namaa hu kieca cawsaa bangkhuo kha palung tling lina hnyi li pata hne pahyasa pata a pipa Khazing kha a hie se.
6 Cuorasala palung luolue li pata zangna ta a hie se, tahematapakieca palung luoluena a hnyipa ca thliychie ta a pazupa riyliy tiylaw hne tana aa lu,
7-8 tahematapakieca a palung luolue te palung lunghning a phyapa hne hmangting lie a palung a hmang lipa ca Abyipa'a taata suokhakha hmung riypa kha a nguopuo kha se.
9 Zangtuvnote 1:9 Gk Uvnu a phahlapa ca calang-thawpa a cuo tiyta a palung tluo sala,
10 zangtuv a hnyirungpa ca pachungpa a cuo tiyta a palung tluo se, tahematapakieca a hnyirungpa ca lu chunglie paapaapa haata a lang aa.
11 Ning ca kya chiy te a paling tiyta lu kha a e, paapaapa ca a uv te, zung te a puvthena kha a ra. A hnyirungpa tie ca cahaa cata cuo'a yite, ama re lie amaa taw amaa muo yalya khata a uv'a yite ama lang aa.
12 Pasupaliyna a ang khupa ca thluechiypa tana ama cuo. Cahaa cata pasupaliyna kha a ang khupa ca ama a duepa zaw'a lie Abyipanote 1:12 Hluo vie caa-uv lieca Khazing ta* a ta. ta bie a kuopa yi hringna byilakhuv ama hmung aa.
13 Pasupaliyna na ang tiyta, "Khazing na naa pasupaliy," ta khah; tahematapakieca Khazing ca pha lina ta pasupaliy khu li pata ama zaw ta pakha hmuo pasupaliy vayi.
14 Cuorasala cawsaa pakha ca a saapa khingna khata pasupaliy khu te a dung a vie khu.
15 Capa a khingna ca nu haata phya te suena kha a pachuo, suena ca ale khing a tlung tiyta thiyna a pachuo.
16 Duepanote 1:16 Gk Duepa uvnu zaw zaw dung khupa ta cuo kha ung.
17 Pahyasa pata pipa bangkhuo hne lasaw tluotlingpa ca cung luo taatana ama cuo. Khena Paa taata zaa cungpa ta cuote, ama'a lieca ningdiy haata a hnyilena hne a thlena aw vyi.
18 A sapa hrawlie thyipaa taapa cuo riypata a tingnapa a tling khuna riypata biehmisipa lie kha malie a sa.
19 I duepa zaw hingpa hing a thyi pari tie ung: ahung nama cuo zaw naathliena lie kha catli ungla, bierina lie hne hihaana lie kha haa tie ung.
20 Tahematapakieca nama hihaana hingta Khazing a dangna kha paluo sa khu vyi.
21 Cacuonakawta a pyalyipa hne a pha lipa zyazaa bangkhuo ca thaw ungla nama hringna caa khuo khupa yi nama chunglie tuv ciepa a bie kha a panena hne cuhluo tie ung.
22 Khazing bie kha a tue ta a tuetuv cuo tie ung, a thyi dyi thyi pata niema hne niema a dungpa cuo kha ung.
23 Tahematapakieca Khazing bie kha a thyi dyi thyi te a tue lipa ca iema hne iema kha thlaluo lie a mangpa haatana ama cuo.
24 Iema hne iema kha a mang yite ama cakuo khu taata khaapama ma lu tapa kha a maw paluopa hne tana amaa lu.
25 Cuorasala hyazangna phungbie, tluo a tlingpa phungbie lie kha a mang yite a ziy paripa tie ca a thyi dyi thyi te a maw paluopa cuo li pata tue te a ziypa ama cuo nakawta ama tuena cunglie kha thluechiy pipa tana ama cuo aa.
26 Pakhakha ta biena luo a zuepa tana i cuo ta sala a palyi kha aa ve khu li kieca a pathiypalung kha a dungpa cuote a bienapa ca muo hnyi vyi.
27 Paa Khazing hmie lieta pathe te pyalyina a hnyi lipa biena tapa ca: ruvnaana a tawpa haaraa hne nunghlyi zaw kha a mangchiypa hne ama hne ama kha chuelyi pyalyina ta aa kaa li riypata a vena khana a cuo.