JOHAN
Johan Caapaphya Suohningna
Johan Caapaphya Suohningna hing "Khrihsaa uvthyi" ta "duepa Nung hne a saata zaw" luo a paphyapa ta cuote, a ri khingna ca khrihsaabuv hne a chunglie a awpa khrihsaa tie tanapa ta a cuo. A pachangta tah a capepa bie hingta a ri khingpa ca pakha hne pakha a due riypa, pacuvna a hmuo lipa hne pacuvtuv tie zaw a raaring riypa kaw ta a cuo.
1
1 Khrihsaa uvthyi ta,
Biehmisipa chunglie ta i duepa, a tlawpa nungcuo hne a saata zaw kha caa ica paphya yi. Kama dyi ta ica duepa yi cuo li pata biehmisipa a pachangpa bangkhuo ta aca due yi,
2 tahematapakieca ma chunglie a awpa hne chuozaa ta a aw riypa biehmisipa nakawta a cuo.
3 Paa Khazing hne Paa Khazing Saacapaa Zingsuv Khrih'note 1:3 Hluo vie caa-uv lieca Abyipa Zingsuv Khrih* a ta.a taata vihnyina, nangduena hne diena ca biehmisipa hne duena chunglie kiema'a lie aw mangsue.
4 Paa ta malie a changpa haata na saata zaw chekha na biehmisipa lie a hring yi tapa i hmung tiyta i palung a tluo hringhruo.
5 Cacuonakawta duepa nung, pakha hne pakha a due ungsiy tapata paa ica kie. Hinghing nawbie thaapa i vya cape pata cuo vyi, a hruothu taata ma za hnyipa khatana a cuo.
6 Duena ma tapa ca a nawbie ziy pata hringpa hingna a cuo. Capa a nawbie ca nama ziy aa tapata a hluo baataata nama za thyipa khatana a cuo.
7 Zingsuv ca thiysaa tana a vaw tapa a paw lipa dungvietuv hluvpuv kha chuelyi luo ama vya pya tli. Cahaapaapa cawsaa bangkhuo ca dungvietuv hne Khrih a dutuv tana ama cuo.
8 Manote 1:8 Hluo vie caa-uv lieca nama hrie nguoluopa* a ta. hrie hnuochuopa kha namaa sung li riypa hne nama lawmuo kha a tlingsa pata nama hmung riypata a raaring pata aw tie ung.
9 Khrih pacuvna chunglie aw li pata a hlyi ta kuorakuo hliy te a hringpa ca Khazing kha hnyi vyi. Pacuvna chunglie a awpa bangkhuo ca Paa hne Saacapaa kha a hnyi.
10 Capa pacuvna a cyi li pata niema'a luo a vawpa ahunghmuo ing chung luo pangie kha ung; bie zaw a chang kha ung.
11 Tahematapakieca iema kha bie a changpa ca hmangpha lipa ama tuepa lie khana namaa hraw ra tanata a cuo.
12 Niema'a luo cape riypa a hluvpuv i hnyi raalaa pata caahnaa hne caatiy ca hmuo'a va ang. Maa lawna aa kyna riypata niema'a luo a vaw'a ang te hmie a hmung pata bie maa rue'a ung tapata i hnabie a syi.
13 A tlawpa na nutanung a saata zaw ta bie acaa chang yi.note 1:13 Hluo vie caa-uv lieca Amen* a bechiypuo kalie.