1 Cacuonakawta Khrih kaw a hruothuna pacuvna luo kha kaa li tli pata sang siy tli ung sala a tluotlingpa pacuvna luo kha tungle ungsiy. Athiypa re taata a ngiepachiyna kaw, Khazing zangna kaw, 2 tiynawna kaw, kuvkhangna kaw, a thiypa tie thupakhaana kaw, hne chuozaa suebieripana kaw zaw kha ca a pacuv pakhaa a hu va tli. 3 Khazing ta malie a khingkhyi kieca hmie luo cana ma tung'a ung. 4 Tahematapakieca Khazing khena chunglie zaa aw buo tlipa tie, vuoruo lasaw kha a pacuo buo tli yite Thlaapa Pathe a ting buo tlipa tie, 5 Khazing bie a pha zya kha a pacuo tlipa tie, a vaw riypa chuo a cahrana kha a pacuo tlipa tie, 6 ama cuo raalaa pata a lie pakhaapa tie ca sue a ngiepachiyna luo kaakhyi pakhaa khu pata cuo vayi. Tahematapakieca Khazing Saacapaa kha vieluo lie khepuo pakhaa yite cawsaa hmielie nangzaa hmiechi ta a tue pakhaapa tana ama cuo. 7 Zaa saa canyi lawmawpa khytiy kha saw te lu a thlupapaa cuota thyipaa pha a papyapa alyi ca Khazing thluechiy a hmungpa alyi tana a cuo. 8 Cuorasala capa alyi cata ahling kung hne lubi dyi a papu sa kieca a thlahnena aw li'a pata a chuona taca chiesa pata myi ta rue riypatana a cuo aa.

9 Duepa zaw, hinghaahingta ma ri raalaa pata niema kawlie taca khuona a hnyipa hmang pha viepa na nama hmung aa ta pate ma hnaa a nguo. 10 Tahematapakieca Khazing ca a dang lipa cuo vyi; ama hmiemangna cangta duena ta nama hriepa re hne mingpathepa tie nama mangchiynapa, a ta te pata zaw nama tue nguoluopa hing maw'a vyi. 11 Niema bangkhuo hingta namaa ruechuopa a tlingna te ta khahaapaapa palungthuna kha a chuona te ta hnyi patlung ung tapa maca khing yi. 12 Cakiedyina niema ca nama thaa thuv li pata zangna hne palungpasiyna ta Khazing biekuopa a hmungpa tie haakhata nama hring khu aa.

13 Khazing ta Abraham'a lie biekuona a za tue ning kha ama ming laata a le viepa ming hmuo riy a aw li nakawta ama ming kha hmuo te, 14 "Thluechiy ca pi'a ang te samingsahlaa a hluvsa ica pahnyi sa aa," a ta. 15 Abraham ca palung pasiysa pata a huo nakawta bie aa kuopa ca a hmung. 16 Cawsaa ta ama laata a le viepa ming ta chie aa sa kieca capa chiesana cata a-i-achuena bangkhuo kha a pachuo sa. 17 Cahaa cata Khazing ta atingna ca a thle khu'a vyi tapa kha a biekuona rucutuv tie'a lie a siesa pata a pachang sa khing tiy yi ta chiesana ta bie a kuo yi. 18 Cacuonakawta thle khu a aw lipa hmang suohning, Khazing zaw ta a cuo lina kaw paluo sa riypata a cuo khu lipa hmang thueta, ama'a lie a canawpa kiema ca ma hmiekunglieta ama chipa a ruechuona kha va patuv riypata khuopuv ta thaazuo malie a pi. 19 Ma hringna cuota a hmisipa hne tiypalaw thaatungkyipa haata a tapa a ruechuona ca hnyi pate, capa maa ruechuona ca biena-ing pangzu hnang luo hmangpathepa te khata a vaa ngie. 20 Kiema cuota zakuo a ruo lupa Zingsuv ca capa luo ca a ngie te Melkhizedek tluobyi phung haata chuozaa tluobyilecepa ta aa li.